ليه اكل الوجبات الخفيفة مفيد ليكي صحيا
السناكس او الوجبات الخفيفة اللي بين الوجبات الرئيسية عادة معظمنا مش بيهتم بيها ، ولكن هي في الحقيقة ليها فوايد كتير ، من اول فقدان الوزن للنوم الصحي ، عشان كده بننصحك انك تحطي لنفسك وجبات خفيفة خلال اليوم ، والنهاردة من خلال موضوعنا هنعرف مع بعض على الفوايد الصحية للوجبات الخفيفة.
الفوايد الصحية للوجبات الخفيفة:
1- هتحصلي على فيتامينات اكتر:
اكل الوجبات الخفيفة هتساعدك على دمج عناصر غذائية اضافية لنظامك الغذائي ، لانه صعب انك تحصلي على كل الفيتامينات اللي جسمك محتاجها من 3 وجبات بس في اليوم ، عشان بننصح غالبا باكل الفواكة والخضروات خلال اليوم كوجبات خفيفة ، لان غالبا الاشخاص اللي بيعتمدوا على الوجبات الرئيسية بيفقدوا الفيتامينات الاساسية ، ونتيجة لده هيعانوا من هشاشة وضعف الاظافر وحتى كمان تساقط الشعر.
2- هتبقي اقل عرضة للافراط في الاكل:
الوجبات الرئيسية الفطار والغدا والعشا ممكن ماتكونش كافية لكل الاشخاص ، وهنا الوجبات الخفيفة بتساعد على الشعور بالحيوية والنشاط اكتر ، وبتمنعك في نفس الوقت من الافراط في الاكل او اكل كميات كبيرة ، وتقدري تحددي اوقات وجباتك الخفيفة خلال اليوم وتنظميها مع الوجبات اوقات الوجبات الرئيسية.
3- تعزيز قوة المخ:
المخ بيستخدم الجلوكوز كوقود ، خصوصا وانتي بتعملي مهام صعبة ، والقدرات العقلية بتقل بشكل كبير لما بينخفض مستوى السكر في الدم ، واكل الوجبات الخفيفة زي الشوكولاتة او الجوز هيساعد على تحسين تركيزك الذهني.
4- هتبقي اقل توتر:
لما بتحسي بالاحباط ، جسمك بيفرز الكورتيزول ، وده ممكن يأدي لانخفاض مستويات السكر في الدم ، عشان كده بننصحك لما تحسي بالاحباط ، كلي وجبة خفيفة صحية هتأدي لانتاج السيروتونين (هرمون السعادة).
5- هتمنع قيلولة بعد الضهر:
قيلولة بعد الضهر تعتبر استجابة طبيعية للساعة البيولوجية ، اللي بتخليكي تحسي بالنعاس من الساعة 1 – 3 مساء ، ولكن مع ذلك تقدري تتجنبي قيلولة بعد الضهر دي عن طريق اكل وجبات خفيفة من الفواكة والخضروات ، وممكن الفواكة المجففة والفول السوداني غير المملح تساعدك على التغلب على الرغبة الشديدة في الاكل.
6- هتساعد على تحسين الروابط الاجتماعية بتاعتك:
اكل الوجبات الخفيفة هيكون مفيد بالفعل لو عايزة تكوني صداقات مع شخص تاني ، لان الابحاث اثبتت ان الاكل مع شخص تاني ممكن انه يزود السعادة ويحسن العلاقات ، بالاضافة ان مشاركة وجباتك الخفيفة مع اشخاص تانيين هتساعد على كسر الجليد بينك وبينهم بسهولة وهتوثق العلاقة ، وتخليكي تحسي بالتقدير والاهتمام.
7- هتنامي نوم صحي بالليل:
الاكل قبل النوم مش دايما بيبقى غير صحي ، لانه المهم اكتر هو هتاكلي ايه ، على سبيل المثال اللوز بيحسن جودة النوم لانه بيحتوي على الميلاتونين (الهرمون اللي بيساعد على النوم) ، والاطعمة الغنية بالكالسيوم بتمنع اضطرابات النوم.
بالاضافة ان شرب كوباية لبن سخن او شاي بابونج قبل النوم ممكن انه يساعدك على انقاص الوزن.
