طرق مختلفة لعمل تتبيلة الفراخ

ريهام محمود
ريهام محمود
في
مطبخ
683

في رمضان عادة بنحتاج نبقى محضرين اكلات في الفريزر عشان توفر علينا الوقت ، وطول السنة عموما توفيرا للوقت والمجهود الافضل تبقى في حاجات جاهزة دايما نطلعها ونطبخها على طول ، والنهاردة بنات حوا هتساعدك في المهمة دي وهنعرف مع بعض طرق لتتبيلة الفراخ ، تتبليها وتشيليها في الفريزر وتطلعيها على الطبخ على طول.

طرق لتتبيلة الفراخ:

1- تتبيلة تندوري:

المكونات:

زيت ذرة.

عصير ليمون.

2 معلقة كبيرة زبادي.

توابل: كمون, كزبرة, كركم, ملح, جرام ماسالا او توابل فراخ, فلفل احمر حار.

2 فص ثوم مفروم ناعم.

معلقة جنزبيل مفروم ناعم.

لون طعام احمر لزيادة اللون (اختياري).

الطريقة:

في طبق كبير اخلطي المكونات كلها مع بعض كويس ، وتبلي بيها الفراخ ، ورصيها في طبق واحفظيها في الفريزر لوقت الطبخ.

طرق لتتبيلة الفراخ 1
طرق لتتبيلة الفراخ 1

2- تتبيلة يوناني:

المكونات:

عصير ليمون.

2 معلقة كبيرة زبادي.

معلقة صغيرة ثوم مفروم.

اعشاب مجففة: زعتر, روزماري, ملح, فلفل اسود.

معلقة زيت زيتون.

الطريقة:

اخلطي كل المكونات مع بعض وتبلي بيها الفراخ ، واحفظيها في الفريزر.

طرق لتتبيلة الفراخ 2
طرق لتتبيلة الفراخ 2

3- تتبيلة تشيكن تيندر:

المكونات:

التوابل: ملح, فلفل اسود, ثوم بودر, بصل بودر, بابريكا, شطة, خردل بودر.

2 كوباية دقيق.

3 بيضات.

كورن فليكس (او بقسماط مطحون).

الطريقة:

تبلي الفراخ بنص خليط التوابل ، وبعدها اغمسيها في الدقيق المضاف ليه باقي خليط التوابل وبعدين البيض وبعدها الكورن فليكس او البقسماط ، ورصيها في طبق واحفظيها في الفريزر.

طرق لتتبيلة الفراخ 3
طرق لتتبيلة الفراخ 3

4- تتبيلة البانية:

المكونات:

بصلة مفرومة.

معلقة كبيرة خل.

معلقة كبيرة عصير ليمون.

معلقة زبادي.

التوابل: ملح, فلفل اسود, زعتر, بابريكا.

2 كوباية دقيق.

3 بيضات.

بقسماط.

الطريقة:

في طبق كبير اخلطي البصل مع ازبادي والخل وعصير الليمون ، تبلي قطع الفراخ بالخليط ، بعدها غطيها بالدقيق والبيض والبقسماط متبل بنفس خليط التوابل اللي تبلنا بيها الفراخ ، رصيها في طبق واحفظيها في الفريزر.

طرق لتتبيلة الفراخ 4
طرق لتتبيلة الفراخ 4

5- تتبيلة شاورما:

المكونات:

2 معلقة كبيرة زبادي.

معلقة زيت زيتون.

دبس رمان.

ثوم مفروم ناعم.

معجون طماطم مركز (صلصة طماطم).

معلقة خل.

معلقة عصير ليمون.

معلقة صويا صوص.

التوابل: فلفل اسود, زعتر مجفف, ثوم بودر, بصل بودر, جنزبيل بودر, بابريكا, فلفل حار, قرفة, كاري, كركم, ملح ليمون.

الطريقة:

اخلطي كل المكونات مع بعض في طبق كبير وتبلي بيها الفراخ ، وحطيها في طبق واحفظيها في الفريزر.

طرق لتتبيلة الفراخ 5
طرق لتتبيلة الفراخ 5

6- تتبيلة باربيكيو:

المكونات:

ثوم مفروم ناعم.

جنزبيل مفروم ناعم.

خردل (مسطردة).

3 معالق كبيرة صوص باربيكيو.

2 معلقة كبيرة صويا صوص.

معلقة كبيرة عسل.

معلقة كبيرة خل.

الطريقة:

اخلطي المكونات كلها مع بعض كويس وتبلي بيها الفراخ ، ورصيها في طبق واحفظيها في الفريزر.

طرق لتتبيلة الفراخ 6

7- تتبيلة تكا:

المكونات:

فلفل الوان متقطع.

بصل متقطع.

التوابل: كاري, كركم, كزبرة, شطة.

عصير ليمون,

رشة ملح.

معلقة زبادي (اختياري).

الطريقة:

في طبق اخلطي خليط التوابل مع عصير الليمون والملح والزبادي ، تبلي الفراخ بالخليط ، حطي قطع الفراخ في اسياخ خضب وبينهم قطع الفلفل الالوان والبصل ، ورصيها في طبق واحفظيها في الفريزر.

طرق لتتبيلة الفراخ 7

8- تتبيلة تشيكن رولز:

المكونات:

ملح.

فلفل اسود.

خردل ( مسطردة).

جبنة موتزاريلا.

الطريقة:

هاتي قطعة فراخ كبيرة دقيها شوية عشان تتفرد ، تبليها بالملح والفلفل وادهنيها بالمسطردة ، وبعدين هاتي كمية من الجبنة الموتزاريلا على حسب حجم قطعة الفراخ حطيها جواها ولفيها على شكل رول باستخدام كيس بلاستيك ، بعد ما تتلف كلها اقفلي الكيس من الناحيتين ، واضغطيها كويس ، اعملي كل قطع الفراخ اللي عندك بنفس الطريقة ، ورصيها في طبق واحفظيها في الفريزر ، وقت الطبخ ممكن تتحمر في زيت على طول ، او تتغطي بدقيق وبيض وبقسماط وبعدين تتحمر.

طرق لتتبيلة الفراخ 8

9- تتبيلة كفتة:

المكونات:

بصلة مفرومة متصفي منها المية.

بقدونس.

2 فص ثوم مفروم ناعم.

ملح.

فلفل اسود.

خليط السبع بهارات.

بقسماط.

الطريقة:

في طبق كبير حطي الفراخ المفرومة وضيفي عليها كل المكونات وقلبيهم مع بعض كويس ، وشكلي الكفتة صوابع , رصيها على صينية ودخليها الفريزر تجمد وبعدين طلعيها وحطيها في كيس الحفظ واحفظيها في الفريزر لوقت الطبخ.

طرق لتتبيلة الفراخ 9

الطرق بالفيديو:

طريقة عمل بطاطس الرانش بالجبنة الشيدر بالمقادير والخطوات

طريقة عمل بطاطس الرانش بالجبنة الشيدر بالمقادير والخطوات
طريقة عمل بطاطس الرانش بالجبنة الشيدر بالمقادير والخطوات

مقالات متعلقه

وصفة شوربة الفاصوليا البيضا

وصفة شوربة الفاصوليا البيضا

طريقة عمل الفلفل المحشي باللحمة المفرومة على الطريقة الايطالية

طريقة عمل الفلفل المحشي باللحمة المفرومة على الطريقة الايطالية

طريقة عمل الزبادي في البيت

طريقة عمل الزبادي في البيت