طريقة عمل تشيز كيك الجيلي والخوخ من غير فرن
تشيز كيك الجيلي والخوخ هي وصفة حلويات مناسبة جدا للصيف ، خفيفة وسهلة ومش محتاجة فرن ، وصفة سريعة جدا بمكونات بسيطة ومنعشة في حر الصيف ، ياللا نشوف الطريقة مع بعض بالخطوات.
تشيز كيك الجيلي والخوخ:
مكونات طبقة البسكويت:
– 36 قطعة بسكويت اوريو دهبي او اي نوع بسكويت تفضلوه.
– ½ كوباية زبدة سايحة غير مملحة.
مكونات طبقة الجبنة والخوخ:
– 1 معلقة صغيرة جيلاتين.
– 1 معلقة كبيرة مية.
– ½ كوباية زبدة غير مملحة تكون طرية بدرجة حرارة الغرفة مش مجمدة.
– 1 كوباية سكر بودرة.
– 227 جرام جبنة كريمي ناعمة.
– 1 معلقة صغيرة فانيليا.
– 1 ¼ كوباية كريمة خفق.
– 1 ¼ كوباية خوخ متقطع مكعبات صغيرة.
مكونات طبقة الجيلي:
– 85 جرام جيلي بطعم الخوخ.
– ½ كوباية مية مغلية.
– 1 كوباية زبادي خوخ.
– 4 كوبايات كريمة خفق.
– كام نقطة من الوان الطعام باللون البرتقاني – اختياري.
مكونات الطبقة اللي فوق:
– 2 – 3 كوبايات كريمة خفق.
– 113 – 141 جرام شوكولاتة بيضا.
طريقة تحضير طبقة البسكويت:
في الخلاط اطحني البسكويت لحد ما يبقى متكسر لفتافيت صغيرة ، حطيه في الطبق وقلبي معاه الزبدة لحد ما الزبدة تغطي البسكويت كله بشكل متساوي ، بعدها انقلي الخليط في صينية مستطيلة بحجم متوسط ، واضغطي عليه ساوية كله في الصينية ، دخليه الفريزر يتماسك لحد ما تحضري طبقة التشيز كيك.
طريقة تحضير طبقة الجبنة:
1- دوبي معلقة الجيلاتين في معلقة مية باردة ، وسيبيه على جنب لحد ما الجيلاتين يدوب خالص في المية.
2- في طبق كبير اخلطي الزبدة, الجبنة الكريمي, الفانيليا, والسكر بودرة ، قلبيهم مع بعض كويس لحد ما يبقى الخليط ناعم وكريمي ، ضيفي كريمة الخفق وامزجيهم مع بعض كويس ، وبعدين صبي عليهم الجيلاتين اللي دوبتيه واخلطيهم كويس.
3- باستخدام معلقة مطاط اخلطي مكعبات الخوخ بالراحة مع الخليط ، وافرديه فوق طبقة البسكويت اللي حضرناها ، وحطيها في التلاجة.
طريقة تحضير طبقة الجيلي:
1- في طبق كبير حطي الجيلي وعليه المية المغلية وقلبي لحد ما الجيلي يدوب تماما ، وبعدين ضيفي كوباية الزبادي الخوخ وامزجيهم مع بعض كويس.
2- ضيفي كريمة الخفق لخليط الجيلي والزبادي واخلطيهم لحد ما يمتزجوا مع بعض كويس ، ممكن تضيفي كام نقطة من الوان الطعام باللون البرتقاني لو حبيتي عشان تزودي اللون ، افردي الخليط ده فوق طبقة الجبنة وساويها كويس.
3- حطيهاا في التلاجة لمدة 2 – 3 ساعات لحد ما تتماسك.
طريقة تحضير الطبقة اللي فوق:
1- وزعي كوبايتين الكريمة المخفوقة على الوش.
2- هاتي الشوكولاتة البيضا ابشريها بالمبشرة بتاعة الخضروات بعد ما تغسليها كويس او بسكينة رفيعة قطعيه شرايح رفيعة اوي ، رشي الشوكولاتة المبشورة على الوش فوق الكريمة ، حطيها في التلاجة لمدة ساعتين كمان قبل التقديم ، او طول الليل.
3- بعد ما تاكلي منها احفظيها في التلاجة.
ملحوظة: بالنسبة لكريمة الخفق تقدروا تستخدموا من الانواع الجاهزة الموجودة في السوق ، او تعملوها في البيت هاتي 3 كوبايات من كريمة الخفق التقيلة Heavy whipping cream مع 2 معلقة صغيرة فانيليا واضربيهم مع بعض لحد ما يبقى الخليط ناعم وكريمي ، ضيفي لها السكر حسب الرغبة ، واستمري في الخلط على السرعة العالية لحد ما تتكون عندك كريمة خفق.