4 وصفات بالدوريتوس لذيذة وسهلة

ريهام محمود
ريهام محمود
1821

الدوريتوس من انواع المسليات والمقرمشات اللي كتير مننا بيحبها ، لو انتي من عشاق الدوريتوس تقدري تاكليه بطرق مختلفة وتدخليه في وصفات ، والنهاردة هنشارك معاكم 4 وصفات بالدوريتوس لذيذة وسهلة.

وصفات بالدوريتوس:

1- صوابع الجبنة بالدوريتوس:

المكونات:

– 2 كوباية دوريتوس.

– 450 جرام صوابع جبنة.

– 4 بيضات.

– 2 كوباية دقيق.

– 1 معلقة صغيرة ملح.

– 1 معلقة صغيرة فلفل اسود.

– زيت للتحمير.

طريقة التحضير:

1- في طاسة كبيرة حطي زيت غزير وسخنيه على النار.

2- اثناء ما الزيت بيسخن اطحني الدوريتوس في مطحنة الخلاط لحد ما يبقى فتافيت صغيرة مش ناعم اوي ، وانقليه في طبق كبير على جنب.

3- في طبقين تانين حطي البيض والدقيق كل واحد في طبق ، واخلطي الملح والفلفل الاسود مع الدقيق.

4- اغمسي صوابع الجبنة في الدقيق ونفضيها عشان تتخلصي من اي دقيق زيادة ، وبعدين اغمسيها في البيض ، وكرري الخطوة دي تاني.

5- بعد ما تغمسي صوابع الجبنة المرة التانية ، غطيها بالدوريتوس المفروم.

6- رصيها عى صينية او ورق خبز جنبك لحد ما تخلصي كمية الجبنة كلها.

7- حمري صوابع الجبنة في الزيت لحد ما يبقى لونها بني دهبي ، حوالي من 2 – 3 دقايق.

8- طلعي صوابع الجبنة من الزيت على ورق مطبخ عشان تمتص الزيوت الزيادة.

9- ممكن تاكليها مع اي نوع صوص تفضليه.

وصفات بالدوريتوس 1
وصفات بالدوريتوس 1

2- برجر الدوريتوس:

المكونات:

– 1 كوباية دوريتوس اي نكهة تفضليها.

– 450 جرام لحمة مفرومة.

– 1 بيضة.

– 2 معلقة صغيرة ملح.

– 2 معلقة صغيرة فلفل اسود.

– 60 جرام جبنة شيدر ، متقطعة مكعبات.

– 60 جرام اي نوع جبنة بيضا بالفلفل ناشفة ، متقطعة مكعبات.

– 2 معلقة كبيرة زيت نباتي.

الاضافات على البرجر:

– شرايح طماطم.

– شرايح بصل.

– مخلل خيار.

– خس.

– كاتشاب.

– مسطردة.

طريقة التحضير:

1- اطحني الدوريتوس في مطحنة الخلاط لحد ما يبقى فتافيت صغيرة مش ناعم اوي ، وانقليه في طبق كبير على جنب.

2- سخني الفرن على درجة حرارة 180 ردجة مئوية.

3- في طبق كبير اخلطي اللحمة المفرومة, البيض, الملح, الفلفل الاسود, و ½ كوباية من الدوريتوس المطحون ، اخلطي كل المكونات مع بعض كويس.

4- شكلي الخليط زي البرجر بحجم كبير ، وفي النص حطي 4 مكعبات جبنة من النوعين وممكن تستخدمي نوع واحد حسب المتوفر ، واقفلي واحدة البرجر على الجبنة واضغطي عليها وساويها.

5- غطي البرجر بباقي كمية الدوريتوس.

6- في طاسه سخني الزيت النباتي على حرارة متوسطة ، وحمري البرجر على الناحيتين لحد ما يبقى لونه دهبي.

7- شيلي البرجر من الطاسه وحطيه على صينيه على ورق زبدة ، ودخليه الفرن 10 دقايق.

