6 نصايح هتساعدك تتخلصي من خطوط وتجاعيد الرقبة
على الرغم ان الرقبة جزء حساس من الجسم ، الا اننا بنتجاهل العناية بيها ، ونتيجة لده ممكن تظهر الخطوط والتجاعيد على الرقبة ، ولان ده ممكن يخليكي تباني اكبر من عمرك ، الخبراء بيقترحوا بعض العلاجات الطبيعية اللي تقدري تعمليها في البيت ، والنهاردة هنشارك معاكم 6 نصايح للتخلص من خطوط وتجاعيد الرقبة.
نصايح للتخلص من خطوط وتجاعيد الرقبة:
1- استخدمي الموبايل والكمبيوتر بطريقة صح:
معظمنا ممكن نقضي ساعات طويلة واحنا باصين في شاشة الموبايل او الكمبيوتر ، ونتيجة لده ممكن نحس بألم في الضهر وظهور خطوط وتجاعيد الرقبة بسبب الحركة دي بشكل مستمر.
ولمنع خطوط الرقبة ، اظبطي الموبايل او جهاز الكمبيوتر قدامك بحيث تكوني باصه للشاشة قدامك بشكل مستقيم ، وفي بعض الادوات اللي ممكن تساعدك على ظبط الشاشة بالطريقة الصح لو الترابيزة بتاعتك مش مريحة ، ممكن مثلا تستخدمي حامل لابتوب.
2- استخدمي تطبيقات خاصة للتحكم في راسك ورقبتك:
دلوقتي موجود تطبيقات لنظام الاندرويد والايفون بتديكي ملاحظات فورية حوالين وضعيتك ، وده بيساعد على التحكم في وضع راسك ، بالطريقة دي كل ما يجيلك تنبيه من التطبيق ان وضع راسك مش مظبوط ، هتبدأي انك تخليها بشكل صح ، وبالتالي هتمنعي الخطوط والتجاعيد بشكل فعال اكتر.
التطبيق للاندرويد: تطبيق تصحيح وضع الرقبة للاندرويد
التطبيق للايفون: تطبيق تصحيح وضع الرقبة للايفون
3- متنسيش تنضيف رقبتك ووشك كل يوم:
كل يوم بالليل بننصحك تمشي على روتين ثابت
شيلي اي مكياج على البشرة ، بما فيهم منطقة الرقبة ، استخدمي منظف مناسب لنوع بشرتك ، بعد التنضيف حطي مرطب على البشرة ، بما فيه الرقبة كمان.
الروتين ده كل يوم هينضف البشرة وهيزيل منها السموم.
4- قشري منطقة الرقبة:
ممكن نكون بنهتم بتقشير الجسم والوش وغالبا بننسى منطقة الرقبة ، والجلد في المنطقة دي بيكون حساس جدا وبيحتاج عناية عشان تتخلصي من الجلد الميت ، ومتعمليش تقشير بقوة اتعاملي مع المنطقة بخفة جدا ، عشان مضريش الجلد ، واعملي التقشير من مرة لمرتين في الاسبوع.
5- استخدمي كريم الريتينويد:
كريمات الريتينويد يعتبر من العلاجات الفعالة التجاعيد وعلامات الشيخوخة ،ونسبة 2% هي اعلى نسبة متاحة ممكن تستخدميها من غير وصفة طبية ، والخبراء بينصحوا بوضع الكريم ده بكمية صغيرة جدا كل يومين ، ومتبالغيش في استخدامه لانه ممكن يأدي لجفاف الجلد.
6- اعملي تمارين يوجا للرقبة:
المتخصصين بيوصوا بممارسة اليوجا للوجه لمدة 30 دقيقة يوميا لمدة 5 شهور على الاقل للوصول لافضل النتايج ، هنقولك بعض التمارين اللي ممكن تعمليها لشد الرقبة.
– تمرين Jutting out the chin:
اقعدي في وضع مريح.
ابدأي حركي دقنك لبره.
دلوقتي ابتسمي واستمري على الوضع ده لمدة 5 ثواني ، لحد ما تحسي ان عضلات رقبتك مشدودة.
كرريه 3 مرات ورا بعض.
اعمليه من 1 – 2 مرة في اليوم.
– تمرين Kissing the ceiling:
التمرين ده فعال جدا في علاج مشكلة خطوط وتجاعيد الرقبة.
حافظي على الكتفين منخفضين وفي وضع مريح.
ابدأي ارفعي راسك لفوق كانك بتبصي للسقف ، لازم تحسي بتمدد في منطقة الرقبة من فوق والدقن.
اعملي شفة البطة “Duck lips” وطلعي لسانك في نفس الوقت.
اثبتي على الوضع ده لمدة 5 ثواني ، كرريه 3 مرات ورا بعض.
اعمليه من 1 – 2 مرة في اليوم.
– تمرين Swan neck او رقبة البجعة:
اقعدي في وضع مريح وخلي الكتفين مرخين ومرتاحين.
حطي ايدك اليمين تحت الترقوة الشمال ، مع الضغط عليها بشكل خفيف.
ابدأي بمد راسك ورقبتك ناحية اليمين ، المفروض الوضع يشبه رقبة البجعة الطويلة.
اعملي شفة البطة “Duck lips”.
اثبتي على الوضع ده لمدة 5 ثواني ، وبعدين اعملي نفس الحركة للجنب التاني.
كرري التمرين من 1 – 2 مرة في اليوم.
