7 طرق طبيعية فعالة للتخلص من الحشرات في البيت
اكيد كلنا بنبقى عايزين البيت نضيف خالي من اي حشرات ، ولكن المشكلة في المبيدات الحشرية الموجودة في السوق بتكون سامة جدا ومضرة جدا بالصحة لاي حد بيتعرض لريحتها وبيستنشقها ، لانه المواد الكيمائية اللي ممكن تقتل الحشرات ، هي اكيد مش هتبقى مفيدة لينا ، عشان كده الافضل استخدام حاجات طبيعية وآمنه بقدر الامكان ، والنهاردة من خلال موضوعنا هنتعرف على طرق للتخلص من الحشرات المنزلية.
طرق للتخلص من الحشرات المنزلية:
1- الصراصير:
الصراصير هي مش مجرد حشرات مثيرة للاشمئزاز ، ولكن كمان ممكن انها تنقل امراض ضارة جدا ، وفي كتير من المنتجات اللي موجودة في السوق اللي تقدر تخلصك منها ولكن بتكون سامة جدا ، عشان كده هنقولك حيلة رخيصة وآمنة ، والاهم انها فعالة.
قطعي بصلة واحدة وضيفي عليها معلقة صغيرة كربوناتو ، وحطي الخليط ده في زوايا البيت او الاماكن اللي ممكن يكون بيدخل منها الصراصير ، وكل يوم غيري البصلة وضيفي عليها كربوناتو ، هتلاقي ان الصراصير مش بتدخل البيت اصلا.
2- القرادة:
حشرة القراد في منها انواع كتير مختلفة في الحجم واللون ، ومهم جدا انك تحمي بيتك واسرتك ولو عندك حيوان اليف من الحشرة دي ، لانها ممكن تكون ضارة جدا ، واحيانا مميتة ، ولو انتي مش بتحبي تستخدمي المبيدات الكيميائية جربي الخلطات دي.
– امزجي 20 نقطة من زيت الجيرانيوم او زيت ابرة الراعي, 10 نقط من زيت sweetgrass, 5 نقط من زيت اللافندر, 5 نقط من زيت الليمون, معلقة كبيرة كحول, خففي الزيوت ب 100 مل خل او مية ، انقلي الخليط في ازازة ببخاخ ، رجيها كويس ورشي بيها الملابس قبل الخروج.
– خليط طارد القراد من الكلاب
لو بتربي كلب في البيت ، القراد من الحشرات اللي دايما بتستهدف الكلاب وهتكوني محتاجة حاجة تخلصك من المشكلة دي.
امزجي 20 نقطة من زيت الجيرانيوم او ابرة الراعي, مع 2 معلقة من زيت اللوز الحلو ، وحطي كام نقطة من الخليط ده على الكلب او على الطوق بتاعه.
الخليط ده ميستخدمش على القطط ولا على الحيوانات الحامل ، يستخدم للكلاب بس.
3- حشرات الحدائق:
حشرات الحدائق بشكل عام ، او الحشرات اللي بتبقى موجودة على الزرع بتكون مضرة جدا وممكن تضيعلك مجهودك وتبوظلك الزرع ، وفي مبيدات حشرية متاحة لحشرات الزرع ولكن ممكن تضر الزرع بتاعك وخصوصا لو انتي زارعة خضروات او فاكهة هتخليها غير صالحة للاكل.
اخلطي ½ كوباية من الفلفل الحار مع ½ كوباية ثوم او بصل ، واضربيهم في الخلاط لحد ما يتحولوا لعجينة ، اخلطي العجينة دي مع 500 مل مية دافية ، سيبي الخليط لمدة 24 ساعة في مكان دافي ، وبعدين صفيه ورشي منه على الزرع.
4- العناكب:
حتى لو العناكب غير سامة ، ولكن هي حشرة غير مرغوب فيها في البيت اكيد.
والطريقة الطبيعية دي مش هتقتل العناكب ولكن هتخليها بعيد عن البيت لانها بتكره الروايح النفاذة ، ضيفي 5 – 10 نقط من زيت النعناع ل 200 مل مية و ¼ معلقة صغيرة من اي نوع منظف سائل ، حطي الخليط في ازازة ببخاخ ورجيها كويس ، رشي المناطق اللي فيها عناكب مرة واحدة في الاسبوع هتهرب كلها من البيت ومش هتدخل عندك تاني ، ممكن تستبدلي زيت النعناع بزيت الاوكالبتوس, اللافندر, الليمون, او زيت شجرة الشاي.
5- النمل:
النمل من الحشرات المزعجة جدا واللي ممكن تظهر فجأة في اي مكان ، وفي اوقات كتير بيدخل للمطبخ واماكن تخزين الاكل ، فلو انتي بتعاني من مشكلة النمل شوفي معانا الطريقة دي اللي هتخلصك منه.
النمل بيكره ريحة القرفة تماما ، حطي قرفة بودر في الاماكن اللي بيدخل منها النمل ، ولنتايج فعالة اكتر ممكن تضيفي كام نقطة من اي نوع زت عطري للقرفة.
6- عث الغبار:
عث الغبار او العته الحشرات دي بتكون صغيرة جدا لدرجة انك متقدريش تشوفيها بالعين المجردة ، ولكن مش عشان انتي مش شايفاها ده معناه انها مش موجودة ، الحشرات دي بتعيش في الغبار المنزلي ، وبيفضلوا الاماكن الدافية وبيتغذوا على الجلد الميت ، عشان كده تفتكري ايه افضل مكان بالنسبة لهم؟ زي ما فكرتي على السرير.
على الرغم من ان حشرة عث الغبار مش بتقرص ، ولكن كتير من المتخصصين قالوا انها ممكن تسبب حساسية وتهيج الجلد.
امزجي 6 معالق صغيرة من زيت الاوكالبتوس مع 1 ½ معلقة صغيرة من منظف الغسيل السائل اي نوع وضيفيهم لجردل مية ، وانقعي في الخليط ده اي حاجة قابلة للغسيل زي ملاية السرير, اكياس المخدات ، وبعدين اغسليها بالطريقة العادية ، ولاي حاجة تانية غير قابلة للغسيل رشي عليها من الخليط وامسحيها بقطعة قماش نضيفة ، وممكن تستبدلي زيت الاوكالبتوس بزيت شجرة الشاي ، هيديكي نفس النتيجة.
7- السوس:
لو خزنتي الدقيق, الحبوب, الارز, التوابل مش مقفولين كويس ، هينتهي الامر انك تلاقي فيهم سوس ، واكيد انتي مش هتبقي عايزة يكون في مبيدات حشرية في مكان قريب من الاكل وهنا هيجي دور الحيلة بتاعتنا النهاردة.
السوس بيكره ريحة اوراق الغار “الورق اللوري” او القرنفل ، حطي فص من القرنقل او ورقة غار على سطح الطعام وحوالين الحاجات اللي انتي مخزنة فيها الاكل عشان تبعدي السوس عن اماكن التخزين.