الدراسات اثبتت ان النساء بيتعرضوا للضغوط من الازواج اكتر مرتين من الاطفال!

ريهام محمود
ريهام محمود
440

النساء طول حياتهم بيعملوا ادوار كتير في الحياة ، هي الابنة الحنينة, الطالبة الشاطرة, الموظفة الذكية, الزوجة والام اللي بتتحمل كتير من المسئوليات فوق طاقة البشر ، واظهرت الدراسات ان دور الزوجة والام هو اكتر دور بيسبب ضغط عليها ، واكيد دي مش حاجة مفاجئة ، ولكن الاسباب ورا ده هي اللي ممكن تكون مصدمة ، والنهاردة من خلال السطور الجاية هنتعرف على اسباب الضغوط على المرأة ، وازاي تحلي المشكلة دي.

اسباب الضغوط على المرأة:

الازواج!

الحاجة اللي مش بتتغير مع مرور الوقت او تغير الزمن ، انك المفروض تتعاملي مع الزوج كانه طفل مع اطفالك اللي عندك بالفعل ، يعني الاعتماد عى الزوج في شغل البيت او انه يساعدك في اي اعمال منزلية لسه حلم متحققش لحد دلوقتي .

اسباب الضغوط على المرأة 1
اسباب الضغوط على المرأة 1

لحد النهاردة (وخصوصا بعد انجاب الاطفال) ، الست مطلوب منها واجبات كتير ، بما فيها الطبخ, المذاكرة للاطفال, تنضيف البيت, التخطيط لاي حاجة تخص الاسرة, ورعاية كل فرد من افراد اسرتها ، وعلى الرغم من اي ست بتتصرف على انها قادرة تقوم بكل المهام وتدير كل حاجة بسهولة ، الا ان الواجبات الاضافية بتأثر عليها جدا وعلى حياتها العملية.

اسباب الضغوط على المرأة 2
اسباب الضغوط على المرأة 2

وفي دراسة اتعملت من خلال مقابلة اكتر من 7000 ام سجلوا نسبة مستويات التوتر عندهم 8.5 من 10 ، بالاضافة ان 46% منهم اعترفوا ان ازواجهم بيسببوا لهم ضغوط اكبر في حياتهم من اطفالهم.

ونتيجة تانية مثيرة لللاهتمام خرجت من الاستطلاع ده وهي ان كل 3 من 4 امهات اعترفوا انهم بيقوموا بمعظم الاعمال المنزلية وحتى انهم بيقوموا بدور الاب كمان لوحدهم.

اسباب الضغوط على المرأة 3
اسباب الضغوط على المرأة 3

بالاضافة كمان ان واحدة من كل 5 امهات قالت ان واحد من اسباب احساسهم بالتوتر الزيادة هو انهم مش بيلاقوا مساعدة كافية في الاعمال المنزلية ، وكانوا مستاءين انهم مش بيلاقوا وقت كفاية يكملوا كل المهام اللي محتاجين يخلصوها خلال اليوم ، وده بيزود من مستويات التوتر عندهم.

والاسوأ من ده ان مع مرور الوقت ، الضغط الزيادة ممكن يأثر على الصحة بشكل خطير.

اسباب الضغوط على المرأة 4
اسباب الضغوط على المرأة 4

عشان كده لو في وقت الزوجة اتوفت وسابت الزوج لوحده صحتة بتتدهور بشكل خطير ، بسبب المسؤوليات الزيادة اللي بتقع على كتافه فجأة ، لكن في حالة الزوجات العكس هو اللي بيحصل! والزوجة بيخف من عليها الضغط اللي كان بيسببهولها الزوج ، وكشفت دراسة ان في حالة وفاة الزوج الاول ، بيبقى في تحسن عام في صحة الزوجة.

من كل اللي احنا قولناه فوق بنتأكد ان في مشكلة ، ولما تتوجد المشكلة ، لازم يكون في حل يصلح المشكلة دي ، فلو انتي حاسه انك بتعاني من المشاكل دي ، هنقدم لك النصايح اللي ممكن تساعدك على حل المشاكل المنزلية الشائعة اللي بتسبب الاجهاد والتوتر والضغط:

اتكلمي مع شريكك:

التواصل هو المفتاح ، وعدم وجودة هو السبب الجذري لكل مشكلة في الزواج ، عشان كده لو حسيتي انك مرهقة ومضغوطة زيادة وان زوجك مش بيساعدك بالقدر الكافي ، اقعدي معاه وكلمية واتناقشوا ، وخليكي صبورة اثناء الكلام وحاولي تعملي قايمة بالاعمال المنزلية وازاي ممكن تقسموا المهام بينكم بالتساوي ، واشرحي له ان تقسيم المهام والواجبات وسيلة لتقليل الضغط والتوتر.

اسباب الضغوط على المرأة 5

ثقي في شريكك عشان يعمل المهمة بشكل كويس:

معظم الزوجات بيتحملوا مسؤوليات واعباء اضافية مش لان ازواجهم مش مستعدين لتقديم المساعدة ، ولكن لعدم ثقتهم ان الزوج ممكن يقوم بالمهمة كما يجب ، عشان كده بدل ما تبقي مشككة في قدراته ، ثقي في زوجك انه بيحاول يبقى افضل اب وشريك وابدأي انك تديه واجبات منزلية يعملها.

ده هيساعدك في تخفيف الضغط والعبء من عليكي بشكل كبير ، ومع ذلك ، لو لسه مشككة فيه ، ابدأي اديه مهام بسيطة وسهل يعملها وبعدين اتنقلي للمهام الاصعب ، وافتكري دايما ان انتي وشريكك فريق ومحتاجين للثقة في بعض لو عيزة تعيشوا حياة خالية من الاجهاد والضغوط.

اسباب الضغوط على المرأة 6

ممكن يكون دور الام والزوجة صعب جدا ، ولكن انتي ممكن تخلي حياتك اسهل من خلال انك تخلي زوجك يشترك معاكي في كل حاجة بتعمليها ، ومع ذلك ، لو زوجك لسه بيرفض التعاون والمشاركة ، فانتي بقيتي عارفة المفروض تعملي ايه معاه من خلال اللي احنا قولناه في النقط اللي فاتت.

مقالات متعلقه

حركات وتصرفات هتخلي شريكك يحبك بشكل جنوني

حركات وتصرفات هتخلي شريكك يحبك بشكل جنوني

6 تصرفات انثوية شريكك بيحبها اكتر من اي حاجة تانية

6 تصرفات انثوية شريكك بيحبها اكتر من اي حاجة تانية

12 طريقة عملية للتعامل مع الزوج الغاضب

12 طريقة عملية للتعامل مع الزوج الغاضب