طريقة عمل وصفة جولاب جامون – اشهر الحلويات الهندية
جولاب جامون هو من اشهر انواع الحلويات الهندية الكلاسيكية ، واكيد كتير مننا من متابعين الافلام الهندية شافوا في الافلام وكان نفسهم يجربوه ، وهو من انواع الحلويات الاساسية اللي بتتقدم في الافراح الهندية ، والنهاردة من خلال موضوعنا هنعرف مع بعض طريقة عمل وصفة جولاب جامون بالخطوات والفيديو.
طريقة عمل وصفة جولاب جامون:
مكونات الشربات:
– 1 ½ كوباية سكر.
– 4 فصوص حبهان.
– 1 ½ كوباية مية.
مكونات العجينة:
– 1 كوباية لبن بودرة.
– ¼ كوباية + 1 معلقة كبيرة دقيق لجميع الاغراض.
– ¼ معلقة صغيرة كربوناتو.
– 1 معلقة صغيرة سمنة.
– 1 معلقة كبيرة زبادي مع ¾ معلقة كبيرة عصير ليمون و 2 معلقة كبيرة لبن اخلطيهم مع بعض.
طريقة تحضير الشربات:
1- ضيفي السكر مع الحبهان في حلة على النار ، وضيفي لهم المية.
2- اغلي الخليط مع بعض لحد ما يبقى قوامه سميك شوية وميكونش ولا خفيف اوي ولا سميك اوي يبقى القوام وسط ولزج ، بعدها ارفعيه من على النار وضيفي له شوية مية ورد.
طريقة عمل العجينة:
1- اخلطي اللبن البودرة مع الدقيق والكربوناتو.
2- امزجيهم مع بعض كويس جدا ، وبعدين ضيفي لهم معلقة السمنة.
3- امزجي كل المكونات مع بعض كويس.
4- هاتي معلقة الزبادي ، وعصير الليمون مع اللبن واخلطيهم كويس.
5- ضيفي 1 ½ معلقة كبيرة من خليط الزبادي واللبن والليمون لخليط اللبن البودرة والدقيق ، واستخدمي الباقي حسب الحاجة ، هنا في الوصفة استخدمنا تقريبا معلقتين كبار ، ولو لقيتي العجينة جافة زودي لها شوية لبن.
6- اعجني الخليط بايدك لحد ما تتكون عندك عجينة لزجة شوية ، ولو لقتيها بتلزق في الصوابع ادهني شوية زيت واعجنيها لحد ما تبقى العجينة قاسية شوية بس في نفس الوقت ناعمة ، وده المفروض القوام الصح للعجينة عشان تطلع معاكي مظبوطة ، ولو لقتيها لسه بتلزق في الايد ممكن ترشي رشة دقيق صغيرة عشان تظبطيها.
7- قسمي العجينة ل 14 – 18 قطعة متساوية واعمليها على شكل كرات صغيرة ناعمة من غير اي خطوط او شقوق ، ومتعجنيش ولا تضغطي على العجينة وانتي بتشكليها خلي ايدك خفيفة عليها.
8- في طاسة سخني السمنة او الزيت ، ويفضل انها تتحمر في السمنة.
9- لازم درجة حرارة السمنة او الزيت تكون متوسطة مش سخنة اوي ، والا الجولاب جامون هيتحمر اوي من بره ويغمق ويفضل ني من جوه.
وعشان تتأكدي من درجة الحرارة الصح ، نزلي حتة عجين صغيرة في الزيت لازم حتى العجين تطلع فوق ببطء من غير ما لونها يتغير اوي ، دي تعتبر درجة الحرارة المناسبة ، لكن لو حتة العجين ارتفعت بسرعة ، ده معناه ان الزيت سخن اوي ، ارفعيه من على النار لحد ما حرارتة تقل شوية وبعدين رجعيه على النار ونزلي فيه كور الجولاب جامون.
10- اقلي كرات الجولاب جامون في الزيت على نار متوسطة لمدة دقيقة لدقيقتين ، وخلي بالك انهم لما يتقلوا حجمهم هيزيد عشان كده وفري لهم مساحة ومتمليش الطاسة على الاخر.
11- بعد دقيقتين من القلي ، قللي النار على درجة حرارة منخفضة واقليهم لحد ما يبقى لونهم دهبي ، مع التقليب المستمر عشان تقليها من كل الجوانب بالتساوي.
12- لما لونهم يتحول للون بني دهبي طلعيهم من السمنة.
13- حطيهم مباشرة في الشربات ، والشربات لازم يكون سخن بدرجة معقولة مش سخن اوي بحيث انك ممكن تحطي صوباعك فيه تحسي بالسخونة بتاعته وتتحمليها.
14- سيبي كرات الجولاب جامون منقوعة في الشربات لمدة 3 ساعات قبل التقديم عشان تتشرب الشربات كويس من جوه.
15- بعدها قدميها وزينيها بالفستق المفروم.
