ليه المفروض ماتشربيش قهوة بعد الاكل
لو انتي من عشاق القهوة ، وبتحبي تشربي كوباية القهوة الصبح بعد الفطار على طول ، وكوباية كمان كابتشينو بعد الغدا ، واحتمال انك تشربي فنجان اسبريسو بعد اكلة تقيلة او عشان تقدري تكملي يومك ، الحقيقة ان ده ممكن يضر صحتك اكتر ما تتخيلي ، لانه ثبت ان القهوة بعد الوجبة ممكن تأثر على صحتك ومظهرك ، والنهاردة من خلال موضوعنا هنتعرف مع بعض على اضرار شرب القهوة بعد الاكل.
اضرار شرب القهوة بعد الاكل:
1- ممكن تسبب جفاف بشرتك:
فنجان القهوة ممكن يساعدك تصحصحي الصبح وتبدأي يومك ويفيد صحتك بطرق كتير ، ولكن شربه بعد الاكل على طول هيمنع جسمك انه يمتص كل العناصر الغذائية من الاكل ، وممكن انه يقلل من امتصاص الحديد بنسبة كبيرة جدا ممكن توصل ل 80% ، ولما جسمك مش هيوصله كمية كافية من الحديد ، ده هيأثر عليكي من نواحي كتير ، وهيكون مرئي بشكل خاص على بشرتك ، هتلاحظي انها بقت شاحبة وجافة اكتر من المعتاد ، وده هيخلي التجاعيد تظهر بشكل اكتر على البشرة.
2- ممكن انها تضر اسنانك:
شرب القهوة بعد الوجبة مباشرة ممكن يأدي لابطاء قدرة الجسم على امتصاص المعادن الاساسية ، بما فيهم الكالسيوم ، والكالسيوم احنا بنفقده بشكل طبيعي من خلال الشعر والجلد ، والجسم بيطرده من العرق والبول ، وشرب القهوة هيأدي لفقدان كمية اكبر من الكالسيوم ، ولو نظامك الغذائي معوضش فقدان الكالسيوم ده ، هيبدأ جسمك في الحصول على الكالسيوم من عضمك واسنانك ، وده بدوره هيخلي اسنانك هشة وضعيفة وهيأدي لتهيج اللثة.
3- ممكن تزود من مستويات الكوليسترول الضار:
اظهرت الدراسات ان الزيوت الموجودة في القهوة بتأثر على قدرة الجسم على تنظيم الكوليسترول ، وده بيخلي القهوة واحدة من اكتر الحاجات اللي بترفع نسبة الكوليسترول في نظامنا الغذائي.
4- مضره للشعر:
حتى لو نظامك الغذائي متوازن وغني بكل العناصر الغذائية الاساسية ، عادة شرب القهوة بعد الوجبة مباشرة ممكن انها تدمر مجهودك كله في نظام الاكل الصحي ، لان شرب كوباية قهوة بعد الوجبة على طول ، بيقلل من امتصاص كتير من العناصر الاساسية المهمة ، وده هيأثر على جسمك من نواحي كتير ، وممكن انه يأثر كمان على شعرك ، لما جسمك يكون مفتقد للحديد ، الدم بيكون صعب عليه حمل الاكسجين اللي بيصلح خلايا الجسم اللي بتحفز نمو الشعر ، وده بدوره هيأثر على صحة فروة راسك وهيأدي في النهاية لتساقط الشعر.
قولي لنا بتشربي كام كوباية قهوة في اليوم؟ وهل بتحبي تشربي القهوة قبل او بعد الوجبة؟