5 فوايد رائعة ممكن يعملها الشاور البارد لبشرتك
اتعودنا دايما اننا نسمع ان الشاور البارد بيدي الجسم دفعة طاقة وبيساعدنا اننا نصحصح الصبح وبيدينا نشاط ، لكن الشاور بالمية الباردة ليه فوايد جمالية كتير ، الشاور لفترة قصيرة بمية باردة او بدرجة حرارة معتدلة هو خدعة تجميلية سهلة ممكن يكون ليها تأثير فوق ما تتخيلي على بشرتك ، والنهاردة من خلال موضوعنا هنتعرف على فوايد الشاور البارد للبشرة ، وازاي ممكن يحول بشرتك بطريقة مفاجئة.
فوايد الشاور البارد للبشرة:
1- بيدي البشرة اشراقة صحية:
الشاور بالمية الباردة بيساعد على زيادة الدورة الدموية للبشرة ، وده معناه مظهر جديد وصحي لبشرتك ، والخبر الحلو انك مش محتاجة تفضلي في المية الباردة لفترة طويلة عشان تخلي بشرتك مشرقة وصحية ، الاستحمام بمية معتدلة البرودة او حتى فاترة هيكون كافي جدا لتغذية البشرة.
2- بيمنع شيخوخة الجلد:
الحمام البارد بشكل يومي بيساعد على الحفاظ على البشرة شكلها اصغر لفترة اطول ، المية الباردة بتنشط الجهاز العصبي ، والجسم بيطلق الهرمونات والمواد كيميائية في المخ اللي بتقاوم الاجهاد ، والدراسات اثبتت ان الاجهاد النفسي ليه تأثير مباشر على شيخوخة الجلد وبيأثر بشكل سلبي على العديد من اجهزة الجسم.
3- بيمنع الامراض الجلدية المرتبطة بالتوتر:
الشاور بمية باردة بيبعت كمية كبيرة جدا من النبضات الكهربائية للمخ وبيحفز افراز “هرمون السعادة” او الاندروفين ، ولما الجسم بيفرز المواد الكيميائية دي ، بينخفض مستويات التوتر وهتبقي معرضة بشكل اقل للاصابة بكتير من مشاكل الجلد زي حب الشباب, الصدفية, التهاب الجلد.
4- بيشد المسام:
في حين ان المية السخنة بتزيل بعض الزيوت الطبيعية اللي بتحمي البشرة واللي بتفرزها البشرة بشكل طبيعي ، المية الباردة هتساعد على تقليل المسام ، وبتساعد كمان على اضافة حيوية واشراقة للبشرة ، لان المية الباردة ممكن انها تتسبب في ضغط الاوعية الدموية ، وبالتالي الوش هيبان اقل انتفاخ او احمرار.
5- بيخفف من اعراض بعض الامراض الجلدية:
في حين ان الاستحمام بمية سخنة ممكن يأدي لالتهاب الجلد ، ويسبب الاحمرار والحكة وحتى تقشر البشرة ، فالمية الباردة بتعمل العكس تماما ، بالنسبة للاشخاص اللي بيعانوا من حكة الجلد ، الاستحمام بالمية الباردة بيساعد في التخلص من الاحساس بالحكة ، واظهرت الدراسات ان تبريد الجلد عن طريق الاستحمام بالمية الباردة بيساعد كمان في تقليل الحكة الشديدة اللي بتسببها الصدفية.
هل دايما بتاخدوا شاور بمية سخنة ولا باردة؟ وهل لاحظتوا تأثيرها على بشرتكم ولا لا.