خريطة الوجه الصينية هتقولك اي جزء من جسمك في مشكلة وازاي تعالجيه

بقلمريهام محمود فيصحة visibility2673

الوجه يعتبر مراية الجسم ، وبيديكي فكرة عن اداء جسمك ، الطفح الجلدي, البثور, التغيرات في لون الجلد تعتبر علامات ان في حاجة في الجسم مش مظبوطة ، لان بشرة الوجه حساسة وبالتالي بتعكس اي تغييرات داخلية بشكل اسرع من اجزاء الجسم التانية ، جسم الانسان مجهز بنظام تشخيص طبيعي ، والصينين من الشعوب اللي قدرت تدرس وجه الانسان وتفسر العلامات دي ، والنهاردة هنتعرف من خلال المقال بتاعنا على خريطة الوجه الصينية اللي هتقولك اي جزء من جسمك بيعاني من مشكلة وازاي تعالجيها.

خريطة الوجه الصينية:

خريطة الوجه هي علاج تقليدي بيستخدم في الصين من زمان ، وطريقة العلاج بتقوم على ان الجسم متصل من خلال قنوات الطاقة المعروفة باسم خطوط الطول ، خطوط الطول دي بتنقل الطاقة بين كل اعضاء الجسم ، وخريطة الوجه بتربط مناطق مختلفة من الوجه بالاعضاء الداخلية ، وبالتالي اي حاجة مش مظبوطة على الوش بيكون معناها اختلال التوازن الداخلي ، وده بيساعد ان الحالة تتشخص بسرعة وفي التوقيت الصح ، وده ممكن يمنع الامراض الرئيسية ويحافظ على الصحة العامة.

خريطة الوجه الصينية
خريطة الوجه الصينية

1- الجبين:

متصل بـ: المثانة, الامعاء الدقيقة

التغييرات اللي بتحصل في الجبهة ممكن تحصل بسبب الاستهلاك المفرط للسكر, الاطعمة الدسمة والمعلبة ، الاطعمة دي بتسبب بطء معدل التمثيل الغذائي في الجسم ، بالاضافة ان اسلوب الحياة الغلط والسهر والاجهاد والقلق هو ارض خصبة للمشكلات دي.

الامعاء بتتأثر بشكل كبير بالجهاز العصبي ، والجهاز العصبي المركزي بيحدد وظيفة الجهاز الهضمي ، الخطوط الافقية العميقة في الجبهة ممكن انها تكون علامة على فرط نشاط الجهاز العصبي وضعف صحة الامعاء ، وبيشير على وجه التحديد لوجود تسريب في الامعاء ، او فرط نمو البكتيريا المعوية الصغيرة ، او خلل بكتيري.

العلاج: عشان تعالجي المشكلة دي زودي من اكل الفواكة والخضروات الطازة ، ودخلي في نظامك الغذائي اليومي البروبيوتيك زي الزبادي, الكاكاو الخام ، كمان دخلي نشاط بدني لروتينك اليومي زي اليوجا, التأمل ، ونامي بشكل صح وعدد ساعات كافية.

خريطة الوجه الصينية

2- بين الحاجبين:

متصل بـ: الكبد

الكبد مسؤول عن ازالة السموم والهضم ، ولو في فائض من السموم او الاطعمة المصنعة او حتى المشاعر السلبية في الجسم ، ده كله بيظهر بين الحاجبين ، واي مشكلة جلدية بشكل عام بتشير لخلل في الكبد.

العلاج: الكبد بيحتاج لكمية كبيرة من الخضروات الورقية, الكركم, والبروتينات الخالية من الدهون ، استبدلي كل منتجات العناية بالبشرة السامة بمنتجات عضوية وطبيعية ، واتعلمي الاسترخاء والتأمل وقضي وقت في الطبيعة.

خريطة الوجه الصينية

3- تحت العيون:

متصل بـ: الكلى

الكلى بتعتني بكل السوائل في الجسم ، يعني المية بتلعب دور كبير جدا هنا ، لان الانتفاخات تحت العيون, الهالات السودا, والجيوب تحت العين بتحصل بسبب الجفاف والاجهاد وقلة النوم.

العلاج: اشربي كمية مية كفاية على مدار اليووم كله ، اتجنبي الافراط في السكر, الكافيين, والملح المكرر ، دخلي الاطعمة الغنية بالمعادن في نظامك الغذائي, حسني دورة نومك, اتخلصي من اي ضغوط عاطفية عندك.

خريطة الوجه الصينية

4- الانف:

متصلة بـ: القلب

الجنب الشمال من الانف بيتوافق مع الجنب الشمال من القلب والعكس صحيح ، والرؤوس السودا ممكن انها تبقى علامة على احتقان القلب ، والاحمرار في الانف ممكن يكون علامة على مشاكل السكر وضغط الدم.

العلاج: اولا وقبل اي حاجة ، تقدري تعالجي قلبك عن طريق التخلص من الحزن, الغضب, التوتر ومن خلال التسامح ، والنقطة التانية اللي تركزي عليها هو الكوليسترول ، تقدري تخفضي مستويات الكوليسترول عن طريق خفض السكر وتناول الكربوهيدرات المكررة ، وتقدري تقللي الالتهاب عن طريق تناول الاطعمة الغنية باحماض اوميجا 3 الدهنية ، ومافيش بديل من 30 دقيقة يوميا لتمارين القلب والاوعية الدموية “تمارين الكارديو”.

خريطة الوجه الصينية

5- الخدود:

متصلة بـ: المعدة والطحال

المعدة والطحال بيفرزوا انزيمات بتساعد على تكسير الطعام لاستخراج العناصر الغذائية الضرورية ، الطحال يعتبر مرشح للدم ، والخدود الحمرا هي علامة على التهاب في المعدة.

العلاج: خلي نظامك الغذائي غني بالالياف واللحوم الخالية من الدهون وحافظي على رطوبتك ، اتجنبي التدخين والافراط في تناول الكافيين.

6- الفم والدقن:

متصلين بـ: القولون والمعدة

تقرحات الفم ممكن تكون علامة على سخونة المعدة او وجود تقرحات في المعدة ، قللي من استهلاكك للتوابل, الاطعمة الباردة, السكر, الدهون, والكافيين.

العلاج: تناول الطعام الدافيء والمطبوخ ، دخلي في نظامك الغذائي جل صبار الالوفيرا, وبذور الشيا.

7- الفك والرقبة:

متصلين بـ: الهرمونات

زيادة تناول الملح والكافيين وعدم شرب مية كفاية ممكن انه يأدي لاختلال التوازن الهرموني ، والدقن في الغالب هي المكان اللي بيظهر فيه علامات الاختلال الهرموني ، وده معناه انك ممكن تلاقي ظهور حبوب وتهيج في المنطقة دي وقت الدورة الشهرية.

العلاج: تقليل الملح والكافيين ممكن انه يأدي لاصلاح اي اختلال هرموني بسيط  ، كمان تقليل التوتر قدر الامكان ، والنوم كفاية وممارسة الرياضة ممكن انه يساعد على علاج البقع حوالين المنطقة دي.

دلوقتي بعد ما عرفتي خريطة الوجه الصينية ومعناها ، روحي بصي في المرايا واكتشفي اللي مكتوب على وشك واعرفي اذا كنتي بتعاني من مشكلة ولا لا عشان تقدري تعالجيها بشكل اسرع.

خريطة حب الشباب على الوش ممكن تقولك ايه عن صحتك!

حب الشباب
حب الشباب