بـ3 مكونات بس.. اعملي أحلى كوكيز زبدة الفول السوداني Peanut Butter Cookies

بقلمآية حسان فيحلويات visibility85

الكوكيز والبسكويت من أكتر الحاجات اللي كلنا بنحبها كبار وصغيرينن ورغم انه وصفاته دايما متطورة ومابتخلصش، إلا أنه من وقت للتاني بنحب نقدملك وصفة جديدة تكون لفتت نظرنا، وكمان تكون فيها قيمة غذائية عالية وتكون سهلة عليكي ماتاخدش وقت وفي نفس الوقت لذيذة وتشبع، في المقال ده هنقولك في خطوات بسيطة جداً وبـ3 مكونات بس.. ازاي تعملي أحلى كوكيز زبدة الفول السوداني Peanut Butter Cookies، خلينا نبدأ سوا.. 

بـ3 مكونات بس.. اعملي أحلى كوكيز زبدة الفول السوداني Peanut Butter Cookies

المكونات في الوصفة دي تكفي عمل 25 قطعة بسكويت، هتحتاجي أقل من 30 دقيقة للتحضير. 

المقادير اللي هتحتاجيها:

حوالي 240 جرام من زبدة الفول السوداني. 

10 جرام سكر “نص كوباية”.

بيضة واحدة

طريقة التحضير: 

الخطوة الأولى: سخني الفرن لحرارة متوسطة (180 درجة مئوية)، و في طبق كبير اخلطي زبدة الفول السوداني والسكر والبيض.

الخطوة الثانية: طلعي الخليط اللي مزجناه في أول خطوة، المفروض أن شكله معاكي دلوقتي يبقى عامل زي العجينة، قطعيه لكرات صغيرة لمتوسطة الحجم ورصيه على  صينية فيها ورق زبدة علشان مايلزقش. 

الخطوة الثالثة: افردي كرات العجين اللي عملناها باستخدام شوكة، عشان يبقى حجمها متناسق وكمان تديها نقشة أو شكل حلو. 

الخطوة الرابعة: في الفرن اللي سخناه، دخليها وسيبيها تستوي لمدة من 8 إلى 10 دقايق بس، هتعرفي انها استوت كويس وبقت جاهزة انك تخرجيها لما تلاقي ضهر البسكوتة “الوش اللي ناحية الصينية” بقى لونه دهبي شوية.

كوكيز زبدة الفول السوداني
كوكيز زبدة الفول السوداني

الخطوة الخامسة: سيبيه يبرد تماماً وبعد كده تقدري تقدميه مع لبن دافي أو ميلك شيك، وبالهنا والشفا. 

شوفي معانا فيديو للوصفة كاملة بالخطوات: 

اعرفي معانا كمان ازاي تعملي شيبسي التفاح.. وصفة لذيذة وصحية