6 حاجات ممكن تحصل لشعرك في الشتا, وازاي تقدري تعالجيها

ريهام محمود
ريهام محمود
في
شعر
1395

خلال شهور الشتا ، ممكن مزيج الهوا الجاف جوه البيت والرياح الباردة بره البيت يبقى قاسي على شعرك ، وممكن تكوني لاحظتي ان شعرك في الشتا مش بيكون في احسن حالاته ، والنهاردة من خلال المقال بتاعنا هنتعرف على تأثير الجو البارد على الشعر وازاي تقدري تعالجي المشاكل اللي ممكن تحصل لشعرك في الشتا ، بالاضافة لوصفات طبيعية للعناية بشعرك في الشتا.

تأثير الجو البارد على الشعر:

1- شعرك هيبقى جاف اكتر:

لما الجو بيبقى بارد ، الهوا بيبقى جاف اكتر لانه بيحتفظ برطوبة اقل من الهوا الدافي ، وعشان تمنعي الهوا البارد انه ينشف شعرك ، حاولي ماتغسليش شعرك يوميا لان الزيوت الطبيعية بتخلق طبقة واقية بين فروة راسك وشعرك ، ولو بتحبي تغسلي شعرك باستمرار او شعرك من النوع الدهني ومحتاج يتغسل اكتر من مرة خلال الاسبوع ، استخدمي الشامبو الجاف اللي هيساعدك على تنضيف الشعر وهيطول فترة غسيل الشعر.

تأثير الجو البارد على الشعر 1
تأثير الجو البارد على الشعر 1

2- الشعر هيبقى باهت:

الهوا البارد والجاف ممكن يبقى قاسي جدا على الشعر ويخليه باهت ويفقد لمعانه ، وعشان تحافظي على شعرك في الشهور الباردة ، اتجنبي ادوات تسخين الشعر والسيشوار ، وعلى الرغم من انها ممكن تبقى حلول سريعة لتصفيف الشعر ، الا انه الحرارة ممكن تتلف شعرك وتضعفه ، بدل استخدام السيشوار ، سيبي شعرك ينشف بشكل طبيعي ، او اعتمدي على ادوات تصفيف بتستخدم تقنية الاشعة تحت الحمراء وبتساعد في الحفاظ على الرطوبة.

تأثير الجو البارد على الشعر 2
تأثير الجو البارد على الشعر 2

3- هيحصل تقصف وانقسام لاطراف الشعر:

الهوا الجاف بيخلي الشعر هش وضعيف اكتر ومعرض للتكسر ، وممكن يحصل تقصف وانقسام لاطراف الشعر ، وعشان تمنعي المشكلة دي ، قصي اطراف شعرك بشكل منتظم كل 6 اسابيع خلال فترة الشتا ، كمان استخدام مشط اسنانه واسعة وشامبو خفيف من غير مكونات قاسية ممكن يساعد في الحفاظ على صحة شعرك ومنع تقصف وانقسام الاطراف.

تأثير الجو البارد على الشعر 3
تأثير الجو البارد على الشعر 3

4- شعرك ممكن ينتج كهربا ساكنة:

ممكن تكوني لاحظتي انه في الشتا ، اول ما بتقلعي الايس كاب الصوف بتلاقي الشعر واقف زي ما يكون متكهرب ، ده بيحصل لان شعرك بالظبط زي باقي جسمك ، بيكون شحنات كهربائية بتتراكم على الايس كاب ، وعلى الرغم انه مافيش طريقة لمنع المشكلة دي ، الا انه في بعض النصايح اللي ممكن تحمي شعرك من الكهربا الساكنة بشكل مؤقت ، جربي تحطي شوية ماية او كريم مرطب على اطراف صوابعك وحطيها على خصلات الشعر اللي فيها كهربا ساكنة ، او استخدمي Leave-in conditioner خفيف لتقليل التطاير.

