مكياج طبيعي للصيف بخطوات سهلة في 5 دقايق بس
استخدام مكياج كتير في الصيف مش احسن حاجة تعمليها ، لانه مع الحر والرطوبة بيسيح ويبوظ بسرعة ، عشان كده افضل حاجة في الصيف انك تعتمدي على اقل مكياج ، وهنا لازم تكثفي روتين العناية ببشرتك عشان تبقى خالية من العيوب ، ومتحتاجيش مكياج كتير تداري بيه عيوب البشرة وتقدري تستغني عن منتجات كتير اضافية ، والنهاردة من خلال السطور الجاية هنشوف مع بعض مكياج طبيعي للصيف بخطوات سهلة وبسيطة وبأقل المنتجات.
مكياج طبيعي للصيف:
1- البرايمر والكونسيلر:
اول خطوة هي البرايمر اللي استخدامه بيكون مهم جدا في الصيف لانه بيثبت المكياج لفترة اطول, بيدار مسام البشرة, وبيساعد على توزيع المكياج بشكل اسهل.
بعد البرايمر استخدمي كونسيلر تحت العيون للهالات السودا, وجنب الانف من الناحيتين, وتحت عضمة الخد, ومنطقة نص الدقن, ومنطقة نص الجبهة ، وادمجيه على البشرة كويس بالبيوتي بلندر.
2- البودر:
تاني خطوة هي البودر عشان تثبتي بيها الكونسيلر ، وزعيها على البشرة باستخدام الفرشة.
3- البرونزر:
البرونزر من اكتر المنتجات المناسبة للصيف ، وزعيه بالفرشة على منطقة عضمتين الخد, الجبهة عند منابت الشعر, والدقن, وخط الفك.
4- البلاشر:
في الخطوة دي هنحط البلاشر على عضمة الخد ، واعتمدي على الالوان الطبيعية زي البينك.
5- رسم الحواجب:
سرحي الحواجب بالفرشة ، واملي الفراغات بقلم الحواجب باللون المناسب للون شعر حواجبك ، وبعد ما تخلصي لرسم نضفي حوالين الحواجب بالكونسيلر وكمان الخطوة دي هتحدد شكل الحاجب وتظهره اكتر.
6- الايشادو:
استخدمي ايشادو بلون واحد طبيعي ، ووزعيه بالفرشة على الجفن العلوي وعلى خط الرموش اللي تحت.
7- الماسكرا:
استخدمي الاول اداة تني الرموش لو متوفرة عندك عشان ترفعي رموشك ، وبعدها حطي طبقة ماسكارا على الرموش العلوية والسفلية.
8- الهايلايتر:
اللمسة الاخيرة حطي الهايلايتر فوق عضمة الخد, فوق الحاجب, نص الانف, على قوس كيوبيد فوق الشفايف, ونص الدقن, على عضمة الحاجب, وفي الزاوية الداخلية للعين.
9- الروج:
اخر خطوة استخدمي روج بالوان طبيعية نيود او بينك.