3 وصفات سموزي للفطار سهلة وسريعة
الفطار هو اهم وجبة في اليوم لان هو اللي بيدينا طاقة طول اليوم ، لكن معظم الوقت ممكن ميكونش عندنا الوقت الكافي الصبح لتجهيز فطار صحي ، عشان كده النهاردة هنقولكم على 3 وصفات سموزي للفطار سهلة وسريعة تحضريها في دقايق ، وفي نفس الوقت صحي ومغذي.
ايه فوايد السموزي ده:
– هيديكي طاقة اكتر لجسمك.
– هيخليكي مركزة اكتر.
– هيخلي عقلك يشتغل بشكل احسن.
– هيخليكي حاسه بالرضا عن نفسك طول اليوم ، وحاسه براحة.
3 وصفات سموزي للفطار:
1- سموزي الشوكولاتة:
الحاجات اللي هتحتاجيها:
– 1 ½ معلقة كبيرة بروتين بودر بطعم الشوكولاتة (ممكن تستخدموا بروتين جروث فورميلا وهتلاقوا منه في الصيدلية نكهات مختلفة).
– ½ موزة.
– ½ كوباية من التوت البري طازة او مجمد (ممكن تستخدموا العنب كبديل).
– 2 حبة تمرمنزوع النواة.
– 1 كوباية من حليب الصويا (ممكن تستخدمي اللبن العادي او مية).
الطريقة:
كل اللي هتعمليه هتضربي كل المكونات مع بعض في الخلاط لمدة دقيقة واحدة تقريبا لحد ما المكونات كلها تمتزج مع بعض كويس ، وكده السموزي يبقى جاهز للشرب على طول.
2- سموزي الفراولة والفانيليا:
الحاجات اللي هتحتاجيها:
– 1 ½ معلقة كبيرة بروتين بودر بطعم الفانيليا.
– 2 معلقة كبيرة كاجو.
– 1 كوباية فراولة طازة او مجمدة.
– 1 معلقة صغيرة عسل نحل.
الطريقة:
اضربي كل المكونات في الخلاط لمدة دقيقة تقريبا ، لحد ما تمتزج مع بعض كويس ، وكده يبقى السموزي جاهز.
3- سموزي التوت الاحمر والموز والسبانخ:
الحاجات اللي هتحتاجيها:
– ½ كوباية توت (ممكن تستبدليه بالفراولة).
– ½ موزة.
– 1 كوباية صغيرة سبانخ.
– 1 كوباية لبن.
الطريقة:
اضربي كل المكونات في الخلاط من 45 – 60 ثانية ، وابدأي يومك بشكل صح مع كوباية سموزي صحي ومغذي وطعمه لذيذ.
5 وصفات للفطار لذيذة جدا تقدري تعمليهم في 5 دقايق بس
