7 حاجات الرجالة بيكونوا عايزينها موجودة في العلاقة

ريهام محمود
ريهام محمود
3087

دايما بنأكد وبنسأل على اللي الست عايزاه ، ولكن تعالوا نغير السؤال ونعرف الرجالة عايزين ايه؟ هل الرجالة كلهم بيفضلوا نفس الحاجات؟ في حين ان كل راجل بيختلف عن التاني ، ولكن كلهم تقريبا بيبقوا مشتركين في بعض الحاجات ،والنهاردة من خلال السطور الدايه هنقولك قايمة الحاجات اللي الرجالة بيحتاجوها والمفروض تعمليها عشان تحافظي على علاقة صحية.

الحاجات اللي الرجالة بيحتاجوها:

1- علاقة حميمية صحية:

اكيد مش معلومة جديدة او مفاجئة ان معظم الرجالة بيكون عندهم الشهوة الجنسية عالية ، وفكرته عن العلاقة الحميمية ممكن تكون مختلفة عنك او بيشوفها بطريقة تانية ، ولكن لو عايزة العلاقة الحميمية تكون صحية ، يبقى لازم تكوني معبرة اثناء العلاقة ، وتكتشفوا بعض وكل طرف يعرف التاني بيحب ايه ، ومتبقيش خجولة ، شريكك هيحبك اكتر وانتي صريحة معاه ومن وقت للتاني انتي اللي بتوجهيه في العلاقة ، وتبقي مسيطرة احيانا.

الحاجات اللي الرجالة بيحتاجوها 1
الحاجات اللي الرجالة بيحتاجوها 1

2- طبطبي عليه وبيني له حبك:

مجرد حقيقة انك معاه ده لوحده مش كفاية ، لازم تبيني له ده ، يعني مش معنى انك متأكدة من حبه ليكي انك تهمليه ، قولي له دايما انك بتحبيه وليه بتحبيه ، قولي له كلام حلو سواء مثلا لابس لون حلو عليه, او عمل اي تصرف حلو عجبك امدحيه, ساعدك في البيت بيني له انك مقدرة ده وكافئية على مساعدته بحضن او قبلة و كلام حلو.

واحنا اكيد مش بنطلب منك تعلي “الانا الذكورية” عنده ولكن بنطلب منك بس تراعي وتعرفي انه حساس ، صدقي او لا الرجالة فعلا حساسين جدا ، وبيميل للبرود لو حس منك اهمال لفترة طويلة.

الحاجات اللي الرجالة بيحتاجوها 2
الحاجات اللي الرجالة بيحتاجوها 2

3- التواصل:

التواصل امر حيوي جدا لاي علاقة ، الستات دايما بتتعامل مع الراجل بالتلميحات وبيحبوا يحافظوا على جو الغموض ، ولكن الرجالة مش دايما شاطرين في فهم التلميحات والاشارات ، وفي الحالة دي دايما الست تتهم الراجل انه مش مهتم وعنده لامبالاه او بارد ، ولكن في الحقيقة هو مش بيكون واصله اللي تلميحك ومش فاهمه.

عشان كده مهما كان اللي انتي حاسه بيه وشايفة انه صعب او معقد ، ناقشيه معاه ، حتى لو مفهمش احساسك في اللحظة دي ، ولكن الاكيد انكم هتخرجوا من الموقف وانتوا حاسين بالحب اكتر وانكم قريبين من بعض اكتر.

الحاجات اللي الرجالة بيحتاجوها 3
الحاجات اللي الرجالة بيحتاجوها 3

4- حياة متوازية:

دايما الرجالة بيميلوا انهم يفرضوا اسلوب حياتهم على شريكتهم ، ولكن من جواهم معظم الرجالة بيحبوا ان شريكتهم يبقى ليها حياة خاصة بيها ، عشان كده بنقولك متلغيش هويتك وشخصيتك ، لازم يكون عندك دايرة اصحاب وهوايات ، ده مهم جدا لعلاقة متوازنة وصحية ، عشان اي زوجين يعيشوا سعدا مع بعض ، مهم ان كل واحد فيهم يحتفظ بالمساحة الخاصة بيه ، ولكن ده اكيد مش معناه انكم متبقوش “جسدين وروح واحدة” اكيد الارتباط هيفضل مع وجود مع مساحة خاصة لكل طرف واحتفاظ كل واحد بهويته وشخصيته.

الحاجات اللي الرجالة بيحتاجوها 4

5- الاحترام:

المكونات الاساسية لعلاقة صحية هو الولاء والاحترام ، في حين ان الحميمية والعاطفة والتوافق مهمين ، ولكن انها في بعض الاحيان بتحجب الولاء والاحترام ، لان كل ما قربتي اكتر بيبقى من الصعب اظهار الاحترام ، ودايما بنبقى معتمدين على الحاجات الواضحة للشريك من غير ما نقول ، ولكن الشريك دايما محتاج لاعترافك وتقديرك ، يعني لو في لحظات دخلتوا في خلاف وحصل بينكم مشادة بالكلام وجرحتوا بعض باي شكل ، في النهاية مهم انك تتخلصوا من اي حاجة ممكن تعكر العلاقة وتقولي لشريكك اللي انتي حاسه بيه فعلا من ناحيته.

الحاجات اللي الرجالة بيحتاجوها 5

6- خليكي واضحة:

مافيش حد يحب انه يتلعب فيه او يتغش من الشريك باي شكل ، يعني مافيش داعي انك كل شوية تختبري حبه بحيل زي مثلا انك تخليه يحس بالغيره ، بدل كده عالجي مخاوفك وخليكي صريحة وواضحة معاه ولو حاسه باي حاجة قوليها من غير لف ودوران.

الحاجات اللي الرجالة بيحتاجوها 6

7- الراحة:

اخر حاجة واللي محتاجينها تكون موجودة في العلاقة اكتر حاجة هي الراحة ، لازم كل طرف يكون ملجأ الطرف التاني اللي يرتاح معاه ، يعني مثلا متقعديش تشتكي له من حاجات بعد يوم طويل مرهق ، اختاري افضل وقت للتواصل والكلام والنقاش ، اعرفي مزاج شريكك وقدري مستويات طاقته وقلقه ، لان انتي الداعم ليه ، هو اكيد الراجل والحماية ليكي ، ولكن هو كمان محتاج انك تدعميه وتطبطبي عليه وتفهمي اللي هو بيمر بيه وتتغلبوا على كل حاجة سوا.

الحاجات اللي الرجالة بيحتاجوها 7

مقالات متعلقه

جمل لو قولتيهم لشريكك هتخليه يدوب في حبك

جمل لو قولتيهم لشريكك هتخليه يدوب في حبك

حركات وتصرفات هتخلي شريكك يحبك بشكل جنوني

حركات وتصرفات هتخلي شريكك يحبك بشكل جنوني

6 تصرفات انثوية شريكك بيحبها اكتر من اي حاجة تانية

6 تصرفات انثوية شريكك بيحبها اكتر من اي حاجة تانية