ازاي تختاري مكياج الفرح المناسب ليكي

بقلمريهام محمود فيمكياج visibility174

اختيار مكياج الفرح المناسب ليكي مش مهمة سهلة ابدا ومحتاج منك تختاريه بعناية جدا عشان تطلعي بلوك مثالي في ليلة العمر ، والنهاردة هنساعدك في المهمة دي عن طريق شوية خطوات ونصايح بسيطة تقدري تحددي من خلالها مكياج الفرح اللي يناسبك اكتر.

مكياج الفرح المناسب ليكي:

لو بتخططي عشان تختاري مكياج فرحك يبقى لازم تبدأي قبل الفرح بفترة كافية ، ولكن تبدأي تدوري منين؟ النهاردة هنشارك معاكم نصايح من المحترفين وخبراء المكياج ازاي تقدري تختاري مكياج فرحك المثالي ، بالاضافة للغلطات اللي ممكن تقعي فيها في اختيار المكياج ، في عوامل لازم تحطيها في الاعتبار عشان تضيقي نطاق البحث بتاعك , زي حالة الجو, ستايل الفستان, كل ده بيحدد مكياجك يوم الفرح.

1- لخصي يوم فرحك في تلات كلمات:

خبراء المكياج اول حاجة بيطلبوها من العروسة هو وصف فرحهم في تلات كلمات ، مثلا “لو فرح هادي على البحر ، انتي مش محتاجة ان المكياج يكون رسمي اوي ، هيكون الافضل اختيار مكياج طبيعي وناعم” ، نفس الكلام ينطبق لو الكلمات التلاتة اللي توصف الفرح هي فرح رسمي كلاسيكي ، فاكيد انتي عايزة مكياجك يعكس ده ، حاولي كده انتي تعملي ده وانك تضيقي رؤيتك للفرح في تلات كلمات توصف شكل الفرح ، ده هيساعدك على اختيار مكياج مناسب بسرعة.

2- استوحي اللوك من المشاهير:

خبراء المكياج بينصحوا انك ممكن تبعتي بعض الصور لمكياج المشاهير اللي بيعجبوكي ، ودي تعتبر طريقة تانية تضيقي بيها نطاق لوك المكياج اللي ممكن تعتمدي عليه ، مش بس اللي يناسب الفستان والمكان ولكن كمان المناسب لشخصيتك ، لان ضروري جدا انك تحسي براحة نفسية وانتي حاطه المكياج ، ممكن تجمعي الصور المفضلة ليكي لمكياج المشاهير من المهرجانات او الاحتفالات المختلفة او المناسبات ، وشوفي ايه اكتر الحاجات اللي بتجذبك في اللوك هل مكياج العيون؟ احمر الشفايف؟ بمجرد ما تعرفي ايه اللي بيعجبك بالظبط في اللوك بتاعهم ، هتقدري تنفذيه لنفسك بالمناسب ليكي.

3- حطي في اعتبارك ملابس يوم الفرح:

فستان الفرح ممكن يبقى ليه تأثير على مكياجك ، ويلهمك باللوك المناسب ، على سبيل المثال لو لابسة فستان منفوش اوي وطالعة بلوك ملكي هيتناسب معاه رسمة الكات اي الكلاسيكية مع شفايف حمرا ، في حين ان لو الفستان بسيط هيناسبه المكياج الطبيعي والناعم اكتر.

4- اعرفي حالة الجو:

حالة الجو ممكن كمان تأثر كمان على اختيار المكياج ، ومعرفة حالة الطقس يوم الفرح ممكن تساعدك في تحديد لوك المكياج ، لو الفرح هيكون في يوم الجو فيه دافي فهنا هيكون الافضل التركيز على مستحضرات التجميل الاخف وعلى كل المنتجات المقاومة للمية عشان المكياج ميسحش ، ولو الفرح في يوم برد ، هتبقى محتاجة تستخدمي مستحضرات ومنتجات ترطب البششرة عشان تحافظي على نضارة البشرة في اليوم ده ، بمجرد ما تعرفي حالة الجو يوم فرحك ، اتكلمي مع خبيرة المكياج واستشيريها حوالين نوع المنتجات اللي المفروض تستخدميها.

مكياج الفرح المناسب ليكي
مكياج الفرح المناسب ليكي

5- اسألي اللي حواليكي عن رأيهم:

لو مش قادرة تاخدي قرار بنفسك عن لوك المكياج ، ممكن تعتمدي على الاشخاص اللي بتثقي فيهم زي عيلتك, اصحابك المقربين هيقولوا رايهم بشكل مباشر وهينصحوكي بالصح والمناسب ليكي ، اجمعي اللوك اللي عجباكي وشاركيها مع اصحابك وشوفي رايهم وخليهم يختاروا معاكي ، ولو في اكتر من لوك عاجبك ، في الحالة دي اختاري الميزة المفضلة اكتر في كل لوك وعدلي اللوك العام عشان يناسب شخصيتك.

