ازاي طريقة شيلك للشنطة بتكشف عن شخصيتك
شنطة الايد هي الحاجة الاساسية لاي بنت اللي متقدرش تستغنى عنها بشكل يومي ، لانها بتساعدنا نشيل فيها كل حاجة احنا محتاجينها بره البيت ، بالاضافة انها مكملة للبس ، ولكن هل ده كل حاجة خاصة بشطنة اليد؟ الحقيقة لا ، لان خبراء لغة الجسد كشفوا ان طريقة شيل الشنطة ممكن تقول كتير عن شخصيتك اكتر ما انتي متخيلة ، والنهاردة من خلال موضوعنا هنتعرف على الصفات الشخصية من طريقة شيل الشنطة.
الصفات الشخصية من طريقة شيل الشنطة:
1- فوق الكتف:
المرأة اللي مش بتستخدم الشنطة عشان تخفي الجزء اللي قدام من الجسم بتكون في العادة واثقة من نفسها جدا ، لانها بتبقى ضامنة ان مافيش ديفوهات هتظهر ، فلما تشيلي الشنة فوق كتفك ، دي رسالة انك مش محتاجة اي حاجة تستخبي وراها ، ده غير ان طريقة الشيل دي عملية جدا لان الشنطة هتبقى بعيدة عن طريقك وهتخلي ايديكي حرة.
2- على كتف واحد وقريبة من الجسم:
لو شايلة الشنطة على كتف واحد ومسكاها باحكام اوي قريبة من جسمك ، هنا ممكن تكوني بتعاني من خوف او انخفاض في احترام الذات او القلق الدايم من سرقة شنطتك.
3- كروس من قدام:
غالبا الطريقة دي في شيل الشنطة بتدل انك صاحبة شخصية حذرة ، وشخص متحفظ وخجول.
4- كروس من ورا:
لو بتحبي الشنطة كروس ولكن من ورا ، ده معناه ان انتي شخصية محاربة, وهدفها واضح ، وانك شخصية مستقلة.
5- عند منطقة الكوع:
خبراء لغة الجسد كشفوا ان البنت اللي بتشيل الشنطة عند منطقة الكوع بتكون صاحبة شخصية قوية ، ودايما بيبقى عندها شعور بالتفوق.
6- تحت الذراع:
عادة بنمسك الشنطة كده لما يكون الموديل بتاعها اصلا بيتطلب شيلها بالطريقة دي ، زي الشنطة الكلتش ، ولكن لو انتي بتحبي تشيلي الشنطة بشكل عام بالطريقة دي ، ده بيبعت اشارة ان الشخصية دي مرتاحة ومش بتهتم بمظهرها بشكل مفرط ، ولو ماسكة الشنطة تحت الذراع باحكام شديد وضاغطة على الجسم ، فده بيبعت اشارة بالعصبية او انعدام الامان.
7- شيلها بطريقة متدلية:
بصرف النظر عن ان الطريقة دي مش اكتر طريقة عملية في شيل الشنطة ، ولكن هي بتنقل احساس بعدم الامان ، وشيل الشنطة قدامك بالطريقة دي بيبقى زي حاجز بينك وبين العالم الخارجي ، ولو شايلاها بايديكي الاتنين قدامك دي اشارة بعدم الثقة بالنفس.