طريقة عمل النودلز في البيت بالخطوات والفيديو
كتير مننا بيحب الاندومي او النودلز ، لكن كمان كلنا اكيد قرينا وسمعنا كتير انها مضرة ، ولكن سواء هي مضرة ولا لا ، اكيد الحاجة اللي معمولة في البيت بتكون اضمن ، عشان كده النهاردة هنقولكم على طريقة عمل النودلز في البيت بطريقة سهلة وبسيطة وصحية.
طريقة عمل النودلز:
مكونات عجينة النودلز:
– 2 كوباية دقيق (250 جرام).
– ½ كوباية مية (125 مل).
– رشة ملح.
– رشة بيكنج صودا.
مكونات الشوربة:
– 2 عود بصل اخضر.
– 2 فص ثوم.
– 1 معلقة صغيرة جنزبيل مفروم.
– 1 معلقة كبيرة صويا صوص.
– 1 معلقة صغيرة من صوص السمك او المحار (اختياري).
– 2 كوباية شوربة فراخ او خضار او لحمة (او نستبدل الشوربة بمكعب مرقة ومية).
للنكهات المختلفة:
– طعم الفراخ: ضيفي ½ صدر فراخ متقطع مكعبات.
– طعم الخضار: 1 كوباية مشروم متقطع.
– طعم الجمبري: ½ كوباية جمبري.
طريقة التحضير:
1- اخلطي الدقيق والمية مع بعض ، واعجينهم في محضرة الطعام او الخلاط شوية الاول ، ده هيسهل عليكي وهيختصر الوقت بدل ما تعجنيها بايدك كتير.
2- بعد ما تعجنيها شوية في الخلاط وتلم اعجنيها بايدك لحد ما العجينة تبقى ناعمة وسطحها املس.
3- بعد العجن سيبيها ترتاح حوالي 20 دقيقة ، وخلال الوقت ده هنجهز الشوربة.
4- قطعي البصل الاخضر ، وافرمي الزنجبيل والثوم.
5- في حلة على النار حطي حوالي معلقة زيت نباتي ، وضيفي البصل الاخضر, والثوم, والجنزبيل ، قلبيهم مع بعض لحد ما يدبلوا وريحتهم تبدأ تظهر.
6- ضيفي قطع الفراخ المتقطعة ، والصويا صوص ، وقلبي المكونات كلها مع بعض ، وممكن تضيفي شطة او فلفل حار حسب الرغبة.
7- لما الفراخ تستوي ضيفي الشوربة زي ما قولنا ممكن تضيفي شوربة فراخ, لحمة, او خضار, او مكعب مرقة مع مية ، حسب اختياركم او المتوفر ، وسيبي الشوربة لحد ما تغلي ارفعيها من على النار وكده تبقى شوربة النودلز جاهزة.
8- وممكن تستبدلوا الفراخ بالمشروم ، تعملوا نفس الخطوات ولكن بدل الفراخ هنضيف مشروم.
9- هنرجع للعجينة اللي سيبناها ترتاح ، رشي الرخامة دقيق ، وابدأي افردي العجينة بالنشابة سمك رفيع جدا.
10- طبقي العجينة على نفسها زي الاكورديون وما بين كل تطبيقة والتانية رشي دقيق عشان العجينة متلزقش في بعض ، بعد ما تطبقي العجينة كلها قطعيها بالسكينة شرايح رفيعة جدا على قد ما تقدري ، وممكن لو متوفر عندك مكنة باستا تفردي فيها العجينة وتقطعيها.
11- على النار حطي حلة كبيرة فيها مية ، ومعلقة ملح كبيرة ، لما المية تغلي نزلي فيها النودلز تتسلق من 1 – 2 دقيقة بس مش اكتر من كده وطلعيها من المية عشان القوام بتاعها يطلع مناسب.
12- وكده النودلز جاهزة ، حطي منها في طبق التقديم وضيفي لها الشوربة اللي حضرناها.