6- اعتمدي على اللوك الكلاسيك:

كل المحترفين اجمعوا انك مش هتغلطي ابدا مع لوك المكياج الكلاسيكي ، اللي بيعتمد على التركيز على حاجة واحدة بس اما على العيون او الشفايف مش الاتنين مع بعض ، وده بيخلي اللوك يطلع مثالي وخالي من العيوب والغلطات ، ولو انتي مش عارفة تبدأي منين ممكن ترجعي لورا شوية وتشوفي لوك قديمة لان الستايل ده في المكياج مش بيبطل ابدا.

7- اختاري اللوك من اللي شبهك:

خبراء المكياج بيشوفوا ان الانستجرام وال Pinterest مصدرين رائعين جدا ممكن تختاري منهم ، ولكن مع ذلك ليهم نصيحة في تضييق نطاق البحث من بحر مالوش نهاية من الصور ، انك تختاري لوك مكياج من موديل او مشاهير ليهم نفس لون البشرة والملامح وشكل الوش ، بالطريقة دي هيكون اسهل عليكي تختاري المناسب ليكي اكتر.

8- حددي اولوياتك اللي بتفضليها:

كل اللي قولناه ده اقتراحات ممكن تساعدك لو حاسه ان انتي تايهة ومش عارفة تختاري ازاي او تبدأي منين ، دي مجرد نصايح تساعدك في البحث ، لكن في النهاية اعتمدي على المكياج اللي حاسه انك هتكوني مرتاحة فيه ، ورأيك هو المهم في الاخر ، اختاري لوك المكياج اللي انتي حاسه بيه.

مكياج الفرح المناسب ليكي

غلطات مكياج الفرح اللي المفروض تتجنبيها:

اثناء اختيارك للوك مكياج الفرح المناسب ليكي ، في بعض الغلطات اللي لازم تتجنبيها ، واحنا هنشارك معاكم دلوقتي اكبر غلطات مكياج الفرح اللي خبراء المكياج بيشوفوها او بتقابلهم بشكل دائم في حياتهم المهنية.

1- تجاهل رغبتك:

ممكن تكوني انتي دايما بتحلمي انك تحطي روج احمر كلاسيك يوم فرحك ، ولكن في المقابل ممكن تكوني بتسمعي من صاحباتك او اللي حواليكي اراء مختلفة تشكك في اختيارك ، ولكن خبراء المكياج بيقولوا ان تجاهل رغبتك يعتبر غلط كبير ، افضل حاجة انك تعملي اللي المريح اكتر بالنسبة لك واللي انتي حاساه ، خلي عندك ثقة في احساسك واختاري لوك مكياج يحسسك بالثقة وان شكلك حلو.

2- تخطي تجربة مكياج الفرح:

جلسة تجربة مكياج الفرح مهمة ، هتقدري تحددي اللوك اللي انتي عايزاه بالظبط وتستبعدي اللي انتي مش حباه او مش مرتاحة فيه ، كمان تجربة المكياج هيخليكي تختبري طول عمر المكياج ، وهتقدري تعرفي مثلا هل الماسكارا مقاومة للمية ولا لا ، وهل كريم الاساس مناسب لبشرتك وشكله حلو في الصور ، بالاضافة ان ده هيعتبر فرصة للتواصل مع خبيرة المكياج والتعامل معاها قبل يوم الفرح.

مكياج الفرح المناسب ليكي

3- تفكري ان لوك مكياج شخص تاني هيناسبك:

احنا قولنا فوق من ضمن الاقتراحات عشان تضيقي البحث عن لوك المكياج انك تعملي لوك بيعجبك لحد من المشاهير ، ولكن ضروري انك تستوحي منها بس وتاخدي افكار وتعدليها باللي يناسبك ، لان كل شخص ملامحة وشكل وشه بتختلف وبتكون عايزة مكياج يناسبها ، عشان كده كمان قولنا انك ضروري تاخدي افكار من مشاهير شبهك من حيث لون البشرة وملامح الوش عشان الاختيار يكون صح.

4- مش بتهتمي بروتين العناية بالبشرة:

المكياج المثالي بيبدأ بقاعدة صح ، عشان كده غلط انك تتجاهلي روتين العناية بالبشرة ، روتين العناية هيساعد ان بشرتك يبقى شكلها نضر وصحي والمكياج يطلع بشكل احلى ، وكل ما بدأتي في الروتين بدري كل ما كان افضل لبشرتك ، بالاضافة كمان ان فترة قبل الفرح مش هي الفترة المناسبة لتجارب منتجات جديدة على بشرتك ، ولكن اعتمدي على المنتجات اللي بشرتك متعودة عليها وبتجيب معاها نتيجة وامشي على روتين ثابت ، ولو عايزة مساعدة اضافية او عندك مشاكل في بشرتك استشيري دكتور جلدية.

مكياج الفرح المناسب ليكي

تعالوا نشوف مع بعض بالصور مجموعة افكار لمكياج الفرح ممكن تستلهمي منها اللوك بتاعك:

افضل ستايلات شوز للعروسة للوك مثالي في ليلة العمر

ستايلات شوز للعروسة
ستايلات شوز للعروسة