طريقة عمل العاشوراء ب 4 وصفات مختلفة

ريهام محمود
ريهام محمود
692

العاشوراء من انواع الحلويات المرتبطة بالاحتفال بشهر محرم ، وهو مش بس طبق لذيذ ولكن كمان صحي ومفيد لانه بيحتوي على فيتامينات ومعادن والياف ، والنهاردة من خلال موضوعنا هنتعرف على طريقة عمل العاشوراء بـ 4 وصفات مختلفين على الطريقة المصرية والتركية.

طريقة عمل العاشوراء:

1- الطريقة (1):

المكونات:

¼ كيلو قمح مقشر.

1 كيلو لبن.

½ كوباية كريمة لباني.

كريم شانتية.

1 معلقة صغيرة فانيليا.

3 معلقة كبيرة نشا.

½ كوباية سكر.

مكسرات للتزيين.

طريقة التحضير:

1- اغسلي القمح كويس ، وانقعيه في الماية ليلة كاملة.

2- اغلي القمح في الماية لحد ما يستوي وبعدين صفيه من الماية.

3- في حلة النار حطي اللبن مع الكريمة اللباني لحد ما يغلوا مع بعض.

4- بعدها ضيفي القمح والسكر وقلبيهم كويس مع بعض.

5- دوبي الكريم شانتيه والفانيليا في شوية لبن ، وضيفيهم لباقي المكونات على النار.

6- دوبي النشا في شوية لبن ، وضيفيه للمكونات على النار مع التقليب المستمر لحد ما الخليط يبقى قوامه سميك ارفعيه من على النار.

7- وزعي العاشوراء في اطباق التقديم ، وزيني الوش بالمكسرات.

طريقة عمل العاشوراء 1
طريقة عمل العاشوراء 1

2- الطريقة (2):

المكونات:

¼ كيلو قمح مقشر.

1 كيلو لبن.

1 معلقة كبيرة قشطة.

1 معلقة كبيرة نشا.

1 معلقة صغيرة فانيليا.

سكر حب الرغبة.

جوز هند وزبيب وسوداني للتزيين.

طريقة التحضير:

1- اغسلي القمح وانقعيه في الماية لمدة ليلة كاملة.

2- في حلة على النار حطي ماية وضيفي لها القمح ، وسيبيه لحد ما يستوي.

3- صفي القمح من الماية وسيبيه يبرد ، خدي نص كمية القمح اضربيها في الخلاط لحد ما يبقى ناعم زي المعجون.

4- في حلة على النار حطي اللبن والقمح الناعم والسكر والفانيليا ، ونسيب الخليط يغلي شوية.

5- ضيفي باقي كمية القمح السليم والقشطة وقلبي المكونات كلها مع بعض كويس.

6- دوبي النشا في شوية لبن حوالي معلقتين كبار ، وضيفيه لباقي المكونات على النار مع التقليب السريع لحد ما قوامه يبقى سميك.

7- وزعي العاشوراء في اطباق التقديم ، وزيني الوش بجوز الهند والزبيب والسوداني.

طريقة عمل العاشوراء 2
طريقة عمل العاشوراء 2

3- الطريقة (3):

المكونات:

1 كوباية قمح.

1 كيلو لبن.

2 معلقة كبيرة نشا.

1 معلقة صغيرة ماء ورد.

1 كوباية سكر.

قرفة.

فانيليا.

طريقة التحضير:

1- انقعي القمح ليلة كاملة وبعدها اسلقيه في الماية كويس لحد ما يستوي.

2- سيبيه يبرد شوية وبعدين اضربيه في الخلاط مع شوية من ماية السلق.

3- رجعي الخليط للحلة وحطيه على النار وضيفي له اللبن والسكر وماء الورد والفانيليا وسيبيه لحد ما يغلي.

4- دوبي النشا في شوية ماية ، وضيفيه لباقي المكونات مع التقليب المستمر لحد ما قوامه يبقى سميك.

5- وزعي العاشوراء في اطباق التقديم ، ورشي على الوش قرفة مطحونة.

طريقة عمل العاشوراء 3

4- العاشوراء على الطريقة التركية:

المكونات:

1 ½  كوباية قمح.

1 كوباية فاصوليا بيضا مسلوقة.

1 كوباية حمص مسلوق.

2 معلقة كبيرة ارز.

2 معلقة كبيرة زبيب اسود.

2 معلقة كبيرة زبيب اصفر.

2 معلقة كبيرة اراصيا.

1 كوباية بندق متقشر.

1 كوباية لوز مسلوق ومتقشر.

1 كوباية عين جمل متقطع قطع صغيرة.

1 كوباية تين مجفف ومتقطع قطع صغيرة.

1 كوباية مشمش مجفف ومتقطع قطع صغيرة.

1 معلقة كبيرة قرنفل.

2 كوباية سكر.

½ معلقة صغيرة ملح.

مكسرات وفواكة مجففة ورمان وقرفة مطحونة للتزيين.

طريقة التحضير:

1- اغسلي القمح وانقعيه ليلة كاملة في الماية.

2- في حلة على النار اسلقي القمح في الماية لمدة من ساعتين ل 3 ساعات تقريبا.

3- ضيفي الارز المغسول للقمح المسلوق وقلبيهم مع بعض من وقت للتاني ، لو الماية قلت ضيفي ماية مغلية زيادة ، وسيبي الخليط يغلي مع بعض لمدة نص ساعة كمان.

4- ضيفي للخليط الحمص المسلوق, الفاصوليا المسلوقة, وقلبيهم مع بعض كويس.

5- ضيفي اللوز المتقشر, البندق, المشمش المجفف, التين المجفف, الزبيب الاسود, الزبيب الاصفر, الاراصيا ، قلبي كل المكونات كويس مع بعض.

6- ضيفي السكر للخليط وقلبيهم تاني كويس.

7- زودي كمية تانية من الماية المغلية.

8- هاتي القرنفل حطيه في شوية ماية في كنكة صغيرة على النار وسيبيه لحد ما يغلي.

9- صفي القرنفل واتخلصي من الاعواد وضيفي الماية بتاعته لخليط القمح ، وضيفي لهم الملح وقلبيهم مع بعض.

10- سيبي الخليط يغلي نص ساعة كمان ، بعدها ارفعيه من على النار.

11- صبي الخليط في طبق التقديم ، وسيبيه يبرد شوية ، رشي على الوش قرفة مطحونة ، وزيني الوش حسب الرغبة بالمكسرات والفواكة المجففة والرمان.

طريقة عمل العاشوراء 4

الطريقة بالفيديو:

مقالات متعلقه

طريقة عمل السابليه الناعم بالخطوات

طريقة عمل السابليه الناعم بالخطوات

طريقة عمل البيتي فور للعيد

طريقة عمل البيتي فور للعيد

طريقة عمل بسكويت اللانكشير الابيض والملون للعيد

طريقة عمل بسكويت اللانكشير الابيض والملون للعيد