مكونات اساسية في منتجات العناية بالبشرة لو استخدمتيها بشرتك هتشكرك عليها
مستحضرات ومنتجات العناية بالبشرة اتطورت كتير ، وخبراء الجلدية دلوقتي اتوصلوا لتركيبات كتير مخصصة لكل نوع من انواع البشرة ، من الغسول, للمرطبات, للسيروم كل واحد فيهم هنلاقي منه للبشرة الدهنية بس, للبشرة الجافة بس, البشرة المختلطة بس ، ومش بس كده كمان للمشاكل الجلدية المختلفة من تصبغات, البشرة المعرضة لحب الشباب, وغيرها من المشاكل ، هنلاقي منتجات لكل مشكلة لوحدها ، وواحد من الاسئلة اللي هنسألها لنفسنا ، ازاي تقرري شراء منتج معين للعناية بالبشرة؟ النهاردة هنقولك 5 من مكونات العناية بالبشرة الاساسية المفيدة لبشرتك ، عشان تدوري عليها على المنتج ، والمكونات دي من اكتر المكونات اللي بينصح بيها دكاترة الجلدية ، وهنتعرف على فايدة كل مكون ايه عشان تختاري اللي بشرتك محتاجاه
اكيد محدش فينا قبل كده اهتم بقراية مكونات المنتج ، وحتى لو قرتيها هتحسي انك مش فاهمة منها حاجة ، عشان كده النهاردة هنساعدك من خلال موضوعنا ازاي تختاري المنتج ، عشان تتجنبي استخدام اي منتجات ممكن تضر او تتلف بشرتك.
مكونات العناية بالبشرة الاساسية:
1- احماض الفا هيدروكسي AHAs A.K.A Alpha-Hydroxy-Acids:
دي تعتبر احماض عضوية ، واحماض الالفا هيدوركسي بشكل عام بتحتوي على حمض الماليك, حمض الطرطريك, حمض الاكتيك ، وكلها مكونات شائع استخدامها في منتجات العناية بالبشرة ، وفي مجموعة كبيرة من الاحماض اللي بتساعد على تحفيز تجديد البشرة ، واحماض الفا هيدروكسي واحد منهم ، اللي بيستخدم للتقشير السطحي للبشرة ، والتطبيق بالجرعة الصحيحة لاحماض الالفا هيدروكسي ليه فوايد تجميلية طويلة الامد للبشرة زي تحسين نسيج ومرونة الجلد, تقليل التجاعيد والخطوط الرفيعة ، وغيرها من المشاكل.
2- حمض الهيالورونيك:
معروف كمان باسم الهيالورونان ، وهي مادة لزجة وشفافة جمسنا نفسه بينتجها ، ووظيفته الاساسية انه بيساعد على الاحتفاظ بالرطوبة او محتى المية في انسجة البشرة ، وسيروم ترطيب الهيالورونيك يعتبر افضل صديق للبشرة ، لانه بيحافظ على ترطيب البشرة ترطيب عالي جدا وبيخليها ناعمة ونضرة ، وانواع السيروم اللي بتحتوي على الحمض ده تعتبر خفيفة جدا على الجلد وتعتبر جرعة مثالية من المية لبشرتك كل يوم الصبح.
3- السيراميد:
لو بتعاني من بشرة جافة ومجهدة وباهتة ، السيراميد يعتبر واحد من المكونات العناية بالبشرة اللي لابد منها ، لانه بيعمل زي حاجز حماية لبشرتك ، بيساعد في تثبيت رطوبة البشرة وبالتالي بيمنع الجفاف ، حتى انه بيحمي البشرة من اي ضرر بيئي, وكمان بيمنع شيخوخة البشرة ، يعني اعتبري السيراميد هو حاجز قوي بيحمي بشرتك من اي ضرر او تلف.
4- الريتينول:
يعتبر من اكتر المكونات الشائعة اللي ممكن يستخدم من غير وصفة طبية لمكافحة الشيخوخة ، الريتينول هو في الاساس مشتق من فيتامين A, وفي منه اصدارات او انواع تانية زي الريتينالديهيد والريتينيل بالميتات واللي بتشبه الريتينول لحد كبير ولكن تعتبر اقل فاعلية منه ، الريتينول بيساعد على تحسين نسيج البشرة وبيحافظ على مرونتها ، وكمان بيساعد على الحفاظ على بشرة موحدة ، وبيساعد في منع ظهور المسام ، ومش بس كمان بيساعد في علاج حب الشباب ، ولكن لازم تحطي في اعتبارك ان الجلد بياخد وقت على ما يتعود على الريتينول ، عشان كده اول ما تبدأي استخدامه حطيه الاول يوم ويوم وبعدين حطيه كل يوم ، يعني عودي البشرة عليه بالتدريج.
5- فيتامين C:
ده واحد من المكونات اللي ليه فوايد كتير جدا ، اولا هو مضاد للاكسدة ، وبيساعد على منع سرطان الجلد ، بيمنع الشيخوخة ، بيمنع الجذور الحرة المضرة للجلد اللي بيسببها التلوث البيئي واشعة الشمس فوق البنفسجية ، كمان بيخفف من البقع الغامقة, بيعزز انتاج الكولاجين ، والميزة بقى انك تقدري تاكلي فيتامين C وتستفادي بيه من خلال الاطعمة الغنية بيه زي الفواكة الحمضية والفلفل الرومي.
حطي المكونات دي في اعتبارك لما تيجي تشتري اي منتج للعناية بالبشرة بعد كده ، دي تعتبر اهم المنتجات اللي بينصح بيها دكاترة الجلدية.