الذ وصفات فراخ مقلية Fried Chicken من دول العالم

ريهام محمود
ريهام محمود
في
مطبخ
930

لو انتي من عشاق الفراخ المقلية او الكنتاكي ، نحب نقولك ان في طرق تانية للفراخ المقلية غير الكنتاكي وطعمها مختلف ولذيذ جدا ، والنهاردة من خلال موضوعنا هنشارك معاكم 3 وصفات فراخ مقلية Fried Chicken من دول العالم.

وصفات فراخ مقلية Fried Chicken:

1- الفراخ المقلية على الطريقة اليابانية:

المكونات:

– ½ كيلو اوراك فراخ.

– فص ثوم مفروم.

– قطعة صغيرة جنزبيل فريش مبشورة (2 معلقة صغيرة).

– 3 – 4 معالق كبيرة صويا صوص.

– ½ معلقة صغيرة فلفل اسود.

للقلي:

– نشا مع اضافة ماية لحد ما يوصل للقوام المناسب.

– ضيفي للتبيلة على الفراخ بيضة واحدة + معلقة كبيرة دقيق.

طريقة التحضير:

1- نتبل الفراخ بالزنجبيل المبشور والثوم المفروم والصويا صوص.

2- نقلب كل المكونات مع بعض كويس ، ونغطيها ونسيبها في التتبيلة على قد ما نقدر في التلاجة ، ممكن لحد ليلة كاملة ، او على الاقل ساعتين قبل القلي.

3- نحضر الخليط اللي هنغطي بيه الفراخ للقلي ، هنخلط كمية من النشا مع الماية بالتدريج بحيث القوام يكون عبارة عن تكتلات او كور صغيرة مش سايل.

4- هنخرج الفراخ من التلاجة ، وهنضيف لها البيض والدقيق ونقلبهم مع بعض كويس.

5- هناخد من قطع الفراخ ونغطيها كويس بخليط النشا والماية.

6- اقلي قطع الفراخ في زيت سخن بدرجة حرارة 160 او 170 تقريبا على نار متوسطة لحد ما لونها يبقى دهبي.

7- نطلعها من الزيت على سلك او ورق مطبخ عشان نتخلص من الزيت الزيادة ، ونقدمها.

وصفات فراخ مقلية Fried Chicken 1
وصفات فراخ مقلية Fried Chicken 1

2- الفراخ المقلية على الطريقة البرازيلية:

المكونات:

– ½ كيلو اوراك فراخ.

– ملح وفلفل اسود.

– 3 – 4 ليمونات.

– 5 فصوص ثوم (وممكن تزودي او تقللي الثوم حسب الرغبة).

للقلي:

دقيق مضاف ليه توابل (ملح, فلفل اسود, بابريكا, زعتر).

طريقة التحضير:

1- نتبل الفراخ بالملح والفلفل الاسود وعصير الليمون والثوم المفروم.

2- نقلب المكونات كلها كويس ونغطيها ونسيبها في التتبيلة ليلة كاملة.

3- هنتبل الدقيق بالتوابل ، ونغمس قطع الفراخ بالدقيق ونغطيها كويس من كل الجوانب وننفضها عشان نتخلص من الدقيق الزيادة.

4- اقليها في زيت سخن على درجة حرارة متوسطة ، لحد ما لونها يبقى دهبي.

5- والطريقة دي من الفراخ بيتقدم معاها ثوم محمص ،  قطعي الثوم شرايح رفيعة زي الشيبسي وحمريها في الزيت لحد ما لونها يبقى دهبي ورشيها فوق الفراخ عند التقديم.

وصفات فراخ مقلية Fried Chicken 2
وصفات فراخ مقلية Fried Chicken 2

3- الفراخ المقلية على الطريقة الامريكية:

المكونات:

– ½ كيلو اوراك فراخ.

– ملح وفلفل اسود.

– 1 ½ كوباية لبن رايب او Buttermilk.

– 2 بيضة.

– 3 معالق كبيرة صوص حار.

– 2 معلقة كبيرة من ماية مخلل الخيار.

للقلي:

دقيق متبل بالملح والفلفل.

الزيت الحار:

شوية زيت من المستخدم في القلي + توابل (شطة, بابريكا مدخنة, سكر بني, بودرة ثوم, ملح, فلفل اسود).

طريقة التحضير:

1- حطي الفراخ على شبكة جوه صينية وتبليها بالملح والفلفل من كل الجوانب وسيبيها في التلاجة طول الليل.

2- هنحضر خليط التغميس ، في طبق كبير اخلطي اللبن الرايب مع البيض والصوص الحار وماية المخلل وقلبيهم كويس مع بعض.

3- في طبق تاني حطي الدقيق وتبليه بالملح والفلفل الاسود.

4- طلعي الفراخ من التلاجة ، غطيها بالدقيق ، وبعدين غمسيها في خليط اللبن الرايب ، وبعدين غطيها بالدقيق مرة كمان ونفضيها عشان تتخلصي من اي دقيق زيادة.

5- اقليها في زيت سخن على درجة حرارة متوسطة لحد ما لونها يبقى دهبي ، طلعيها من الزيت.

6- حضري الزيت الحار ، اخلطي شوية من زيت القلي وهو سخن مع التوابل وقلبيهم كويس مع بعض ، وادهني بيه الفراخ وقدميها.

وصفات فراخ مقلية fried chicken 3

الطرق بالفيديو:

مقالات متعلقه

وصفة يخنة الفراخ مع السجق الاسبانية السهلة

وصفة يخنة الفراخ مع السجق الاسبانية السهلة

طريقة عمل سوفلاكي الفراخ اليوناني مع صوص تزاتزيكي

طريقة عمل سوفلاكي الفراخ اليوناني مع صوص تزاتزيكي

وصفة القرنبيط الكرسبي في الفرن مع الصوص الحار

وصفة القرنبيط الكرسبي في الفرن مع الصوص الحار