7 طرق ممكن مخدتك تأثر بيهم على صحتك
اختيار المخدة اللي هنام عليها كل يوم مهم جدا ، ويمكن محدش بيفكر انها مهمة للدرجة دي ، لكن نوع المخدة اللي بتختاريها وازاي بتعتني بيها ممكن يأثر على جودة نومك وصحتك العامة ، على سبيل المثال ، ممكن تكون مشكلة حب الشباب اللي انتي مش عارفة تتخلصي منه تكون بسبب المخدة ، والنهاردة من خلال موضوعنا هنتعرف على الاثار السلبية للمخدة على صحتنا.
الاثار السلبية للمخدة على الصحة:
1- الم الرقبة:
لو رقبتك في وضع غلط اثناء النوم ، ده هيتسبب انك تحسي بعدم راحة ، ومش بس وضع النوم اللي المفروض يكون صح ، لكن كمان مدى ثبات المخدة ، لانها لو كانت ناعمة جدا او قاسية جدا بالنسبة لك ، ده ممكن يسبب الم في الرقبة.
على سبيل المثال ، لو بتنامي علة جنبك ، يبقى لازم تختاري مخدة اكتر صلابة عشان توفري دعم كافي لرقبتك عشان متنحنيش للجنب اوي ، لو بتنامي على بطنك ، الافضل انك تختاري مخدة انعم ، عشان المخدة متدفعش رقبتك لورا اوي ، وده هيخليها منحنية ، ولو بتنامي على ضهرك ، المخدة المتينة مش هتبقى اختيار مناسب ليكي لانها ممكن تسبب اختلال التوازن عن طريق دفع رقبتك لقدام اوي.
2- آلام الضهر:
الطريقة اللي المخدة بتدعم بيها راسك ورقبتك وكتافك ممكن تأثر على ضهرك ، المحاذاه الغير صحيحة اثناء النوم ممكن انها تزود من آلام الضهر.
على سبيل المثال ، لو انتي بتنامي على بطنك ، الافضل تنامي على مخدة مسطحة ، والا هتخليكي تحسي بعد الراحة في اسفل ضهرك ، اما لو بتنامي على جنبك ، مهم انه يكون عندك مخدة عالية بما فيه الكفاية عشان تحافظي على رقبتك وعمودك الفقري على خط واحد ، ولو انتي متعودة تنامي على ضهرك ، يبقى لازم تختاري مخدة تدعم المنحنى الطبيعي للرقبة.
3- الشعور بالصداع:
النوم على مخدة غلط ممكن كمان يأدي للصداع ، لو مخدتك مش بتوفر الدعم المناسب ، هتفضل رقبتك في وضع مش مريح طول ما انتي نايمة ، وده ممكن يتسبب في اجهاد رقبتك ، اللي هيأدي للشعور بالصداع.
4- رد فعل تحسسي:
لو بتعاني من مشاكل في النوم, حكة في العين, او صداع, او بتعطسي وبتحسي بالتعب خلال فترة النهار ، يبقى لازم تنتبهي لمخدتك ، لازم تغسلي كيس المخدة بانتظام لو عايزة تتجنبي الاصابة بالحساسية ، والسبب ده هو عث الغبار اللي كتير من الناس بيعانوا من حساسية منه ، وممكن يسبب اعراض تانية زي الربو, الاكزيما, مشاكل الجيوب الانفية.
5- الارق:
سواء الحساسية او الم الرقبة بيخليكي صاحية طول الليل ، المخدة ممكن تكون السبب في انك مش بتنامي كفاية ، وده معناه ان الجسم معندوش الوقت الكافي لاعادة شحن نفسه ، والحرمان من النوم ده ممكن يسبب مشاكل كتير جدا من اول التأثير على مهارات التفكير عندك لزيادة خطر الاصابة بمرض السكر, السمنة, ارتفاع ضغط الدم.
6- مشاكل جلدية:
لما بتنامي على بطنك او على جنبك ، جلدك بيلامس كيس المخدة ، وبالتالي كل البكتيريا والاوساخ والزيوت اللي موجودة في الوش بتتنقل للمخدة ، ومع النوم عليها بشكل يومي ده ممكن يسبب تهيج لبشرتك وحب الشباب والبثور.
وفي طريقتين تقدري تحلي من خلالهم المشكلة دي ، ممكن تغيري كيس المخدة بانتظام ، او تشتري مخدة خاصة او غطا مخدة ، في بعض المخدات تصميمها بيمنعك انك تلفي لجنب واحد وتلمسي غطا المخدة ، وفي كمان اكياس مخدات بتحتوي على الفضة الايونية ودي مادة بتقتل البكتيريا الضارة.
7- الشخير:
المخدة غير المريحة او الصلبة اللي بتدفع راسك لقدام ممكن انها تسبب لك الشخير ، ولو بتعاني من حساسية من عث الغبار ، الالتهاب في انفك وحلقك ممكن انه يسد مجرى الهوا ، وده كمان هيسبب الشخير.
