ايه اسباب التقلبات الشديدة في الحالة المزاجية عند النساء؟ وازاي تتعاملي معاها

ريهام محمود
ريهام محمود
في
صحة
559

مافيش بنت او ست مش بتمر في فترة من الفترات بتقلبات مزاجية شديدة جدا ، وده ليه اسباب كتير ، والنهاردة هنتعرف مع بعض بالتفصيل من خلال السطور الجاية على اسباب التقلبات المزاجية عند النساء ، وازاي تتعاملي معاها.

ايه هو تقلب المزاج:

لو حسيتي في وسط ما انتي مبسوطة بتغير فجأة في المزاج ولقيتي نفسك متضايقة او محبطة ، في الحالة دي انتي بتمري بتغيير في الحالة المزاجية ، وممكن يبان ان التغيرات المفاجئة والدراماتيكية دي في المشاعر وكأنها من غير سبب ، لكن مع ذلك في بعض الاسباب الشائعة اللي ممكن تبقى مسؤولة عن ده.

اسباب التقلبات المزاجية عند النساء:

التقلبات المفاجئة في المزاج دي ممكن يبقى ليها اسباب كتير ومنها:

1- متلازمة ما قبل الدورة الشهرية:

متلازمة ما قبل الدورة الشهرية (PMS) هي مجموعة من الاعراض اللي بتحصل عند النساء قبل اسبوع او اسبوعين من الدورة الشهرية ، وبالاضافة للتقلبات المزاجية ، الدورة الشهرية هتسبب لك التعب ، تغييرات الشهية ، الاكتئاب ، الانتفاخ ، واكتر كمان من كده ، وتقريبا 90% من النساء بيتعرضوا لمتلازمة ما قبل الدورة الشهرية ، وممكن الاعراض دي تتغير من شهر للتاني ، وممكن تبقى اسوأ او تتحسن مع التقدم في العمر.

ومافيش سبب واضح لحدوث التغيرات والاعراض دي قبل الدورة الشهرية ، ولكن الباحثين بيعتقدوا ان التحولات في هرمون الاستروجين هي المسؤولة في الغالب عن التقلبات المزاجية دي في الايام والاسابيع اللي قبل الدورة الشهرية ، وفي الفترة دي بترتفع وبتنخفض مستويات هرمون الاستروجين عند المرأة بشكل كبير جدا ، والحالة دي بتستقر بعد يوم او اتنين من بداية الدورة الشهرية.

2- الاضطراب المزعج السابق للدورة الشهرية:

 الاضطراب المزعج السايق للدورة الشهرية (PMDD) هو نوع نادر واكتر حده من متلازمة ما قبل الدورة الشهرية اللي قولناها في النقطة اللي فاتت ، والاضطراب المزعج السابق للدورة الشهرية بيأثر على حوالي 5% من النساء في سن الانجاب ، واعراض الاضطراب المزعج السابق للدورة الشهرية بيشمل التغيرات الشديدة في المزاج ، الاكتئاب الشديد ، التهيج الشديد ، واكتر من كده.

ونادرا لما يبقى تغيير نمط الحياة لوحده كافي لعلاج الاضطراب المزعج السابق للدورة الشهرية ، ممكن تجمعي ما بين بعض العلاجات البديلة زي ادارة الاجهاد والتغييرات الغذائية ، والادوية اللي بتساعد على تخفيف الاعراض بما فيها التقلبات الشديدة في المزاج.

3- الاجهاد:

التوتر والقلق بيأثروا على جسمك وصحتك بطرق مختلفة غير صحية ، ومنها مزاجك ، الاحباط والقلق والتوتر المستمر ممكن يأدي لتغيرات حادة في المزاج بالاضافة لمشكلات نفسية تانية.

4- اسباب نفسية:

الاضطرابات النفسية والحالات السلوكية ممكن تأثر على تصرفاتك وتسبب اعراض زي تقلبات المزاج ، والاضطرابات دي بتشمل اضطراب نقص الانتباه, فرط النشاط, الاكتئاب, الاضطراب ثنائي القطب وغيرها ، وممكن علاج الحالات دي ممكن انه يخفف من اعراض التقلبات المزاجية الشديدة واي اعراض تانية ممكن تكوني بتعاني منها.

