طريقة عمل وصفة ارز القرنبيط المتبل

بقلمريهام محمود فيمطبخ visibility235

وصفة ارز القرنبيط المتبل هو بديل صحي للكربوهيدرات اللي موجودة في الارز العادي ، وهي وصفة مكسيكية ليها شعبية كبيرة جدا ، وممكن تتعمل بانواع كتير من الخضروات زي القرنبيط, البروكلي, الكرنب, الجزر والذرة الحلوة حسب اختيارك ، تعالوا نشوف مع بعض في السطور الجاية الطريقة بالخطوات.

وصفة ارز القرنبيط المتبل:

المكونات:

– 3 معالق كبيرة زيت نباتي.

– 6 كوبايات من ارز القرنبيط ، حوالي راس قرنبيط كبيرة الزهرات بتاعته متقسمة ومتقطعة ومفرومة في محضر الطعام.

– 1 بصلة صغيرة مفرومة ناعم.

– 4 فصوص ثوم مفرومين.

– 2 حبة فلفل هالبينو مفرومين.

– 1 معلقة صغيرة ملح.

– 2 حبة طماطم كبيرة مفرومة ناعم.

– ¼ كوباية شوربة فراخ او خضار او ماية.

– 1 معلقة صغيرة كمون مطحون.

– ¼ معلقة صغيرة شطة او بابريكا (لو مش حابه تبقى حراقة)

– 2 معلقة كبيرة صلصة طماطم.

– ½ كوباية كزبرة خضرا مفرومة ناعم.

– 2 معلقة كبيرة عصير ليمون ، حوالي ½ ليمونة ، وشرايح ليمون للتزيين.

وصفة ارز القرنبيط المتبل
وصفة ارز القرنبيط المتبل

طريقة التحضير:

1- في طاسة كبيرة غير قابلة للالتصاق سخني 2 معلقة من الزيت على نار متوسطة لعالية ، ضيفي القرنبيط المفروم ووزعيه بالمعلقة في طبقة متساوية ، شوحيه في الزيت لمدة 2 – 3 دقايق او لحد ما لونه يتحول للون البني الفاتح من جنب واحد من غير ما تقلبيه (واتأكدي انه مايتحرقش منك) ، قلبي الخليط ووزعيه تاني في الطاسة في طبقة متساوية واطبخيه لمدة 2 – 3 دقايق كمان او لحد ما لونه يتحول للبني شوية من الجنب التاني ، ارفعي الطاسة من على النار وانقلي القرنبيط في طبق على جنب.

وصفة ارز القرنبيط المتبل

2- في نفس الطاسة ضيفي معلقة كبيرة زيت ، وضيفي البصل, الثوم, الهالبينو, الملح ، قلبيهم مع بعض لحد ما البصل يبقى لونه شفاف ويطرى ، لمدة دقيقتين تقريبا ، ضيفي الطماطم, شوربة الفراخ, الكمون, الشطة او البابريكا, قلبيهم مع بعض كويس لحد ما الطماطم تستوى وتطرى ، لمدة 3 دقايق كمان تقريبا ، ضيفي صلصة الطماطم ، ورجعي القرنبيط تاني مع الخليط في الطاسة ، وقلبي كل المكونات مع بعض كويس ، سيبيه على النار لمدة 2 – 3 دقايق كمان ، او لحد ما القرنبيط يستوي ويطرى ، ارفعيه من على النار وضيفي له الكزبرة وعصير الليمون وقلبيهم مع بعض ، وتبليه بالملح حسب الرغبة.

وصفة ارز القرنبيط المتبل

3- قدميه مع شرايح الليمون ورشة كزبرة مفرومة على الوش.

طريقة عمل وصفة السجق المشوي مع البطاطس والسبارجوس في الفرن