طرق عمل سيروم للشعر بمكونات طبيعية لكل مشاكل الشعر

بقلمريهام محمود فيشعر visibility588

الشعر عشان يبقى طويل وقوي وصحي مش لازم ابدا بعلاجات غالية في صالونات او تاخد وقت طويل على ما تشوفي نتيجة ، ممكن باستخدام حاجات طبيعية وبسيطة تحققي ده ، والنهاردة من خلال موضوعنا هنقولك طرق عمل سيروم للشعر بمكونات طبيعية بسيطة ومش مكلفة هتديكي فوايد كتير لشعرك هنتعرف عليها بالتفصيل.

ايه هو سيروم الشعر؟

سيروم الشعر هو منتج للعناية بالشعر بيديه لمعان وملمس ناعم وبيمنع الهيشان وبيخلي شكله صحي ، على عكس زيت الشعر العادي هو معمول عشان يعالج سطح الشعر كاصلاح سريع ليه بدل من اختراق  الشعر من جوه ، وده بيخلي السيروم منتج تصفيف مناسب جدا لشعر ناعم وسلس عن طريق انه بيخلص الشعر من التجعد والتشابك ، لانه بيعمل طبقة واقية بتغلف كل خصلة وبتحميها ، وبيخلي الشعر ميتأثرش بالحرارة والرطوبة ، بالاضافة انه بيعكس الضوء وبيخلي الشعر بيلمع.

فوايد سيروم الشعر:

تقريبا يكاد يكون مستحيل العناية بالشعر بشكل يوم ، بالاضافة اننا يوميا بنستمر في تعريضه لاشعة الشمس والغبار والرطوبة والحرارة والعلاجات الكيميائية ومنتجات تصفيف الشعر القاسية ، وبالتالي سيروم الشعر بقى استخدامه ضروري عشان تحافظي عليه من الضرر وتحميه من العوامل دي ، ازاي السيروم ممكن يفيد شعرك:

– بيتحكم في تجعد وهيشان الشعر عن طريق تنعيم الياف الشعر.

– بيمنع تشابك الشعر وبيخليه ناعم واملس وسهل التعامل معاه.

– بيضيف لمعان فوري للشعر الباهت.

– بيحمي الشعر من الجفاف والتلف اثناء استخدام الحرارة سواء سيشوار او مكوى.

– بيحمي الشعر من عوامل البيئة زي الاشعة فوق البنفسجية, الغبار, الملوثات المختلفة في الجو.

– بيقلل من تكسر الشعر لحد كبير.

ليه الافضل تستخدمي سيروم الشعر الطبيعي المعمول في البيت؟

هنا السؤال ليه استخدم سيروم معمول في البيت في حين ان السوق مليان بانواع كتير من سيروم الشعر؟ تقريبا كل انواع السيروم التجارية بتحتوي على السيليكون ، واللي بيعمل طبقة زي البلاستيك على الشعر عشان يديكي الملمس الناعم واللمعان الفوري ، ولكن ده بالاضافة للمواد الكيميائية التانية اللي داخلة في تصنيعه ممكن تأدي في النهاية لتلف شعرك ، اللي هيأدي لتكسر وتقصف اطراف الشعر وتساقط الشعر ، عشان كده من الافضل انك تعتمدي على سيروم بمكونات طبيعية هتفيد شعرك وهتغذيه وهتحسن من صحته.

طرق عمل سيروم للشعر
طرق عمل سيروم للشعر

طرق عمل سيروم للشعر:

دلوقتي هنعرف 5 طرق لعمل سيروم الشعر بمكونات طبيعية بسيطة وسهلة ومغذية للشعر.

1- سيروم للمعان الشعر:

المكونات:

– 4 معالق كبيرة من زيت الافوكادو.

– 2 معلقة كبيرة من زيت الجوجوبا.

– 2 معلقة كبيرة من زيت اللوز الحلو.

– 2 معلقة كبيرة من زيت الارجان.

– 2 معلقة كبيرة من زيت بذور العنب.

طريقة التحضير:

لو شعرك باهت وحاسه انه شكله مش صحي ومش حيوي ، السيروم ده هيجدد شعرك ويرجع له اللمعان ، كل اللي هتعمليه هتصبي كل المكونات في ازازة صغيرة وترجيها كويس عشان تخلطي كل الزيوت مع بعض ، وبكده يكون السيروم جاهز للاستخدام ، ممكن تدهني منه على الشعر قبل ما تغسليه كل مره.

طرق عمل سيروم للشعر

2- سيروم لتنعيم الشعر:

المكونات:

– 4 معالق كبيرة من زيت الخروع.

– 2 معلقة كبيرة من زيت جوز الهند.

طريقة التحضير:

لو شعرك خشن تقدري تحضري السيروم ده بمنتهى السهولة وتحصلي على شعر ناعم ، كل الي هتعمليه اخلطي زيت الخروع مع زيت جوز الهند واستخدمي السيروم على الشعر بانتظام ، هيقضي تماما على جفاف الشعر وهيرطبه.

السيروم ده مناسب جدا للشعر الجاف والتالف لان زيت الخروع وزيت جوز الهند من الزيوت المركزة والمرطبة للشعر بشكل كبير ، ادهنيه قبل النوم وسيبيه على الشعر طول الليل لافضل النتايج.

