طريقة عمل غسول زيت شجرة الشاي في البيت للتخلص من حب الشباب
زيت شجرة الشاي من انواع الزيوت الفعالة جدا في التخلص من مشاكل الجلد المختلفة لانه مضاد للجراثيم ومضاد للفطريات ، وبيساعد في التخلص من حب الشباب ، وفي كتير من الدراسات اثبتت فعاليته ، والنهاردة هنقولك طريقة عمل غسول زيت شجرة الشاي في البيت بسهولة واللي تقدري تستخدميه للتخلص من حب الشباب.
طريقة عمل غسول زيت شجرة الشاي:
1- غسول زيت شجرة الشاي وجل الصبار:
المكونات:
– ½ كوباية من جل الصبار.
– 10 – 15 نقطة من زيت شجرة الشاي.
– ¼ كوباية عسل نحل.
طريقة التحضير والاستخدام:
1- اخلطي كل المكونات مع بعض كويس ، وصبي الخليط في ازازة بمضخة عشان تقدري تاخدي منه بسهولة ، وكده يبقى الغسول جاهز للاستخدام.
2- طريقة استخدامة بسيطة بلي وشك بالمية وخدي كمية من الغسول على ايدك دلكي بيها البشرة في حركات دائرية خفيفة لمدة دقيقة ، بعدها اشطفي وشك بمية باردة.
3- استخدمي الغسول ده مرتين في اليوم لنتايج فعالة.
فوايد الغسول:
العسل بيساعد في التخلص من التصبغ ، والصبار بيساعد على ترطيب البشرة ومنع الجفاف ، والغسول ده مش هيسبب اي جفاف للبشرة لانه مش بيحتوي على رغوة.
2- غسول زيت شجرة الشاي وزيت الخروع:
المكونات:
– 15 – 20 نقطة من زيت شجرة الشاي.
– ¼ كوباية زيت خروع.
– ½ كوباية من زيت الجوجوبا.
طريقة التحضير والاستخدام:
1- اخلطي كل الزيوت مع بعض ، وصبيها في برطمان للاستخدام.
2- بلي بشرتك بالمية وخدي 4 – 5 نقط من الغسول ، ودلكي البشرة في حركات دائرية خفيفة لمدة دقيقة ، وبعدين امسحي الغسول من على البشرة بمنديل.
3- استخدمي الغسول ده مرة واحدة في اليوم.
فوايد الغسول:
الغسول ده مفيد جدا للبنات اللي بيعانوا من جفاف الجلد ، وتقدري كمان تستخدمي الغسول ده كمزيل مكياج فعال جدا ، هيساعدك في التخلص من المكياج وعلاج حب الشباب كمان ، زيت الجوجوبا بيساعد على تنعيم البشرة ، وزيت الخروع بيساعد بشكل كبير في تجديد شباب البشرة.
3- غسول زيت شجرة الشاي وزيت اللافندر:
المكونات:
– 10 نقط من زيت شجرة الشاي.
– 5 نقط من زيت اللافندر.
– ¼ كوباية من صابون الغار “ابشرية وسيحيه في حمام مية سخنة”.
– ¼ كوباية مية ورد.
– 1 معلقة كبيرة من جل الصبار.
طريقة التحضير والاستخدام:
1- اخلطي كل المكونات مع بعض كويس ، وصبي الخليط في ازازة بمضخة.
2- بلي وشك بالمية ، وخدي كمية من الغسول على ايدك دلكي بيها البشرة في حركات دائرية خفيفة لمدة دقيقة ، وبعدها اشطفي البشرة بمية باردة.
3- استخدمي الغسول ده مرتين في اليوم.
فوايد الغسول:
الغسول ده بيحتوي على رغوة لانه بيحتوي على صابون الغار ، ويعتبر منظف فعال للبشرة المعرضة لحب الشباب ، زيت اللافندر بيحتوي على خصائص مضادة للالتهابات ، وبيساعد على تهدئة البشرة المتهيجة وتقليل الاحمرار والبثور.
