8 نصايح هتساعدك تختاري الجينز المناسب من غير ما تقيسيه

ريهام محمود
ريهام محمود
896

البنطلون الجينز هو قطعة اساسية في دولابنا كلنا ، وفي الغالب بيكون عندنا اكتر من واحد بالوان وستايلات مختلفة ، وعلى الرغم انه من القطع اللي بيكون سهل الحصول عليها ، الا انه ما زال صعب اختيار الجينز المناسب ، لان ممكن يفقد شكله بسهولة او يوسع اوي او يبقى ضيق زيادة ، عشان كده احنا النهاردة من خلال موضوعنا هنشارك معاكم 8 نصايح لاختيار الجينز المناسب وحتى من غير ما تقيسيه.

نصايح لاختيار الجينز المناسب:

1- قياس محيط الخصر من السرة للعمود الفقري:

لو عايزة تعرفي مقاس الجينز مناسب ليكي ولا لا ، مش ضروري تقفي في طابور طويل قدام غرفة القياس ، كل اللي هتعمليه زرري البنطلون وحطيه على محيط الخصر من السرة للعمود الفقري ، لو الجينز مغطي المسافة دي بالكامل ، فده هيبقى مقاسك المظبوط ، والطريقة دي بتكون صح مع معظم اشكال الجسم.

نصايح لاختيار الجينز المناسب 1
نصايح لاختيار الجينز المناسب 1

2- القياس بالكتفين:

انتي تقدري تعرفي اذا كان الجينز مناسب لمنطقة الوركين من غير ما حتى تقيسيه ، وعشان تعملي ده ، دوري على اوسع جزء من الجينز في منطقة الوركين وحطيه على الكتفين من الجزء ده ، لو الجينز اعرض شوية من الكتف ده هيناسبك بالظبط.

لو الجينز اضيق او اعرض كتير عن الكتفين ، ده معناه انه مش مقاسك ، هيكون الجينز ضيق جدا او العكس واسع اوي ، والطريقة دي مناسبة جدا للاشخاص اللي كتافهم ومنطقة الورك عندهم قد بعض ، اما بالنسبة للاشخاص اللي اكتافهم اضيق من الوركين او العكس ، الطريقة دي ممكن تكون مش مناسبة ليهم.

نصايح لاختيار الجينز المناسب 2
نصايح لاختيار الجينز المناسب 2

3- خامة الجينز:

كتير من الاشخاص بيدوروا على الجينز المصنوع من القطن ،  الا ان الجينز المصنوع من القطن بنسبة 100% مش هيدوم معاكي فترة طويلة ، بمجرد ما تقعدي شوية بيه هيفقد شكله وهيتمدد ، وده السبب ان خامة الجينز المفروض تحتوي على الايلاستين.

وعادة الكمية المناسبة من الايلاستين هي 2% – 3% للجينز الكلاسيك و 10% من الايلاستين او الليكرا للجينز الضيق ، غير كده الجينز هيتمدد من عند الركبتين وهيترهل من منطقة الوركين ، والغسيل مش هيرجع له شكله الاصلي.

نصايح لاختيار الجينز المناسب 3
نصايح لاختيار الجينز المناسب 3

4- خيوط الجينز:

عادة الخيوط بتكون متوجهة بشكل قطري او مايل ناحية اليمين ، وفي كمان اللي بتكون اتجاه الشمال ودي بتكون الافضل ، لان في الحالة دي الخيوط بتكون قريبة من بعض وبتتقارب مع بعض في وسط الرجل ، وده هيمنع الرجل من الالتواء اثناء المشي.

نصايح لاختيار الجينز المناسب 4
نصايح لاختيار الجينز المناسب 4

5- الوسط:

عند اختيار الجينز ممكن يكون صعب تحديد الحجم المناسب لوسطك ، في طريقة بسيطة اوي تقدري تعمليها وانتي بتقسيه هتساعدك في الاختيار ، لو قدرتي تحطي صوباع او صوباعين بشكل مريح خلف محيط الخصر في الجينز ، ده معناه ان ده الحجم المثالي ليكي ، اما لو قدرتي تحطي كف ايدك كله في المساحة دي ، ده معناه ان الجينز كبير جدا بالنسبة لك ، ولو ماقدرتيش تحطي حتى صوابعك خلف محيط الخصر ، الافضل ماتشتريش الجينز ده ، لانه هيبقى صغير اوي وهيضغط على منطقة البطن وانتي لابساه.

نصايح لاختيار الجينز المناسب 5
نصايح لاختيار الجينز المناسب 5

6- الشوز:

لما تيجي تختاري الجينز البسي الشوز اللي انتي ناوية تلبسيه عليه ، ده هيساعدك تشوفي شكل البنطلون على الشوز بالاضافة لتقييم طول ارجل الجينز والمظهر العام كله ، وطول الارجل بتعتمد على ستايل الجينز ، على سبيل المثال ،  الجينز الواسع عادة بيكون طويل اوي ، والمفروض تكون المسافة من الارض لحافة الساق حوالي 0.5 – 1 بوصة ، في حين ان الجينز الضيق المفروض يوصل للكاحل بس.

نصايح لاختيار الجينز المناسب 6

7- الجيوب:

الجيوب الخلفية بتلعب دور مهم ، لو جسمك ممتليء وعايزة تحسني شكله ،  الافضل تتجنبي الجينز اللي فيه تطريز او اي تفاصيل بارزة ، على العكس لو منطقة المؤخرة مش ممتلئة ، اختاري الجينز اللي فيه تفاصيل عشان يدي حجم اكبر للمنطقة.

نصايح لاختيار الجينز المناسب 7

8- عرض رجل الجينز:

العرض كمان بيعتمد على ستايل البنطلون ، لو البنطلون قصير اتأكدي ان رجله مش واسعة اوي ، لان في الحالة دي هيبين رجلك اقصر ، وكل ما الرجل وسعت ده هيزود من حجم الجسم ، الافضل ان البنطلون يكون اعرض بنسبة بسيطة من الساقين.

نصايح لاختيار الجينز المناسب 8

مقالات متعلقه

ستايلات البنطلونات الجينز التريندي في 2023

ستايلات البنطلونات الجينز التريندي في 2023

15 غلطة بتعمليها مع البنطلون الجينز

15 غلطة بتعمليها مع البنطلون الجينز

10 طرق مختلفة تلبسي بيهم الجاكيت الجينز

10 طرق مختلفة تلبسي بيهم الجاكيت الجينز