طرق عمل سيروم للشعر

3- سيروم لتقوية الشعر:

المكونات:

– 8 معالق كبيرة من زيت بذور العنب.

– 10 نقط من زيت اللافندر.

– 2 كبسولة فيتامين E.

طريقة التحضير:

سيروم فعال جدا في علاج جفاف الشعر والتقصف ، وبيخلي الشعر قوي وصحي ، اخلطي كل الزيوت مع بعض في ازازة صغيرة ورجيها كويس ، وابدأي في استخدام السيروم على الشعر ، في فترة قصيرة هتلاحظي ان شعرك بقى اقوى واكتر كثافة.

طرق عمل سيروم للشعر

4- سيروم لفرد الشعر:

المكونات:

– 2 معلقة كبيرة من زيت الصويا.

– 2 معلقة كبيرة من زيت جوز الهند.

– 2 معلقة كبيرة من زيت الزيتون.

– 2 معلقة كبيرة من زيت الجوجوبا.

طريقة النحضير:

لو شعرك في كسرة او تمويجة انتي مش حباها ، استخدمي السيروم ده لفرد الشعر ، في طبق اخلطي كل الزيوت مع بعض وسخنيها شوية على النار ، وحطي الخليط على الشعر واتأكدي انك بتمرري صوابعك في شعرك من الجذور للاطراف لحد ما تبقى كل خصلة من الشعر مفرودة ، سيبيه لمدة من 15 – 20 دقيقة وبعدين اغسليه بشامبو خفيف.

5- سيروم للشعر الويفي:

المكونات:

– 2 معلقة كبيرة من زيت الجوجوبا.

– 5 نقط من زيت النعناع.

طريقة التحضير:

لو شعرك ويفي وانتي حابه شكله وعايزة تحافظي على التمويجة ولكن تخلي شكله صحي اكتر ، استخدمي السيروم ده ، اخلطي زيت النعناع مع زيت الجوجوبا ، وكده يبقى السيروم جاهز ، والافضل انه يستخدم والشعر مبلول شوية ادهنيه وسيبيه 30 دقيقة وبعدها اغسلي شعرك بمية باردة وهتلاحظي الفرق على شعرك بعدها.

السيروم ده فعال جدا لفروة الراس والشعر الدهني لان زيت الجوجوبا وزيت النعناع تعتبر من الزيوت الخفيفة على الشعر ، بالاضافة انها بتقلل من فرط انتاج الغدد الدهنية على فروة الراس لمنع الدهون الزيادة.

ازاي تستخدمي سيروم الشعر بطريقة صح؟

عشان تستفادي بالسيروم ، لازم تعرفي ازاي تستخدميه بشكل صح.

1- اول حاجة اختاري المكونات المناسبة لشعرك ، حطي في اعتبارك نوع شعرك واحتياجاته ، وعلى حسب ده حددي افضل وصفة سيروم مناسبة ليكي.

2- نضفي الشعر واغسليه كويس بشامبو وبلسم خفيف قبل ما تحطي السيروم عشان تنضفيه من بقايا الزيوت والاوساخ ومنتجات تصفيف الشعر.

3- جربي تستخدمي من السيروم كمية اقل من حجم حبة البسلة للشعر الناعم والخفيف ، وكمية بحجم عملة معدنية للشعر الكثيف ، لان الافراط في الكمية ممكن يضر اكتر من انه ينفع.

4- افركي كمية السيروم في ايديكي لمدة 5 – 6 ثواني عشان يسخن شوية ويتوزع بالتساوي على الشعر كله.

5- حطي السيروم على الشعر كله مع التركيز على الاطراف بدل من تدليك فروة الراس.

6- بعد ما تحطي السيروم سرحي الشعر بالراحة عشان توزعيه بالتساوي على الشعر ، وتقدري كمان تستخدمي اطراف صوابعك بدل المشط.

7- وعلى الرغم من انك تقدري تحطي السيروم على الشعر طول اليوم ، ولكن يفضل ان اول تطبيق للسيروم يكون على شعر مغسول ومبلول شوية او متنشف بالفوطة.

8- حطي اي منتجات تانية لتصفيف الشعر بعد السيروم عشان تحبسي فوايده في خصلات الشعر.

9- السيروم المفروض تستخدميه من مرتين لتلات مرات في الاسبوع ، لان اكتر من كده مش هيكون مفيد لصحة الشعر ، ولو مضطرة انك تحطي منه كل يوم كتصفيف للشعر استخدمي كمية صغيرة جدا.

10- السيروم مش هيغني عن زيت الشعر ، لان السيروم زي ما قولنا بيحمي الشعر من خلال عمل طبقة واقية حوالين الشعر ، ولكن الزيت بيعمل تغذية كثيفة للشعر ، وبالتالي عشان تحسني صحة الشعر من جوه ، متفوتيش روتين حمام زيت للشعر مرة في الاسبوع.

11- تقدري تستخدمي السيروم والزيت مع بعض ، بعد غسل الشعر ادهني السيروم وبعدها بشوية ادهني الزيت.

ازاي تستخدمي بذور الكتان لنمو الشعر