تأثير الجو البارد على الشعر 4

5- ممكن تعاني من تساقط الشعر الموسمي:

طبيعي جدا انك تفقدي مقدار معين من الشعر طول السنة ، ولكن ممكن تلاحظي ان شعرك بينزل في الشتا اكتر مقارنة بالصيف ، وده بيحصل لان قلة الرطوبة في الايام الباردة بتسبب تساقط الشعر ، وتقدري لعلاج المشكلة دي تستخدمي وصفات طبيعية للتساقط ، جربي خلط القرنفل المطحون مع القرفة والفلفل الاحمر الحار وزيت جوز الهند الدافي ، واعمليه ماسك على الشعر وسيبيه طول الليل واغسليه الصبح.

تأثير الجو البارد على الشعر 5

6- هتعاني من قشرة الشعر اكتر:

شعرنا بيحصله جفاف بشكل طبيعي في الشتا ، وده بيسبب جفاف وتقشر فروة الراس ، وعشان تقللي من القشرة ، اختاري شامبو ضد القشرة ، وجربي طرق طبيعية للتخلص منها زي زيت شجرة الشاي ، الدراسات اظهرت ان استخدام زيت شجرة الشاي ممكن انه يقلل من اعراض قشرة الراس بنسبة كبيرة ممكن توصل ل 41% وبيحسن من دهون وحكة فروة الراس.

تأثير الجو البارد على الشعر 6

وصفات طبيعية للعناية بالشعر في الشتا:

– ماسك لتنعيم الشعر وترطيب فروة الراس الجافة:

المكونات:

– 1 معلقة كبيرة من زيت الارجان.

– ½ ثمرة افوكادو.

– 1 معلقة كبيرة من خل التفاح.

– 10 نقط من زيت الروزماري او اكليل الجبل.

– 1 صفار بيضة.

طريقة التحضير والاستخدام:

1- اخلطي المكونات كلها بعض ، واضربيهم في الخلاط.

2- وزعي الخليط على الشعر كله من الجذور للاطراف.

3- سيبيه على الشعر لمدة 15 دقيقة.

4- اغسلي الشعر كويس بشامبو خفيف.

– ماسك لتجعد الشعر:

امزجي 1 معلقة صغيرة زيت ممكن زيت زيتون, 1 بيضة, ½ كوباية بيرة ، حطي الخليط على شعر نضيف ورطب ، سيبيه لمدة 15 دقيقة ، واغسليه بماية باردة ، ممكن استخدام البيرة يبقى مكون غريب ، ولكن هي مفيدة جدا للعناية بالشعر وبتعالج تجعد الشعر في الشتا بشكل فوري ، ممكن تستخدمي ماية الشعير كبديل للبيرة او تستخدمي اي نوع صودا معمول من ماية الشعير.

– ماسك للمعان الشعر:

امزجي ½ حبة بطاطا مطبوخة ومهروسة, مع ½ كوباية توت بري, ½ حبة فلفل احمر, 3 حبات فراولة مهروسة ، وزعي الخليط على الشعر وفروة الراس وسيبيه لمدة 25 دقيقة ، ممكن كمان تجربي ماسك اللبن الرايب لشعر ناعم وبيلمع.

– ماسك لعلاج تطاير الشعر:

هاتي 6 جرام من شمع العسل ، دوبيهم على النار ، اول ما يدوبوا قللي الحرارة وضيفي 10 جرام من زيت السمسم, 10 جرام من زيت جوز الهند, 10 جرام زيت خروع, 10 جرام من زيت الجوجوبا ، صبي الخليط في برطمان ازاز نضيف وضيفي له كام نقطة من اي زيت عطري من اختيارك ، واستخدميه على الشعر المتطاير.

وصفات طبيعية للعناية بالشعر في الشتا
وصفات طبيعية للعناية بالشعر في الشتا

مقالات متعلقه

طريقة عمل شامبو البيض الطبيعي المغذي للشعر في البيت

طريقة عمل شامبو البيض الطبيعي المغذي للشعر في البيت

طريقة العناية بالشعر في الشتا وفترة الرياح الموسمية

طريقة العناية بالشعر في الشتا وفترة الرياح الموسمية

افضل زيوت للشعر الخفيف هتساعدك على تكثيفه

افضل زيوت للشعر الخفيف هتساعدك على تكثيفه