متتجوزيش شخص عنده ال 13 عادة دول!
اكيد مافيش اي واحدة هتبقى عايزة ترتبط بشخص عكسها في كل حاجة, مش بيقدرها, ولا بيحترمها ، اكيد في الحالة دي هتبقى اسوأ علاقة على الاطلاق ، عشان كده لازم يكون في تأني في اختيار شريك الحياة ، عشان كده النهاردة هنتعرف مع بعض على عادات سيئة عند الرجل لو موجودة فيه مترتبطيش بيه وانهي العلاقة.
عادات سيئة عند الرجل:
1- ضيق الافق:
الشخص الضيق الافق او اللي مش بيحب تجربة حاجات جديدة ودايما عنده خوف وشكوك ، وبيمنعك انك تعملي اي حاجة بسبب خوفه ان اي حاجة ممكن تتحول بشكل سيء او شكوكه فيكي.
النوع ده من الرجالة اتخلصي منه فورا ، لانه ممكن يهدم حياتك ، اتخلصي منه من غير ما تتردي لحظة ولا تفكري مرتين.
2- بيكره الحيوانات:
لو مش بيحب الحيوانات او مش بيهتم بيهم من غير مبرر زي الحساسية مثلا او غيرها من الاسباب القوية ، لان الحقيقة عدم حب الحيوانات دي بتدل على غياب التعاطف عند الشخص ده ، فاعرفي انك هتعيشي مع شخص مش رحيم لو اختارتي انك تتجوزيه.
3- مش بيثق فيكي:
على الرغم انك معملتيش حاجة تديه مبرر انه يشك فيكي او ميصدقيش ، ولكن برغم كل حاجة بيمسك تليفونك بيفتش فيه ، ودايما بيدور وراكي وبيشك في تصرفاتك ، ده مع مرور الوقت هيبقى اسوأ بكتير ، وهيعمل عليكي قيود كتير جدا في المستقبل لان دايما عنده عدم ثقة فيكي.
4- بيكسر وعوده:
ممكن انك تسامحي في غلط بسيط او انه بينسى في بعض الاوقات ، او حتى لو حاجة كبيرة ولكن بتحصل نادرا ممكن كمان انك تعديها ، ولكن لو كسر الوعود بيتكرر وبيزيد بشكل ملحوظ ، هنا لازم تكون في وقفة.
يعني لو دايما بيديكي وعود وبيقولك بكل ثقة انه هينفذها ، وبعدين متتنفذش ، يبقى اكيد دي مش علاقة مناسبة ، عشان كده لازم تستبعدي الشخص ده من حياتك.
5- مش بيبذل جهد في العلاقة:
العلاقة هي عطاء ومشاركة من الطرفين ، ولو انتي الشخص اللي دايما بيبذل مجهود عشن العلاقة تنجح والطرف التاني مكبر دماغه ومش بيحاول يعمل حاجة ، فاكيد دي هتكون علاقة مش ناجحة ، متتجوزيش الشخص اللي بيخليكي شيء ثانوي في حياته ، انتي ليكي كل الحق تكون ليكي الاولوية.
6- بيشوف نفسه كامل او مثالي:
اكيد الثقة في النفس دي صفة كويسة ومطلوبة ، ولكن لما الموضوع يتحول ان ان هو دايما صح في كل حاجة ، في الحالة دي هتبقى في مشكلة في علاقتك مع الشخص ده ، في حالة ان هو مش بيحاول يشوف اخطاءة ، فانتي كمان مش مطلوب منك تحاولي معاه.
7- بيدور على اعذار لكل حاجة:
في بعض الاحيان الامور مش بتمشي زي ما مترتب لها ونحتاج اوقات لاعادة جدولة بعض الحاجات اللي مخططين لها ، ولكن لو ده بيحصل منه بانتظام وبشكل متكرر ودايما بيخلف مواعيد وبيقولك حجج ومبررات ، فده معناه انه مش بيقدر الوقت ومش بيقدر مجهودك كمان.
