فوايد محلول الملح للبشرة..وازاي تستخدميه
محلول الملح او خليط الماية والملح ليه فوايد جمالية كتير جدا للبشرة ، الماية لوحدها بتلعب دور كبير في ترطيب البشرة ، والملح يعتبر مكون مفيد بيساعدد على التقليل من التهابات البشرة ، وبيخلص البشرة من كتير من المشاكل الجلدية اللي ممكن يتعرض لها ، والنهاردة من خلال موضوعنا هنتعرف بالتفصيل على فوايد محلول الملح للبشرة ، وازاي تستخدميه ، وكمان ازاي تعمليه بنفسك في البيت.
فوايد محلول الملح للبشرة:
1- بينضف المسام والبشرة بعمق.
2- بيساعد على التخلص من اثار حب الشباب في وقت سريع.
3- التقليل من تورم واحمرار الوجه.
4- قفل المسامات الواسعة.
5- ازالة خلايا الجلد الميتة.
6- ازالة الرؤوس السودا, البثور من البشرة.
7- علاج الحبوب بشكل فعال.
8- تنضيف البشرة من البكتيريا والاوساخ.
9- بيدي البشرة نضارة وملمس ناعم.
10- بيساعد على تقشير البشرة .
11- بيساعد على تقليل الزيوت الزيادة من البشرة ، وده بيخليه مفيد للبشرة الدهنية بشكل خاص.
12- بيساعد على التئام الجروح والخدوش والندبات على الوجه.
13- بيقلل من التجاعيد والانتفاخات حوالين العين ، والخطوط الرفيعة على الجبين.
14- بيساعد على تنشيط الدورة الدموية في الوجه.
طريقة عمل محلول الملح:
– ملح طعام عادي.
– ماية.
نسبة الملح للماية المفروض تكون من 1 – 9 ، يعني معلقة واحدة ملح لكل 9 معالق ماية.
طريقة تانية لعمل محلول الملح:
– 3 معالق صغيرة ملح.
– 2 كوباية ماية.
– ¼ معلقة صغيرة من صودا الخبز.
حطي الماية في حلة على النار لحد ما تغلي ، ارفعيها من على النار وسيبيها تبرد شوية ، ودوبي فيها الملح وصودا الخبز (الكربوناتو) ، وكده يبقى محلول الملح جاهز عندك للاستخدام.
طريقة استخدام محلول الملح:
اغسلي بشرتك بنوع الغسول المناسب ، ادهني بشرتك بمحلول الملح مع التدليك الخفيف ، سيبيه 10 دقايق على البشرة وبعدها اغسليه بالماية.
تقدري تستخدمي مرة الصبح ومرة بالليل قبل النوم ، او بعد ازالة المكياج
ومحلول الملح كمان متوفر جاهز في اي صيدلية ، تجيبيه وتستخدميه على البشرة على طول بنفس الطريقة اللي احنا قولناها.