افضل طرق لتجفيف الشعر بعد الغسيل
برغم ان الخبراء بينصحوا ان الشعر يتغسل من مرتين لتلات مرات خلال الاسبوع ، ولكن مع ذلك بعض البنات ممكن يغسلوه بشكل يومي ، وبالتالي الشعر هيبقى مبلول طول الوقت ، ولو انتي دايما معندكيش وقت لتجفيفه ، النهاردة من خلال السطور الجاية هنقولك افضل طرق لتجفيف الشعر بعد الغسيل.
افضل طرق لتجفيف الشعر بعد الغسيل:
1- تجفيف الشعر في الهوا:
من اسهل الطرق لتجفيف الشعر هو انك تسيبيه ينشف بشكل طبيعي في الهوا ، ودي طريقة مش محتاجة اي مجهود منك ، ولكن ممكن انها تاخد وقت طويل.
وزي ما كلنا عارفين ان التجفيف الحراري اللي بيكون باستخدام السيشوار بيكون مضر للشعر ، ولكن طريقة تجفيف الشعر في الهوا ممكن كمان تكون سيئة للشعر ، لانه لما بتسيبي الشعر ينشف في الهوا ، ممكن يبدأ يهيش ، وده هيخلي الشعر مجهد بشكل اكبر ومعرض للتكسر.
ولكن مع ذلك لو انتي بتحبي تسيبي شعرك ينشف في الهوا بشكل طبيعي ، في منتجات كتير ممكن تشتريها هتحمي شعرك وهتساعدك على تقوية الشعر اثناء تجفيفة ، وبعض المنتجات كمان ممكن انها تساعد في فك تشابك الشعر.
بعد ما تخلصي غسيل الشعر ، لازم تتأكدي انك بتسرحيه بشكل صح ، لانه لو اتسرح بطريقة غلط ، ممكن تخليه معرض اكتر للتكسر.
بدل ما تستخدمي الفرشة في تسريح الشعر ، استخدمي مشط خشب تكون سنانة واسعة هيكون افضل للشعر وهو لسه مبلول.
2- نشفي الشعر بفوطة جودتها عالية:
بغض النظر عن الطريقة اللي هتنشفي بيها الشعر ، لكن بنسبة كبيرة ممكن انك اول حاجة تعمليها بعد غسيل الشعر انك تمسكي الفوطة وتفركي الشعر عشان تتخلصي من المية الزيادة منه.
ولكن فرك الشعر بالفوطة بشكل قوي ممكن يأدي لتكسر وتلف الشعر بشكل كبير ، واللي هياخد وقت طويل بعد كده عشان تصلحيه تاني.
اول حاجة لازم تتأكدي انك بتستخدمي فوطة جودتها عالية ، زي الفوط اللي بتكون مصنوعة من الالياف الدقيقة ، هتساعد بشكل كبير انها تحافظ على شعرك صحي وقوي.
في كمان فوط مخصوص لتجفيف الشعر بشكل سريع بتتباع في المحلات ، النوع ده من الفوط مش بيتسبب في تلف الشعر ، وهيساعد على تجفيف الشعر بسرعة لو هتستخدمي طريقة تجفيف الشعر في الهوا بشكل طبيعي.
3- تجفيف الشعر بالسيشوار:
تجفيف الشعر بالسيشوار من الطرق الشائعة اللي بيستخدمها كتير من البنات ، ولكن كتير كمان بيحاولوا يتجنبوا الطريقة دي بسبب ان الحرارة ممكن تتلف الشعر.
ولكن على الرغم ان الطريقة دي من الافضل متعتمديش عليها طول الوقت ، لكن مش هيضر لو استخدمتيها من وقت للتاني على فترات ، ولكن لو انتي مضطرة تستخدمي السيشوار لتجفيف شعرك طول الوقت ، في طرق آمنة عن ازاي تنشفي شعرك بالسيشوار بشكل صحيح.
اول حاجة ، هتحتاجي للادوات المناسبة ، استخدمي سيشوار نوعه كويس ، على حسب نوع شعرك ، لان ممكن كل نوع شعر يحتاج سيشوار مختلف ، على سبيل المثال ، الشعر المجعد هيكون محتاج سيشوار مختلف عن الشعر المفرود.
بالاضافة للسيشوار هتحتاجي مشط ، وبعض البلسم من الانواع اللي ممكن تتساب على الشعر من غير غسيل او كريم لتصفيف الشعر ، وممكن تحتاجي ل Diffuser ، ال Diffuser او موزع الهوا بيساعد على توزيع الهوا السخن ، وممكن انه يساعد على تقليل الضرر على شعرك.
ولو انتي مضطرة تستخدمي السيشوار لتجفيف الشعر ، متستخدميش الحرارة العالية ، هي اه هتجفف شعرك بشكل اسرع ، ولكن كمان هتضره.
بمجرد ما تبقى معاكي الادوات اللازمة وتبدأي في تجفيف الشعر ، متقربيش السيشوار قوي من راسك ، كقاعدة عامة كده حاولي تخليه على بعد 6 بوصات من راسك.
4- طريقة Bunch And Scrunch:
ممكن تجففي شعرك بطريقة معينة عشان متضطريش انك تقضي وقت اكتر كمان لتصفيف الشعر بعد ما ينشف ، الطريقة دي هتنشف الشعر وهتعملك ستايل لشعرك في نفس الوقت.
جمعي الشعر كله في ايدك ، وابدأي حركيه كله على فوق ، وهتحتاجي انك تسرحيه كذا مرة وتكرري نفس العملية ، تمسكي الشعر وتحركيه لفوق باتجاه راسك ، وبعدين في الاخر جمعيه كله ولميه على الراس من فوق.
بمجرد ما تخلصي العملية دي هاتي فوطة ناعمة ولفي بيها الشعر.
لما تسرحي الشعر كذا مرة اثناء العملية دي هتدخلي الهوا بين خصلات الشعر وده هيساعد ان الشعر ينشف بشكل اسرع ، ولما تعملي الطريقة دي اتأكدي انك تستخدمي مشط خشب بسنان واسعة عشان تتجنبي تكسر الشعر.
5- Plop Hair:
لو شعرك مجعد او كيرلي ، ممكن تكون بالفعل جربتي الطريقة قبل كده ، الطريقة دي هتساعد على تجفيف الشعر بشكل اسرع ، وهيساعد على الحفاظ على تجعيدة الشعر او الكيرلي.
وعشان تعملي الطريقة دي ، هتحتاجي مرطب للشعر من الانواع اللي بتتساب في الشعر من غير غسيل ، وهتلاقي منتجات كتير تقدري تختاري منها المناسب لشعرك ، بعد ما تدهني المرطب اقلبي الشعر كله على قدام ولفيه بفوطه اعلى الراس.
سيبي الفوطة لمدة 20 دقيقة ، وبعدين فكيها وسيبي الشعر ينشف في الهوا.