8- مش بينسى الخلافات القديمة:
الخلافات مقبولة حتى لو كانت قوية ، ولكن مش بعد ما تنتهي ابدا ، يعني يفضل فاكر دايما كل الخلافات ومجرد ما يحصل خلاف جديد يبدأ يجيب كل القديم ، واكيد مافيش مشكلة ابدا ان كل واحد يعبر عن اللي جواه ، وان تبقى في محادثة بينكم بوجهات نظر مختلفة.
ولكن في النهاية لو موافقش على اي اقتراح من اقتراحاتك اثناء المناقشة وبيتمسك برايه دايما ، وباستمرار بيقعد يجيب الخلافات القديمة ، هنا عليكي انك تبعدي عن الشخص ده.
9- بينهي المحادثة ويقطع كلامك:
هو متحدث جيد جدا ورائع في كل مناقشاته ، ولكن لما انتي تيجي تتكلمي او تقولي اي حاجة بيقاطعك ومش بيخليكي تكملي كلامك ، لانه شايف ان كلامك مش هيعمل فرق في المناقشة ، هنا لازم تبعدي عن الشخص اللي مش بيديكي فرصة تعبري عن نفسك او شايف رايك مش مهم او مش فارق.
10- كذاب:
الكذبات الصغيرة, الكذبات البيضا, الكذبات البسيطة ممكن تعدي ، ولكن الكذبات اللي ممكن تأثر على العلاقة وبتحصل بشكل مستمر ، هنا المشكلة ، وفي الحالة دي لازم تواجهيه بكذبه.
لان العلاقات اساسها ثقة الطرفين في بعض ، وكتر الكذب هيأثر على ثقة الطرفين في بعض ، وهيضر العلاقة بالتدريج وهيدمرها.
11- بيدخن:
لو مش قادر انه يبطل تدخين ، فده بيدل انه صعب عليه يسيب اي عادة او يغيرها ، وممكن يزيد عنده الادمان لحاجات تانية ، وده دليل انه شخص ضعيف.
ولو مش عايز يبطل عادة التدخين عشان خاطرك ، فهل كده هو بيحبك كفاية؟ بالاضافة ان التدخين خطر على نفسه وعليكي ، فلو انتي عايزة تكوني اسرة معاه في المستقبل القريب لما يكون عندكم اطفال ، هل هيدخن امام الاطفال؟ ويخليهم يكتسبوا منه العادة دي وكمان يضرهم بالتدخين.
12- غير ناضج في تعاملاته:
سواء في علاقاته في شغله ومع زمايله ، لو من النوع اللي بيخسر اشخاص بعد خلاف صغير او تافه ومش مستاهل ، فاكيد مش هو الشخص المناسب اللي تكوني معاه ، لان لو هو في تعاملاته كده مع كل الناس ، يبقى توقعي انه في يوم ما هيقطع علاقته بيكي من غير اي مجهود ، واكيد مجرد القلق من شخصية الراجل اللي هتتجوزيه ده امر مش مقبول.
13- بيعاملك بشكل مسيء:
ده يعتبر سوأ وافظع سلوك على الاطلاق ، في حالة انه ضربك مثلا ، هنا انتي لازم تمشي فورا ، ومش هيحصل فرق لو رجع ندمان وحاول يصالحك ويجيبلك ورد وقالك ان ده مش هيتكرر تاني.
لانه لو ضربك مرة تأكدي ان ده هيتكرر تاني ، وبغض النظر انه لو حتى مش بيسيء معاملتك ، ولكن معاملته قاسية معاكي ، سيبيه فورا ، لان الارتباط بشخص قاسي هيدمرك ، عشان كده لازم تمشي في اقرب وقت.
في النهاية بعد وقت من العلاقة والفترة الاولانية اللي كل طرف بيظهر فيها احلى ما عنده ، بتبدأ تظهر الشخصية الحقيقية ، يعني ممكن تتفاجئي بعد كده بشخصية مختلفة عن اللي كانت معاكي في اول فترة ، ومتحطيش في دماغك انه ممكن يتغير لانه من الصعب جدا تغيير الرجل ، ولكن الاسهل انك تدوري على شخص تاني مناسب ليكي اكتر ، حاولي انك متوافقيش على اي حاجة اقل من اللي انتي تستحقيه.