6 مكونات تقدري تضيفيهم للمية هتخليها صحية اكتر وهتساعدك على تخسيس البطن
كلنا عارفين المية قد ايه مهمة مش بس للصحة لكن كمان للبشرة والشعر ، احنا ممكن نزود فايدة المية اكتر كمان من خلال اضافة بعض المكونات ليها ، وده اللي هنشوفه النهاردة مع بعض من خلال موضوعنا ، هنتعرف على 6 مكونات هتزود من فايدة المية وهيخلوها صحية اكتر ، وكمان هيساعدوا على تخسيس البطن.
مكونات هتزود من فايدة المية:
1- المية مع الملح غير المعالج باليود:
المية المالحة مفيدة لتطهير القولون وعلاج الامساك المزمن ، بس المهم نعرف اننا محتاجين ملح بالكمية المناسبة ، الصوديوم بيحافظ على الاداء السليم للاعصاب والعضلات ومستويات ضغط الدم لما بيدوب في الدم.
جربي المية المالحة لو بتعاني من امساك مزمن ، او بتعاني من حركة امعاء مش منتظمة.
الوصفة:
امزجي معلقتين صغيرين من الملح غير المعالج باليود ، و 4 كوبايات مية دافية ، ولو عايزة طعمها افضل ممكن تضيفي شوية ليمون ، اشربي الكمية دي باسرع ما يمكن على معدة فاضية.
2- المية مع الثوم:
كتير من الدراسات اثبتت الفوايد الصحية من اكل الثوم ، ممكن انه يخفض ضغط الدم, بيحارب الامراض, بيحسن من مستويات الكوليسترول, بيزيل السموم من الجسم ، وده بيحصل بسبب مركبات الكبريت الموجودة في الثوم عند تقطيعه او طحنة او مضغه.
لكن انتي تقدري تاخدي كل الفوايد الصحية دي من الثوم من غير ما تاكليه ، ممكن تجربي المشروب ده.
الوصفة:
هاتي فصين ثوم قطعيهم شرايح ، سيبيهم لمدة 10 دقايق وبعدين امزجيهم مع 500 مل مية ، سيبي الصوم منقوع في المية لمدة ساعتين على الاقل ، وبعدين اشربي المية.
3- المية مع التفاح والقرفة:
التفاح مع القرفة ممكن انه يساعدك على تخسيس الوزن وزيادة التمثيل الغذائي ، خلط المكونات دي هيضيف بعض مضادات الاكسدة المهمة لنظامك الغذائي ، بما فيهم فيتامين C, B.
والقرفة ليها كتير من الفوايد الصحية ، منها خفض الكوليسترول ومكافحة مرض السكر.
الوصفة:
قطعي تفاحتين لشرايح رفيعة وضيفي لهم 2 عود قرفة في ابريق مية ، حطي المية في التلاجة لمدة ساعتين عشان تخلي النكهات تنزل في المية ، وبعدها اشربي منها.
4- المية مع مكعبات تلج الخيار:
المشروب ده منعش جدا وممكن يمنعك عن الرغبة في شرب الصودا او المشروبات الغازية وفي اكل الوجبات السريعة ، وهو واحد من مضادات الاكسدة الطبيعية ، ده غير ان في سعرات حرارية قليلة جدا 34 سعر حراري بس في الخيارة الواحدة.
الوصفة:
قطعي الخيار لشرايح او مكعبات ، جمديه في الفريزر ، ضيفيها للمية لما تحسي بالجوع او العطش ، وممكن كمان تضيفي لها ليمون او نعناع لتحسين الطعم.
5- المية مع الفلفل الاسود:
الفلفل الاسود يعتبر عنصر ممتاز جدا لو عايزة تخلصي جسمك من السموم او تفقدي وزنك ، الدراسات اثبتت ان الفلفل ليه خصائص مضادة للاكسدة ممكن انها تساعد في منع الالتهابات والشيخوخة المبكرة وامراض القلب ، بالاضافة انه بيحسن التمثيل الغذائي للسكر وبيخفض مستويات الكوليسترول.
الوصفة:
½ معلقة كبيرة فلفل اسود مطحون, 1 معلقة كبيرة زنجبيل مبشور, 1 معلقة كبيرة عسل, ليمونة, 2 كوباية مية.
اخلطي الفلفل الاسود مع الزنجبيل ، صبي عليهم العسل واخلطيهم مع بعض كويس ، اغلي المية وصبيها في كوبايات ، وضيفي معلقة كبيرة من الخليط لكوباية المية ، ضيفي عصير ½ ليمونة لو بتحبي الليمون ، واشربيه المشروب دافي.
6- المية مع الروزماري او اكليل الجبل:
اكليل الجبل ليه فوايد رائعة جدا ، اثبتت الدراسات انه ممكن يساعد في تحسين الهضم والذاكرة والجهاز المناعي ، والعلماء لقوا ان اكليل الجبل مفيد جدا للمخ وبيعمل كنوع من الحماية العصبية ، تقدري تشربي المية مع اكليل الجبل بكميات صغيرة هتكون كافية ومفيدة.
الوصفة:
هاتي ساق من اكليل الجبل الطازة ، هاتي ليمون قشريها وقطعيها لشرايح ، حطي شرايح الليمون واكليل الجبل في لتر مية ، حطي المشروب ده في التلاجة لمدة ساعتين على الاقل او طول الليل ، وبعدين اشربي منه.
