6 طرق طبيعية للتخلص من البثور
البثور بتظهر على البشرة طول الوقت ، لانها دورة طبيعية تماما لاي شخص في اي عمر ، ممكن انها تظهر في اي مكان في الجسم وبتظهر في اشكال مختلفة ، ولحسن الحظ ان في اساليب طبيعية لتهدئة البشرة ، والنهاردة من خلال موضوعنا هنتعرف على 6 طرق طبيعية للتخلص من البثور ، واعادة بشرتك صحية وخالية من العيوب.
طرق طبيعية للتخلص من البثور:
1- الثلج:
الثلج بيساعد على تهدئة البثور الملتهبة بالتدريج لحد ما تختفي تماما ، الثلج بيساعد على التئام البثور وتقليل الاحمرار ، والثلج بيساعد جدا مع البثور الكبيرة المؤلمة.
وتقدري تختاري وقت استخدام الثلج ، على حسب روتين بشرتك اليومي ، تقدري تعمليه الصبح وبالليل ، او حتى كذا مرة في اليوم ، لو عندك بثور كتير على بشرتك.
طريقة استخدامه:
– نضفي البثرة بالراحة بماية دافية.
– لفي مكعب تلج في فوطة نضيفة وحطيه على البثرة لمدة دقيقة واحدة.
– شيلي مكعب الثلج واستني كام دقيقة قبل ما تحطيه مرة تانية ، لان ده هيمنع اضطراب انسجة البشرة.
والميزة انك حتى لو ماعندكيش مكعبات ثلج تقدري اي كيس خضار مجمد عندك.
2- زيت الجوجوبا:
زيت الجوجوبا مليان بالفيتامينات والمعادن المفيدة للبشرة ، واللي ممكن تستخدميه لترطيب البشرة ولمكافحة العدوى ، والافضل من ده كله كمان انك تقدري تحطيه على منطقة العين من غير ما يسبب تهيج.
طريقة استخدامه:
– حطي كمية صغيرة من الزيت على صوابعك.
– دلكي بيها بشرتك بالراحة.
3- الاسبرين المطحون:
الاسبرين اساسه من مكونات طبيعية من شجيرات بتحتوي على حمض الساليسيليك (المفيد جدا لتقليل حب الشباب) ، واللي استخدمه المصريين القدماء طريقة مضادة للالتهابات ، وبيساعد في علاج تورم واحمرار البثور.
طريقة استخدامه:
– هاتي الاسبرين اطحنيه لحد ما يبقى بودرة ناعمة وضيفي له ماية دافية.
– حطي الاسبرين على اماكن البثور مباشرة على البشرة لتقليل الالتهاب.
– الطريقة دي هتساعد على علاج الالم بعد الطفح الجلدي.
ممكن كمان تضيفي له كمية صغيرة من العسل.
4- زيت بذور الكتان:
زيت بذور الكتان بيحتوي على حمض اوميجا 3 الدهني او المسمى بـ الفا لينولينيك ، وهو عنصر ممتاز لتقليل التورم والجفاف وتهيج الجلد ، وهيساعد على الحفاظ على بشرتك رطبة ، وتجديد خلايا البشرة ، وتوحيد لون بشرتك بشكل طبيعي.
ولو عندك ندبات سابتها بثور سابقة بالفعل ، ماتقلقيش زيت بذور الكتان بيساعد على ازالة ندبات البثور وعيوب البشرة.
طريقة استخدامه:
– حطي نقطة واحدة من زيت بذور الكتان على صوباعك.
– ادهني بيها المنطقة اللي فيها بثور وادمجيه على البشرة كويس.
5- الخيار:
الخيار غني جدا بالعناصر الغذائية زي فيتامين C, وحمض الفوليك ، وكمان يعتبر مرطب ومهديء للبشرة ، وبالتالي هيكون مثالي جدا لتقليل الالتهاب.
طريقة استخدامه:
– اخلطي خيارة واحدة صغيرة مع كوباية شوفان واضربيهم مع بعض في الخلاط.
– خدي معلقة صغيرة من الخليط ده اخلطي معاها معلقة صغيرة زبادي.
– وزعي الخليط على بشرتك وسيبيه لمدة 30 دقيقة ، وبعدها اغسلي البشرة بالماية.
6- زيت الروزماري (اكليل الجبل):
زيت اكليل الجبل غني بالكالسيوم وفيتامين B6, والحديد.
ويعتبر الزيت مفيد لاشراق البشرة, بيقلل من الالم والالتهابات اللي بتسببها البثور ، وبيحتوي كمان على مضادات الاكسدة المفيدة جدا للبشرة اللي بتساعد على محاربة الشيخوخة.
طريقة استخدامه:
– اخلطي 2 معلقة كبيرة من الطين الاخضر مع 1 معلقة كبيرة من جل الالوفيرا.
– ضيفي نقطتين من كل نوع من الزيوت دي: زيت اكليل الجبل, زيت شجرة الشاي, زيت الليمون ، امزجيهم مع بعض كويس.
– وزعي الخليط على بشرتك وسيبيه لمدة 5 – 10 دقايق.
– بعدها اغسليه بماية باردة.
– كرري الوصفة مرة واحدة في الاسبوع.