اسباب التقلبات المزاجية عند النساء 1
اسباب التقلبات المزاجية عند النساء 1

5- الاختلالات الهرمونية:

الاستروجين ممكن انه يلعب دور في التحولات المزاجية المرتبطة بمتلازمة ما قبل الدورة الشهرية ، ولكن الهرمونات التانية اللي في الجسم ممكن تأثر هي كمان على الحالة المزاجية ، كمان قصور الغدة الدرقية وهي حالة بتخلي الغدة الدرقية ماتنتجش هرمونات كفاية ، وده اضطراب هرموني شائع ، ممكن يأثر على الحالة المزاجية ويسبب اعراض تانية.

6- البلوغ:

فترة البلوغ بتكون هي فترة التغيرات العاطفية والجسدية والنفسية في حياة الطفل ، وممكن تبقى تقلبات الحالة المزاجية وردود الفعل العاطفية غير المبررة شائعة جدا خلال المرحلة دي من الحياة.

7- الحمل:

التغيرات في مستويات الهرمونات اثناء فترة الحمل ممكن انها تأدي لتغيرات في المشاعر والمزاج ، بالاضافة ، ان معظم النساء الحوامل بيعانوا من تغييرات جسدية وضغوط عاطفية ممكن تخلي مشاكل زي تقلبات المزاج اكتر حدة.

8- سن اليأس:

في تحول رئيسي تاني في الحياة ، وهو انقطاع الدورة الشهرية ، والوقت ده بيكون مرتبط بالتقلبات المزاجية ، بسبب انخفاض مستويات هرمون الاستروجين ، وكتير من النساء بيعانوا من مجموعة متنوعة من الاعراض ، بما فيها التغيرات في المزاج, الهبات السخنة, الارق, انخفاض الدافع الجنسي ، وطبيا بيكون في علاجات وادوية بديلة للهرمونات عشان تساعد في تسهيل مرحلة انخفاض هرمون الاستروجين.

اسباب التقلبات المزاجية عند النساء 2
اسباب التقلبات المزاجية عند النساء 2

ازاي تتعاملي مع التغيرات الشديدة في المزاج:

ممكن انك تحققي الاستقرار في مزاجك وتحسني صحتك لتجنب التغيرات المستقبلية في المزاج والعواطف ، وعلاجات تغيير الحالة المزاجية بتركز على اسلوب الحياة او العلاجات البديلة اللي ممكن تجربيها في اليت بنفسك ، وممكن تستخدم احيانا علاجات تانية زي الادوية من الدكاترة المتخصصين.

1- ممارسة التمارين الرياضية بانتظام:

الحركة والتمارين الرياضية تعتبر مفيدة جدا لصحتك الجسدية والعقلية ، واللي ممكن تساعدك كمان في علاج او تجنب تقلبات الحالة المزاجية ، لانه عند ممارسة الرياضة جسمك بينتج هرمونات جيدة والاندروفين اللي بيساعد على تخفيف التوتر وتحسين الحالة المزاجية ، حاولي تمارسي 30 دقيقة من التمارين المعتدلة 5 ايام في الاسبوع.

2- اتجنبي الكافيين, والسكر:

الكافيين والسكريات ممكن تأثر على حالتك الطبيعية وتخلي تقلبات المزاج اسوأ او تكون هي السبب الرئيسي فيها ، الكافيين ممكن يخليكي تحسي بارهاق اقل ولكن ممكن انه يأدي لزيادة القلق والعصبية.

الاطعمة السكرية بالرغم ان طعمها لذيذ ، الا انها ممكن تسبب تقلبات في مستوى السكر في الدم ، والتقلبات دي ممكن تسبب تغييرات في المزاج واعراض تانية ، عشان كده بننصحك تقللي على قد ما تقدري من الكافيين والاطعمة السكرية عشان تحافظي على حالتك المزاجية مستقرة.

