ازاي تحبي جسمك وما تحسيش بالحرج منه .. وتوقفي الاشخاص اللي بيسخروا منك

المجتمع مش بيخلينا من السهل اننا نتقبل اجسامنا زي ما هي ، وممكن الانتقاد المستمر لشكل جسمك ، يدخلك في دايرة مش بتخلص من الحكم والنقد عليكي طول الوقت ، وللاسف اننا وصلنا دلوقتي مستوى كبير من التنمر اللي بيخلي الناس بكل بساطة يسخروا من جسم او شكل اي شخص ، والنهاردة من خلال موضوعنا هنقولك ازاي تحبي جسمك وما تحسيش بالحرج منه وتستعيدي ثقتك في نفسك ، وازاي تتعاملي مع الاشخاص اللي بيسخروا منك.

ازاي تحبي جسمك:

للاسف الجيل اللي موجود دلوقتي مش بيشوفوا اي حاجة غلط في “التعبير عن ارائهم” بغض النظر عن الاراء دي ممكن انها بالفعل تأذي شخص ، معظم الولاد والبنات اللي في سن صغير بيخافوا ان يبقى عندهم وزن زيادة وبالتالي بيمشوا على انظمة غذائية قاسية وده ممكن يأثر عليهم بشكل سلبي لانهم بيكونوا في مرحلة النمو ، وبيبقوا محتاجين تغذية سليمة للنمو ، الابحاث اظهرت دلوقتي ان الاطفال اللي سنهم ما بين 10 – 12 سنة عندهم قلق وهوس بشكلهم ووزنهم عشان ميتعرضوش لاي سخرية او تنمر.

وبشكل مثير للصدمة ، ان بعض الاشخاص ممكن يفكروا انهم لما يخلوا الشخص يخجل من شكل جسمه ده يعتبر طريقة تحفيز عشان يغيروا نفسهم ، وانهم هيشتغلوا على نفسهم اكتر عشان يحققوا ده ، والجزء المحزن في الموضوع ان بعض الاشخاص هيتنمروا لمجرد السخرية او انهم شايفنها حاجة مضحكة.

لو في اي شخص عنده عيب في جسمه او وزن زايد ، قوليله ازاي يغير ده ، وازاي يبقى شكله احسن ، وتشجعيه على تحقيق ده بطريقة لطيفة من غير تجريح بدل الانتقاد او السخرية منه ، لان التنمر والسخرية هتخلي اي شخص يحس باحساس سيء اتجاه نفسه وهيفقد ثقته بنفسه ، لو شخص ما بيعاني من زيادة الوزن, نقص الوزن فهو بالتالي مضغوط بسبب ده من غير اي حاجة.

ال Body shaming او الحرج من الجسم ده ممكن يأدي للاكتئاب واضطرابات الاكل زي فقدان الشهية العصبي او الافراط في تناول الاكل وتقليل الاحترام بالذات ، هنقولك دلوقتي شوية نصايح لتجنب الحرج من جسمك وازاي تتعاملي مع الاشخاص اللي بيتنمروا عليكي او بيسخروا منك.

1- تجاهل التعليقات السلبية:

ابعدي عن التأثيرات السلبية او الاشخاص اللي بيخلوكي تحسي بعدم راحة ، لان الناس اللي زي دول بيفرحوا بمجرد ما يحسوا انك متضايقة ، ومحاولة تصحيح سلوكهم او تقوليلهم اللي انتي مريتي بيكي في حياتك مش مفيد ابدا ، افضل حاجة مع النوعية دي من الاشخاص هي التجاهل ثم التجاهل ، لما هتتجاهليهم هتقتلي الفرحة اللي بيحسوها لما بيضايقوكي وبالتالي هيتوقفوا عن مضايقتك او السخرية منك.

2- دافعي عن نفسك:

المرة الجاية لما شخص يسخر من شكلك او منك ، متنسحبيش بس وتفكري انك كده خلصتي الموضوع ، بالعكس دافعي عن نفسك وردي ، وعبري عن اللي جواكي ، وافتكري دايما ان ردك ده مش اذلال ليهم ، ولكن عشان تعرفيهم سلبية موقفهم والاثار المترتبة عليه.

3- دوري عن المشكلة الحقيقية:

اقعدي مع نفسك وخدي وقت في التفكير في المشاكل الحقيقية اللي بتضايقك ، وليه انتي في الموقف ده؟ ايه اللي انتي عايزة تغيريه في نفسك وليه التغيير ده مش بيحصل؟ في كتير من الاوقات بيكون في عوامل خارجية خارجة عن ارادتك ممكن تأثر على مجهودك في الوصول للي انتي عايزاه ، في الحالة دي اقبلي واعترفي بحقيقة الموقف ، فلو هي حاجة خارجة عن ارادتك متقفيش عندها وكملي حياتك.

4- شاركيها – اتكلمي عنها:

متكتميش كل حاجة جواكي ، عبري عن مشاعرك وطلعي اللي جواكي ، والكلام مع شخص انتي بتثقي فيه هيساعدك انك تتغلبي على المواقف السلبية اللي بتقابلك ، الفضفضة تعتبر علاج الطبيعة للتوتر والضغط ، كتم الحاجة جواكي هيضعفك اكتر ويدمر دوافعك الداخلية او الحافز اللي جواكي.

5- اعملي حاجة تخليكي مبسوطة:

روحي اتمشي في مكان مفتوح, اتكلمي مع صديق, كلي اكلة صحية, التحكم في الاكل من خلال عادات غذائية صحية, وانك تعيشي باسلوب حياة افضل وتمارسي رياضة بانتظام ، هتخليكي تحسي بالرضا عن نفسك ، وفي النهاية هتوصلي للتغييرات اللي انتي عايزة تشوفيها في نفسك ، حولي نفسك دايما لحاجة اكتر فايدة.

طريق انهاء الحرج من الجسم وانك تحبي نفسك مش مهمة صعبة ، هي بكل بساطة وصلي للي حواليكي انهم يخلوا رايهم لنفسهم والسماح لكل الناس يعيشوا في سلام ، حبي نفسك زي ما هي وخلي اللي حواليكي يعملوا زيك ، وافتكري دايما ان دي رحلتك الخاصة في الحياة ، وانتي محتاجة تكوني مرشدة لنفسك فيها.

10 طرق تعرفي بيهم اذا كنتي بتحبي نفسك ولا لا.. وازاي تتعلمي تحبي نفسك اكتر !