14 طريقة غير تقليدية وفعالة لتخزين الاطعمة
في انواع اطعمة كتير بنشتريها بنكون مش هنستخدمها على طول وبنحتاج نخزنها ، وللاسف ان في كتير منها ممكن يبوظ بعد فترة قصيرة وبنضطر نرميها ، ولكن لحسن الحظ ان في طرق بسيطة تقدري تستخدميها هتحفظ لك الاطعمة طازة لفترة اطول ، والنهاردة من خلال موضوعنا هنقولك طرق لحفظ الاطعمة وكلها اثبتت فعاليتها.
طرق لحفظ الاطعمة لفترة اطول:
1- حافظي على الخيار لفترة اطول لفي كل واحدة منهم بورق مطبخ ، واحفظيهم في كيس بلاستيك زيبلوك او محكم الغلق.
2- احفظي علب الجبنة او كريمة الطبخ مقلوبة في التلاجة ، ده بيعمل تأثير فراغ بيبطء من نمو البكتيريا اللي ممكن تبوظها.
3- عشان تمنعي حشرات الدقيق ، حطي قطعة من اللبان بالنعناع ملفوفة بورق فويل جوه كيس الدقيق.
4- عشان تحافظي على الفراولة او التوت لفترة اطول ، اشطفيها بمحلول متكون من 2 معلقة كبيرة خل مع 3 كوبايات ماية.
5- الطماطم المجمدة تقدري تستفادي منها وتعملي بيها شوربة او صلصة ، وبالطريقة دي تقدري تخزنيها لمدة توصل ل 6 شهور.
6- لفي الاعشاب بورق مطبخ مبلول بشكل بسيط يعني يادوب يكون رطب ، وحطيهم في كيس بلاستيك ، واتأكدي انك تخرجي كل الهوا من الكيس ، وبعدين احفظيه في التلاجة ، الاعشاب هتفضل طازة ومش هتدبل لحد ما تخلص.
7- عشان تحافظي على الخبز طري وخالي من العفن ، حطي معاه في الكيس قطعة كرفس.
8- عشان تحافظي على السكر ناعم ورطب من غير تكتلات ، حطي معاه كام قطعة مارشميلو.
9- بمجرد ما تقطعي التفاحة لشرايح ومش هتاخديها كلها ، لفي حواليها استك عشان تثبتي باقي القطع مع بعض ، ده هيمنع ان التفاحة تتحول للون البني.
10- لو عايزة الافوكادو ينضج بشكل اسرع ، حطيه في كيس فيه موز ، الموز بيدي مستويات عالية من الايثيلين وده هيخلي الافوكادو ينضج بشكل اسرع.
11- خزني الفاكهة المجففة في برطمان زجاج محكم الغلق في مكان بارد ، بالطريقة دي الفاكهة هتفضل طرية لاطول فترة.
12- لفي الخس بقطعة من الورق الفويل ، بالطريقة دي هيفضل طازة معاكي لحد 4 اسابيع.
13- عشان تمنعي ان التوت طازة يلزق في بعضه اثناء التجميد ، رصيه على صينيه او طبق الاول منفصلين عن بعض وجمديهم ، وبعدين خديهم واحفظيهم في كيس بلاستيك.
14- عشان تحافظي على الليمونة المقطوعة طازة ، اغمسيها في ملح وحطيها في التلاجة.
مين جربت اي واحدة من الطرق دي ونجحت معاها؟ ومين عندها طرق تانية غير اللي قولناهم تشاركها معانا؟