3- جربي مكملات الكالسيوم:

اثبتت الدراسات ان مكملات الكالسيوم ممكن انها تساعد في تخفيف اعراض الاكتئاب والقلق والتقلب العاطفي من متلازمة ما قبل الدورة الشهرية ، ومكملات الكالسيوم بالاضافة انها بتساعد في تغيير الحالة المزاجية ، هي كمان بتساعد على حماية العضم من مشكلة هشاشة العظام ، وده مهم بشكل خاص للنساء في فترة ما قبل سن اليأس ، ممكن تستشيري الدكتور بتاعك عن المكمل الغذائي المناسب ليكي.

اسباب التقلبات المزاجية عند النساء 3

4- غيري نظامك الغذائي:

اكل 3 وجبات كبيرة في اليوم ممكن يكون موضوع تقليدي او عادي ،  ولكن اكل وجبات اصغر ممكن يكون افضل لاستقرار الحالة المزاجية ، وده لان تحولات السكر في الدم بعد الوجبات الكبيرة ممكن تساهم في التحولات العاطفية ، والوجبات الصغيرة المتقسمة على مدار اليوم ممكن انها تساعد على استقرار نسبة السكر في الدم للحفاظ على التغيرات الشديدة في المزاج بعيد عنك.

5- اتدربي على ادارة الاجهاد:

التوتر والقلق ممكن يسبب لك اعراض كتير ، بما فيهم متلازمة ما قبل الدورة الشهرية ، عشان كده التدريب او تعلم ادارة التوتر ممكن انه يساعدك على تجنب المضاعفات ، بما فيها التغيرات في الحالة المزاجية ، وثبت ان التأمل والتنفس العميق واليوجا بتساعد في ادارة التوتر بشكل كبير ، العلاج بالمساج كمان او العلاج بالكلام ممكن يكون مفيد جدا.

6- نامي بشكل افضل:

النوم الجيد بالليل ممكن انه يعالج كتير من الامراض ، بما فيها التهيج والتغيرات الشديدة في الحالة المزاجية ، ضروري تنامي من 7 – 8 ساعات كل يوم ، ولو بيكون صعب عليكي النوم بسرعة ، حاولي تدخلي تنامي قبل ميعاد نومك الاساسي ب 30 دقيقة تتقلبي فيهم لحد ما تنامي في ميعادك الطبيعي ، بعد ما تعملي ده ممكن بعد كده تضيفي 30 دقيقة كمان لنومك ، بالطريقة دي هتضيفي عدد ساعات نوم اضافية بطريقة صحية ومفيدة.

اسباب التقلبات المزاجية عند النساء 4

امتى تشوفي الدكتور:

التغيرات الحادة في المزاج بتحصل من وقت للتاني ، سواء ده بسبب فترة الدورة الشهرية او زيادة الضغط في الشغل ، او غيرها من الاسباب اللي ممكن تأدي لتقلبات المزاج ، ولكن الاعتماد على طريقة صحية للتعامل معاها ممكن انه يساعد على تقليل مخاطر التغيرات المزاجية في المستقبل.

فلو حسيتي ان تقلباتك المزاجية بتتعارض مع يومك او بتسبب لك مشاكل ، في الحالة دي ممكن تتكلمي مع دكتور متخصص ، وغالبا كتير من الاسباب اللي بتأدي للتغيرات المزاجية بيكون سهل تشخيصها وعلاجها ، وبعضها ممكن يحتاج علاج اضافي زي الادوية الموصوفة من المتخصصين.

اسباب التقلبات المزاجية عند النساء 5

6 تمارين ممكن تعمليهم قبل ما تقومي من السرير لتنشيط الجسم وتحسين المود

تمارين تعمليهم قبل ما تقومي من السرير
تمارين تعمليهم قبل ما تقومي من السرير

مقالات متعلقه

ايه اللي هيحصل لو حطيتي ليمونة جنب سريرك كل يوم!

ايه اللي هيحصل لو حطيتي ليمونة جنب سريرك كل يوم!

10 حيل رائعة للجسم هتغير حياتك

10 حيل رائعة للجسم هتغير حياتك

طرق طبيعية لزيادة هرمون الانوثة في الجسم

طرق طبيعية لزيادة هرمون الانوثة في الجسم