نصايح وحيل للشعر الكيرلي للوك مثالي كل يوم

كتير من البنات بقوا يفضلوا يسيبوا شعرهم كيرلي على طبيعته ووقفوا استخدام الحرارة اللي بتتلف الشعر وتضره ، ولكن الشعر الكيرلي التعامل معاه بيحتاج عناية خاصة ، لان ممكن يهيش ويبقى صعب التحكم فيه ، والفرق ما بين المعاناة مع الشعر الكيرلي او انك تحبي شعرك الكيرلي هو روتين العناية بشعرك ، واختيار المنتجات وتسريحات الشعر المناسبة اللي تخلي التعامل مع الكيرلي اسهل بكتير ، بالاضافة ان روتين العناية هيخلي الشعر صحي اكتر ، والنهاردة من خلال موضوعنا هنشارك معاكم مجموعة نصايح للشعر الكيرلي هتحافظ على الشعر صحي وهتخلي الكيرلي يطلع شكله حلو وثابت معاكي ، بالاضافة لتسريحات سريعة وسهلة مناسبة للشعر الكيرلي.

نصايح للشعر الكيرلي:

الشعر الكيرلي بيختلف عن انواع الشعر التانية ، بيحتاج ترطيب اكتر ، وغسيل اقل ، والحقيقة ان الشعر الكيرلي بالفعل بيحتاج مجهود اكبر في العناية من الشعر المفرود ، ولكن متقلقيش ، النصايح اللي هنعرفها مع بعض دلوقتي هتساعدك انك تطلعي بشعر كيرلي مثالي بأقل مجهود.

1- دايما سرحي الشعر من تحت لفوق:

فك تشابك الشعر من تحت لفوق او من الاطراف الاول للجذور هيخلي التشابك وعقد الشعر تتفك اسهل ، بدل ما تسرحي الشعر من فوق وتعقديه اكتر وتقطعي الشعر ، وعشان تحمي شعرك من التلف وتفكي التشابك بشكل صح ، بينصح الخبراء باستخدام مشط باسنان واسعة ، ومش فرشة.

لان الشعر المجعد او الكيرلي بيكون هش او ضعيف وكل تجعيدة في الشعر بتبقى معرضة للتكسر ، واستخدام مشط باسنان واسعة هو افضل طريقة لفك تشابك وتجعيد الشعر وفي نفس الوقت بيحافظ على تجعيدة الشعر بعكس الفرشة ، الفرشة الافضل استخدامها مع الشعر المفرود.

2- قصيه بانتظام لتجنب انقسام اطراف الشعر:

لو عايزة شعر كيرلي حلو وصحي يبقى لازم تتخلصي من الاطراف المقصفة ، وتقصي اطراف الشعر بانتظام كل 6 – 8 اسابيع عشان تتخلصي من الاطراف التالفة والمقصفة.

3- استخدمي المنتجات المناسبة لتحديد الكيرلي وترطيب الشعر:

خبراء تصفيف الشعر بينصحوا باستخدام منتج “كوكتيل” وهو ببساطة مزج منتجين او اكتر مع بعض ، والكوكتيل المفضل للشعر الكيرلي هو خلط السيروم مع الموس وزيت جوز الهند بالاضافة لجل التصفيف ، الكوكتيل ده بيضمن ثبات الكيرلي من غير ما ينشف الشعر او يضعفه.

ولو مش عايزة تستخدمي كوكتيل ، فهيبقى افضل حاجة هو استخدام السيروم ، اللي مش بس هيساعد على تنعيم الشعر ولكن هيحدد كمان شكل الكيرلي ، استخدمي 3 او 4 مضخات من السيروم وادعكيه في ايديك وابدأي ادهني الشعر بخفة.

او ممكن تستخدمي كريم تصفيف الشعر تاخدي منه وايدك مبلولة ، لان مزج المنتج مع المية بيضمن ثبات تجعيدة الشعر وبيحافظ على شكله.

4- دخلي علاج ترطيب للشعر في روتينك:

لو شعرك بيمر بمرحلة جفاف وبهتان ، فاكيد اخر حاجة تعمليها انك تزودي وزنه بكمية كبيرة من المنتجات ، كل اللي عليكي تعمليه بس تاخدي كمية بسيطة من كريم التصفيف او الزيت باطراف صوابعك وتدهنيها على اطراف الشعر سواء مبلول او ناشف ، ده هيديه ترطيب من غير ما يبقى في كمية منتجات كتير على الشعر.

ولو حاسه ان شعرك جاف يبقى ضروري تدخلي نظام ترطيب للشعر في روتين العناية ممكن تدمجي Leave-in conditioner مع الكوكتيل اللي قولناه في النقطة اللي فاتت ، ولو شعرك خفيف وعايزة ترطيب اخف ممكن تستخدمي سبراي مرطب ورشه على الشعر كله ، مع التركيز على الاطراف ، ولترطيب اضافي ممكن تستخدمي كريم Leave-in على الشعر المبلول ، ودايما وانتي بتحطي اي منتج خلي الكفين مقفولين على الشعر وادهني المنتج بخفة عشان تحافظي على شكل التجعيدة.

5- جربي “تسريحة الاناناسة” عشان تحافظي على شكل الكيرلي اثناء النوم:

“الاناناسة” هي تقنية بيتم فيها تجميع الشعر كله بشكل فضفاض في اعلى نقطة في الراس ، ودي بتتعمل عادة قبل النوم ، عشان تحافظ على شكل الكيرلي وبيساعد ان الشعر يحافظ على الحجم الطبيعي بتاعه.

