9 عادات هتساعدك تخسري وزن من غير ما تحسي
اكيد كلنا عارفين دلوقتي ان اكل وجبات صحية, وممارسة الرياضة يوميا, وتنظيم النوم, وشرب مية كتير ، كلها طرق فعالة لخسارة الوزن والحفاظ عليه من الترهل ، ولكن هل تعرفي انه من خلال اتباع عادات معينة ، تقدري تتحكمي في وزنك من غير ما تحسي؟ ده اللي هنعرفه النهاردة من خلال المقال بتاعنا هنتعرف على 9 عادات لخسارة الوزن ، اللي تقدري تمشي عليها بسهولة جدا ، وفي نفس الوقت نتايجها فعالة جدا في انقاص الوزن.
عادات لخسارة الوزن:
1- ربط حزام الامان:
ربط حزام حوالين الوسط اثناء الاكل تعتبر طريقة فعالة لفقدان الوزن ، يمكن تكون معلومة غريبة! ولكن الحقيقة انك لما تربطي وسطك بحزام باحكام وتضيقيه على الوسط ، في الحالة دي هتعرفي امتى انك دخلتي على منطقة الافراط في الاكل ، مع شد الحزام هتحصلي على اشارة للتوقف عن الاكل.
2- اشربي من كوباية طويلة:
لما بنشرب مشروباتنا المفضلة بنضيف سعرات حرارية زيادة لجسمنا ، وكمية السعرات الحرارية بتزيد بشكل ملحوظ بشكل خاص مع دخول الصيف ، هل تعرفي ان كوباية من العصير ممكن انها تحتوي على 20 جرام سكر و 120 سعر حراري؟ واختيار كوباية قصيرة وعريضة هيخليكي تحطي كمية عصير اكتر من انك تستخدمي كوباية طويلة ، الكوباية الطويلة هتخليكي تحطي كمية عصير اقل وده هيساعد على تقليل الوزن او على الاقل الحفاظ على الوزن من غير زيادة.
3- خدي وقتك في الاكل:
الحياة العصرية اللي احنا بنعيشها ومع ضيق الوقت ، نادرا لما نلاقي وقت لنفسنا في جدول المهام بتاعتنا خلال اليوم ، وفي بعض الاحيان بنتخطى بعض وجبات الاكل او بناكل واحنا مستعجلين ، وتخطي الوجبات ده ممكن تكون نتيجته كارثية ، لان الاكل بسرعة ممكن يخليكي تاكلي كمية اكل كتير ، كمان لما بناكل بسرعة ده هيخلينا نشرب كمية مية كتير ، وده هيأدي لتدمير وظائف الجهاز الهضمي ، عشان كده لازم تتأكدي انك بتاكلي ببطء وتدي وقت كافي للاكل وتاخدي وقتك في مضغ الاكل كويس والاستمتاع بيه.
4- اقعدي في حمام مية سخنة:
في دراسة اتعملت على مجموعة من الاشخاص اثبتت ان حمام المية السخنة ممكن انه يساعد في انقاص الوزن ، نص المشاركين في الدراسة اتمرنوا على العجلة لمدة نصف ساعة ، وباقي المشاركين قعدوا في حمام مية سخنة بدرجة 40 درجة مئوية ، والنتايج اظهرت ان القعدة في حمام المية السخنة مفيد زي ممارسة الرياضة في الجيم.
5- ضيفي الفواكة لنظامك الغذائي:
لو حطيتي طبق فاكهة قدامك على الترابيزة ، اكيد انك لما تحسي بالجوع هو اول حاجة هتروحي لها بدل ما تدوري على حاجة تانية ، من خلال الانتظام على العادة دي ، هتلاقي نفسك من غير وعي انك بتاكلي الاكل الصحي ، الفواكة غنية بالالياف والمية بالاضافة للعناصر الغذائية الاساسية ، واكل الفاكهة هيخليكي تحسي بالشبع ، وبالتالي ده هيمنعك من الافراط في الاكل.
6- اقعدي في اخر كرسي على الترابيزة:
لما تكوني بره البيت مع اصحابك او معزومة في مكان على الاكل ، طبعا الترابيزة هتكون مليانة بكل الاكل المغري ، في الحالة دي اتأكدي انك تختاري كرسي في الزاوية او تقعدي على اخر كرسي ، بحيث ان الاكل المغرية دي تبقى بعيد عنك او مش في متناول ايدك بسهولة ده ممكن يغريكي اقل ، وبالتالي هيقلل من فرص الافراط في الاكل ، حتى لو حسيتي بالاغراء ناحية اصناف معينة ، مش هتحبي انك تزعجي حد او هتتحرجي منه انه يمررلك الطبق كذا مرة.
7- ابتكري تقاليد جديدة:
حلو جدا اننا نبتكر تقاليد جديدة ونكسر التقاليد القديمة المسببة لزيادة الوزن ، يعني مثلا بدل من اكل التورتة والحلويات في عيد ميلادك ، اكسري التقليد ده من خلال تشجيع نفسك واصحابك على اكل حاجة صحية ولذيذة ، ولو انتي بتحبي الحلويات اوي ومش هتقدري تستغني عنه ، حاولي مثلا تمارسي تمارين او تعملي جلسة رقصة زومبا مع اصحابك قبل الاحتفال.
8- قطعي الاكل لقطع صغيرة:
تقطيع الاكل لقطع صغيرة في الطبق اللي هتاكلي فيه ، طريقة رائعة جدا لخداع العقل ، القطع الصغيرة هتخلي عقلك يحس ان في كمية اكل كبيرة في الطبق ، وعلى نفس الاتجاه ده ، الاكل في طبق صغير كمان هيكون فعال بنفس القدر ، لو عقلك حس او وصله اشارة ان في كمية اكل كتير ، هيخليكي تحسي بالشبع بشكل اسرع ، وبالتالي هيمنع الشراهة او الافراط في الاكل.
9- اتخيلي عواقب الاكل قبل ما تاكلي:
قبل ما تختاري اكل حاجة حلوة نفسك فيها او بيتزا او اي اكل مش بتقدري تقاوميه ، اتخيلي نفسك بتاكلي كل الاكل ده ، وان عواقبه هتكون سلبية عليكي وعلى صحتك ، تخيل العواقب قبل الاكل وتخيل نفسك وانتي بتاكليه هتقلل فرص الافراط في الاكل بشكل ملحوظ.
ال 9 عادات اللي احنا قولناهم دول سهل جدا انك تدخليهم في روتينك اليومي بكل بساطة ، وهتساعدك على خسارة الوزن من غير ما تحسي ومن غير اي مجهود.
