ازاي تنظمي المكياج بتاعك بسرعة وبطريقة سهلة

بقلمريهام محمود فيمكياج visibility180

هل عايزة تنظمي مكياجك وتغيريه بسهولة وبسرعة؟ النهاردة من خلال موضوعنا هنتعرف مع بعض على شوية نصايح لتنظيم المكياج بطريقة سهلة وسريعة ، ياللا نبدأ.

نصايح لتنظيم المكياج:

1- قسميه:

وجود مكياج كتير هيكون مربك بالنسبة لك ومش هتبقي عارفة تبدأي منين ولا تعملي ايه ، وممكن ياخد منك وقت طويل اوي في التنظيم ، عشان كده الافضل انك تقسميه وتحطي كل نوع مع بعضه ، وتبدأي تنظميهم واحدة واحدة ، وكل ده طبعا بيتوقف على المنتجات اللي عندك ، ولكن ممكن تبدأي مع منتجات العناية بالبشرة, والوجه, والعيون, والشفايف, وتمشي بالترتيب رتبي كل نوع وخلصيه وابدأي في اللي بعده.

نصايح لتنظيم المكياج
نصايح لتنظيم المكياج

2- اتأكدي من تاريخ انتهاء الصلاحية:

المكياج زيه زي اي حاجة ليه تاريخ انتهاء صلاحية ، هتبقي محتاجة وانتي بترتبي المنتجات انك تتأكدي من التاريخ وتشوفي اذا كانت منتهية الصلاحية ولا لا ، وهنقولك على شوية حاجات تحطيها في اعتبارك:

اي منتج مكياج هتلاقي موجود عليه علامة شبة العلبة الصغيرة فيها رقم ، وعادة الرقم ده بيكون 6, 8, 12, او 18 ، وده بيكون الرقم اللي بيقولك المنتج ده صالح لقد ايه من اول ما تفتحيه وتبدأي تستخدميه ، وعادة المنتجات السائلة بتستمر لمدة 6 شهور زي الماسكارا ، وباقي المنتجات ممكن تقعد عندك لحد من 12 ل 18 شهر ، واتخلصي من المنتجات القديمة فورا.

في بعض الاحيان ممكن المنتجات تبوظ قبل انتهاء تاريخ الصلاحية ، عشان كده لازم تتأكدي من حالة كل منتج كويس ، اتأكدي ان لونه, ريحته, قوامه متغيروش ، لو لقيتي المنتج فيه سائل منفصل ، ده معناه انك لازم ترميه ، والمنتجات بتبوظ قبل انتهاء الصلاحية بتاعتها بسبب تخزينها بطريقة غلط.

نصايح لتنظيم المكياج

3- قرري ايه اللي انتي عايزة تحتفظي بيه:

اتخلصي من اي منتج مش بتستخدميه او مش حباه ، لو عندك مثلا كريم اساس مش مناسب للون بشرتك اتخلصي منه.

لو عندك منتجات مش بتستخدميها وجديدة ، ممكن تديها لحد من صحباتك تكون مناسبة ليها اكتر ، ومترميش المنتجات اللي حالتها كويسة.

لكن مع ذلك متتخلصيش من كل المنتجات اللي مش بتستخدميها ، على سبيل المثال ، لو عندك كريم اساس لونه غامق عن لون بشرتك ، ممكن تحتفظي بيه للصيف ، لان بشرتك ممكن تبقى اغمق شوية بسبب التعرض للشمس وهتحتاجيه ، ولكن مش هيبقى درجة اللون المناسبة ليكي في الشتا وبشرتك افتح او بلونها الطبيعي.

4- تخزين المكياج:

بمجرد ما تنظمي مكياجك ، هيجي دلوقتي وقت التخزين ، حطيهم بترتيب بحيث انك توصلي لاي منتج بسهولة ، اتجنبي تخزين المكياج في الحمام ، لان الرطوبة ممكن تخلي المنتجات تبوظ بشكل اسرع قبل تاريخ انتهاء صلاحيتها ، كمان متخزنيهاش في ضوء الشمس المباشر ، احفظيها في مكان مظلم وبارد ميكونش فيه مستويات رطوبة عالية هيكون مثالي جدا.

حاجات لازم تحطيها في اعتبارك قبل ما تشتري المكياج