الفرق بين انواع الماسكارا المختلفة
الرموش الطويلة والكثيفة بتظهر شكل العين وبتبرزها جدا ، ولكن للاسف مش كل البنات عندهم رموش طويلة وكثيفة طبيعي ، ولكن لحسن الحظ ان الماسكارا ممكن تساعدك على ده ، والنهاردة من خلال السطور الجايه هنتعرف على الفرق بين انواع الماسكارا المختلفة عشان تقدري تختاري منها اللي يناسبك.
الفرق بين انواع الماسكارا:
في انواع ماسكارا مختلفة متوفرة في السوق واللي بتساعدك في تغيير شكل عينيكي بالكامل في ثانية واحدة.
– للرموش قصيرة: جربي الماسكارا المطولة للرموش.
– للرموش الخفيفة: جربي الماسكارا اللي بتدي سمك للرموش.
– للرموش المستقيمة: جربي الماسكارا اللي بتتني الرموش.
– لو عايزة كل اللي فات مع بعض: جربي الماسكارا المكثفة للرموش.
كل اللي انتي محتاجة تعرفيه بس هو ازاي تحطي الماسكارا بطريقة صح ، وتختاري النوع المناسب.
الماسكارا القابلة للذوبان (عادية مش ضد المية): النوع ده بيتلطخ بسهولة وبيتقشر ومش بيدوم فترة طويلة ، وبتتشال بسهولة باي مزيل مكياج.
ماسكارا ضد المية: النوع ده مش بيتلطخ بسهولة, وبيدوم فترة طويلة ، وتعتبر افضل نوع لايام الصيف والرياح الموسمية ، بيكون صعب ازالتها بمزيلات المكياج العادية وبتحتاج لمزيلات خاصة تكون زيتية.. شوفي من هنا ازاي تختاري وتستخدمي الماسكارا المضادة للمية
ده يعتبر التصنيف العام لانواع الماسكارا ، ولكن الماسكارا في منها تلات انواع وهي الماسكارا البودرة, والكريمي, والسايلة.
1- الماسكارا البودرة:
النوع ده بيختلف عن الماسكارا الرطبة والجافة ، ودي بيتضاف ليها كام نقطة مية وتستخدميها بعصاية الماسكارا على الرموش.
2- الماسكارا الكريمي:
الماسكارا الكريمي مناسبة للرموش الخفيفة او الرقيقة واللي بتكون متفرقة عن بعض ، بتدي عمق حلو للعين ، ولكن النوع ده عيبه انه بيتلطخ بسهولة ، وبتحتاج لادوات خاصة عشان تتحط بيها.
3- الماسكارا السايلة:
ده النوع المنتشر او المعروف اكتر حاجة وتقدري تلاقيها بسهولة ، والنوع ده بيستخدم عادة مع الرموش المتعرجة شوية ، بيقوي الرموش وبييشدها ، والنوع ده متوفر منه العادية واللي ضد المية.
اختيار فرشة الماسكارا المناسبة:
فرشة الماسكارا بتيجي باشكال واحجام مختلفة ، وكل فرشة بيكون ليها استخدام او غرض معين.
– فرشة الماسكارا المستقيمة: سهل استخدامها لانها بتسمح للوصول للرموش الصغيرة ، وغطا الجفن الداخلي ، وتقدري كمان تمسكي الفرشة بزوايا مختلفة لتغطية الرموش بالكامل.
– الفرشة الكيرف: مناسبة جدا للبنات اللي حابين يتنوا الرموش شوية ويعملوا رفع اضافي للرموش ، وتصميم الفرشة معمول على شكل مشط عشان تمنع التكتل وتفصل الرموش عن بعض.
– الفرشة المشط: النوع ده بيساعد على فصل الرموش وبتدي مظهر متساوي للرموش ، وبتضيف طول وحجم للرموش.
– الفرشة الكبيرة: بتغطي الرموش اكتر وبتديها حجم اكبر ، والفرشة دي بتتميز بشعيرات متباعدة ، وده بيخليها مثالية لاضافة سمك للرموش ، عيب الفرشة الكبيرة الوحيد انها ممكن تعمل تكتلات وممكن يبقى صعب استخدامها في بعض الاحيان ، ولكن مع الممارسة هتتعودي عليها وهتستخدميها بشكل افضل.
– الفرشة الطويلة: هي افضل نوع لتطويل الرموش لان العصاية الطويلة بتاعتها بمسافات متساوية مش بتدي حجم كبير للرموش زي الفرشة الكبيرة ، ولكن هي مثالية لفصل الرموش وتحديدها.
– الفرشة الصغيرة: هي افضل فرشة للرموش الصغيرة لانها مش بتسبب تكتلات، وبتضيف سمك للرموش.
تركيبات مختلفة من الماسكارا:
1- ماسكارا الاطالة:
الماسكارا دي بتساعد على اضافة طول للرموش ، ومعظم الماسكارا المطولة فرشتها بتكون بشعيرات كثيفة ، وده بيخلي الماسكارا توصل لكل الرموش خاصة على الاطراف.
الماسكارا دي تعتبر افضل نوع للاشخاص اللي رموشهم قصيرة ومتفرقة ، وعشان تحصلي على اقصى طول حطي طبقتين على الاقل من الماسكارا على الرموش.
2- ماسكارا تكثيف / سماكة:
النوع ده بيساعد علة اضافة كثافة وسمك اكتر للرموش لانها بتحتوي على تركيبة سميكة من الشمع وبوليمرات السيليكون ، وهي مثالية للاشخاص اللي رموشهم رقيقة ومتفرقة ، بغض النظر عن الطول ، وعلى عكس الماسكارا المطولة ، مش بتحتوي على الياف صناعية هي مصممة بس عشان تكمل شكل ولون الرموش الطبيعية.
3- ماسكارا لتني الرموش:
الماسكارا دي بتساعد على تني الرموش اكتر ، بيكون قوامها سميك شوية عن انواع الماسكارا التانية ، وده بيساعد على تثبيت تنية الرموش.
4- ماسكارا تحديد الرموش:
النوع ده يعتبر شامل بيوفر الحجم والسمك ، وبتكون متوفرة عادة مضادة للمية ، بسبب ملمسها وقوامها ، بتتحط على الرموش بشكل متساوي وبتظهر كل رمش منفصل ومتني بشكل حلو عشان تدي حجم وسمك.
وكل انواع الماسكارا المتوفرة في السوق بتقدم المميزات دي كلها تقريبا ، ولكن ماسكارا تحديد الرموش فريدة من نوعها لانها بتحتوي على اصباغ وبوليمرات خاصة لتحديد الرموش من الجذور للاطراف ، وبتدي شكل طبيعي للرموش ، وتعتبر هي انسب ماسكارا للاستخدام اليومي.
5- ماسكارا غير متكتلة:
دي تعتبر احدث نوع من انواع الماسكارا وبتحتوي على مستخلصات الجلسرين والحرير ، وده بيدي الرموش مظهر انيق ، وبتستخدم معاها فرشة طويلة للوك عميق.
لما تيجي تختاري الماسكار ، حددي الاول انتي محتاجة ايه وشكل رموشك عشان تقدري تحددي النوع المناسب ليكي ويديكي النتيجة المطلوبة.