8- طلعي البرجر من الفرن ، وابدأي اعملي الساندوتش حطي البرجر مع الاضافات.

وصفات بالدوريتوس 2
وصفات بالدوريتوس 2

3- حلقات البصل بالدوريتوس:

المكونات:

– 2 حبة بصل اصفر كبيرة ، متقطعة حلقات.

– 3 بيضات مخفوقين.

– 2 كوباية دقيق.

– 2 كوباية دوريتوس اي نكهة تفضليها.

طريقة التحضير:

1- اطحني الدوريتوس في مطحنة الخلاط لحد ما يبقى فتافيت صغيرة مش ناعم اوي ، وانقليه في طبق كبير على جنب.

2- سخني الفرن على درجة حرارة 180 درجة مئوية.

3- في طبقين حطي الدقيق والبيض.

4- اغمسي حلقات البصل في الدقيق ونفضيها عشان تتخلصي من الدقيق الزيادة.

5- اغمسي حلقات البصل في البيض ، وبعدين في الدوريتوس المطحون.

6- رصي حلقات البصل على صينية على ورق زبدة ، ودخليه الفرن لمدة من 15 – 20 دقيقة لحد ما لونه يبقى بني دهبي.

7- تقدري تاكليه مع الكاتشاب او مع اي صوص تفضليه.

وصفات بالدوريتوس 3

4- تاكو الدوريتوس:

المكونات:

– 4 كوبايات دوريتوس مطحونة بنكهة الجبنة الناتشو.

– 450 جرام لحمة مفرومة.

– 28 جرام من مزيج توابل التاكو او اي نوع توابل تفضلوها.

– 2/3 كوباية ماية.

– 1 حبة فلفل احمر متقطعة مكعبات.

– 2 ½ كوباية صلصة او تاكو صوص.

– علبة ذرة متصفية ، حوالي 430 جرام.

– 2 كوباية جبنة شيدر مبشورة.

طريقة التحضير:

1- سخني الفرن على درجة حرارة 180 درجة مئوية ، هاتي صينية وادهنيها زيت وسيبيها على جنب.

2- في طاسة كبيرة سوي اللحمة المفرومة على نار متوسطة لحد ما يختفي اللون الوردي بتاع اللحمة ، حوالي من 5 – 7 دقايق ، وضيفي لها مزيج التوابل, الماية, الفلفل الاحمر ، وسيبيها على نار خفيفة لحد ما الخليط يبقى سميك ، حوالي من 3 – 4 دقايق ، مع التقليب المستمر ، وبعدين ضيفي لها الصلصة والذرة.

3- حطي نص كمية الدوريتوس المطحون في الصينية ، وبعدين نص كمية الجبنة الشيدر ، وفوقيها وزعي خليط اللحمة المفرومة.

4- دخليها الفرن من غير غطا ، لمدة من 25 – 30 دقيقة.

5- خرجيها من الفرن ورشي على الوش باقي كمية الدوريتوس والجبنة ، دخليها الفرن تاني لمدة 5 دقايق كمان ، او لحد ما الجبنة تدوب.

6- وكده تاكو الدوريتوس يبقى جاهز للاكل.

وصفات بالدوريتوس 4

مقالات متعلقه

الشتاء هو موسم البطاطا.. اعرفي إزاي تعملي بطاطا مشوية في البيت من غير ولا غلطة

الشتاء هو موسم البطاطا.. اعرفي إزاي تعملي بطاطا مشوية في البيت من غير ولا غلطة

عمرك كلتي بطاطس بس بطيخ؟! .. اعرفي معانا وصفة بطاطس البطيخ مع صوص المارشملو

عمرك كلتي بطاطس بس بطيخ؟! .. اعرفي معانا وصفة بطاطس البطيخ مع صوص المارشملو

طريقة عمل وصفة حلقات البطاطس بالثوم المقلية

طريقة عمل وصفة حلقات البطاطس بالثوم المقلية