وعشان تحافظي على شكل الكيرلي زي ما هو بين ايام الغسيل بتاعه ، الخبراء بينصحوا باستخدام السكرانشي ودي تقنية لمنع تكسر الشعر والحفاظ على شكل الكيرلي ، ولو مش بتنامي على مخدة حرير لحد دلوقتي ، جيه الوقت انك تغيري ده ، لان ثبت ان اكياس المخدة الحرير بتقلل الاحتكاك على الشعر طول الليل ، وده بيحافظ على الشعر ناعم ورطب.

6- استخدمي ال Diffuser لتوحيد شكل التجعيد واضافة حجم للكيرلي:

ال Diffuser او موزع الهوا مهم للشعر الكيرلي لانه بيقلل الهيشان اللي ممكن يحصل بعد ما الشعر ينشف ، بالاضافة انه بيوحد شكل تجعيد الشعر وبيضيف له حجم.

ازاي تستخدمي موزع الهوا: اول حاجة اعصري شعرك من المية الزيادة باستخدام فوطة من الالياف الدقيقة ومتستخدميش فوطة قطن عادية لانها هتسبب هيشان الشعر اكتر ، حطي بعدها منتجات الشعر المفضلة عندك وواقي الشعر من الحرارة ، ولازم تستخدمي واقي من الحرارة مادام هتستخدمي ادوات تصفيف للشعر بالحرارة عشان تحمي شعرك من التلف ، ابدأي حطي خصل الشعر في موزع الهوا ، وكرريه على الشعر كله لحد ما تعملي كيرلي لكل الشعر ، ولو الشعر منشفش بنسبة 100% لسه مافيش مشكلة لو سيبتيه ينشف في الهوا شوية.

7- جددي تجعيد الشعر بالمكوى:

لو بين الغسلات حسيتي التجعيدة هبطت شوية او شكلها بقى مش حلو ، فدي طريقة رائعة جدا لتجديدة ، استخدمي مكوى تجعيد الشعر ، هتحدد لك شكل الكيرلي تاني بطريقة فعالة وبشكل سريع.

تسريحات سهلة وسريعة للشعر الكيرلي:

دلوقتي بعد ما عرفتي ازاي ممكن تتعاملي مع الشعر الكيرلي ، تقدري كمان تعملي تسريحات مناسبة وفي نفس الوقت تحافظ عليه من الهيشان او انه يفقد شكل التجعيدة بتاعته.

وتعتبر الضفاير من انسب التسريحات اللي ممكن تعتمد عليها صاحبات الشعر الكيرلي ، لانها بتحبس منتجات وعلاجات الترطيب في الشعر طول الليل وتصحي تاني يوم بشعر شكله حلو وصحي ومش محتاج لاي مجهود منك ، تعالوا نشوف مع بعض كام تسريحة مناسبة للنهار والليل.

1- تسريحة Topknot:

لمي الشعر كله على شكل ديل حصان واربطيه باستك ، قسمي شعرك جزئين ، ولفي جزء منهم حوالين الاستك وثبتيه بالبنس ، وبعدين لفي الجزء التاني على الاول وثبتيه ببنسه صغيرة ، وممكن تسحبي الكحكة بالراحة لو حابه عشان تديها شكل مستدير.

2- تسريحة Braided topknot:

دي شبه التسريحة اللي فاتت ولكن الفرق ، انك هتسيبي جزء من الشعر تعمليه ضفيرة ، وبمجرد ما تلفي الشعر كحكة زي الطريقة اللي فاتت ، خدي الضفيرة ولفيها حوالين الكحكة وثبتيها بالبنس.

3- تسريحة Braided headband:

خدي جزء من الشعر من قدام وضفيرة على طول خط الشعر باتجاه الناحية التانية ، لما الضفيرة تبقى ورا الودن ثبتيها تحت باقي الشعر بالبنس.

4- تسريحة Basic braids:

جربي الضفاير الفرنسية او الهولندية او اي نوع من الضفاير تفضليه ، لانها تعتبر اكتر تسريحة بتحافظ على الشعر الكيرلي.

قسمي شعرك من النص قسمين ، وبعدين قسمي كل قسم لتلات اجزاء ، وابدأي اعملي ضفيرة من قدام اعلى الشعر ، وكرري نفس الطريقة للجنب التاني ، مع اضافة خصل الشعر بالتدريج طول ما انتي نازلة بالضفيرة ، وبعدين ثبتي كل ضفيرة في الاخر باستك ، ودي تعتبر طريقة الضفيرة الهولندية.

طريقتها بالفيديو:

5- تسريحة  Slicked-Back Ponytail:

استخدمي جل تصفيف للشعر يكون خفيف وادهني بيه شعرك ، استخدمي فرشة لسحب الجزء العلوي من شعرك لفرده من قدام وعمل ديل حصان وتثبيته بتوكة شعر.

6- تسريحة Three braid updo:

قسمي شعرك لتلات اجزاء ، واضفري كل جزء لوحده ضفيرة عادية من تلات خصلات ، بعدين ابدأي لفي كل ضفيرة في الاتجاه المعاكس الناحية التانية وثبتيها بالبنس.

7- تسريحة Victory curls:

قسمي شعرك للجنب ، وخدي جزء من الشعر من قدام لفي الشعر جوه بعضه وبعدين اربطيه على ورا ، وكرري نفس الحركة للجنب التاني.

روتين العناية بالشعر الكيرلي عشان تحافظي عليه صحي وقوي وشكله حلو