7 توقعات المفروض متدخليهاش في الجواز

ريهام محمود
ريهام محمود
1758

الدخول في عالم الزواج يعتبر من اكتر القرارات الحاسمة اللي ممكن تاخديها في حياتك ، ولما تتجوزي حب حياتك ، من الطبيعي جدا ان يكون ليكي توقعات معينة مع شريكك ، ووجود التوقعات دي صحي جدا ، ولكن مع ذلك ، مهم انك تحافظي على التوقعات الصحية وتكوني صادقة وواضحة عن اهميتها بالنسبة لك ، ولازم تكون التوقعات معقولة وواقعية ، لان غير كده ، ممكن تتسبب في فشل الجواز ، والنهاردة من خلال السطور الجاية هنقولك 7 توقعات متدخليهاش في الجواز ، عشان تعيشي حياة سعيدة وناجحة.

توقعات متدخليهاش في الجواز:

كل ست لازم تفهم ان الزوج ده انسان زيها ، هو مش سوبر مان يقدر يصلح كل حاجة ، فلو هو بيحاول بكل جهده انه يكون الزوج المثالي اللي انتي عايزاه فلازم تتأكدي ان هو كده بيحبك ، لو انتي لسه زوجة جديدة ومش عارفة ايه التوقعات اللي ممكن تتوقعي انها تكون موجودة ، هنقولك في المقال بتاعنا قايمة ببعض التوقعات اللي المفروض متكونش موجودة.

1- تخلي زوجك يختار بينك وبين والدته:

مهما كانت مشكلتك مع حماتك ، فانتي محتاجة انك تحليها بنفسك ، مش المفروض انك تدخلي الزوج في حل المشكلة وانه يقف في صفك ضد مامته ، وافتكري دايما ان سبب وجود جوزك هي حماتك لان هي اللي جابته للدنيا ، ربته وكبرته سنين طويلة ، وجزء من كل حاجة في حياته ، ومع ذلك لو هي شخصية لئيمة شوية او مش بتحبك ، ممكن تتكلمي مع زوجك على انفراد وتطلبي منه المساعدة تتعاملي معاها ازاي ، ولكن متطلبيش منه انه يختار بينك وبينها.

توقعات متدخليهاش في الجواز 1
توقعات متدخليهاش في الجواز 1

2- تتوقعي ان زوجك يبقى في مكان صاحبتك:

ممكن يكون عندك صاحبة تتصلي بيها اي وقت وفي اوقات متأخرة عادي وتكلميها في اي حاجة وكل حاجة وتقعدوا ترغوا مع بعض ، دلوقتي انتي لو عايزة تحولي زوجك يبقى مكان صاحبتك وتعملي معاه كل ده ، اعرفي ان ده صعب ، لان الرجالة عموما بيحبوا يبقوا بعيد عن النقاشات والموضوعات الخاصة بالبنات ، ولو زوجك وافق انه ياخد المكان ده ، اديه وقت لحد ما يتعود على الرغي والكلام الكتير بنفس الطريقة اللي كنتي بتتعاملي بيها مع صاحبتك.

توقعات متدخليهاش في الجواز 2
توقعات متدخليهاش في الجواز 2

3- بتتوقعي من زوجك انه ميبصش لاي واحدة تانية:

الزوج ده انسان وليه عيون وعقل مستقل خاص بيه ، وطبيعي انه ممكن يشوف واحدة حلوة ممكن يبص عليها ، لان اكيد انتي مش الست الوحيدة الحلوة على الكوكب وجملة “مش ماليه عينه بيبص لواحدة تانية” ده منطق الست بس لكن الراجل الموضوع عنده بيكون مختلف ، النظرة العابرة بتكون عادية وطبيعية من الراجل لاي ست شايفها حلوة او جذابة من وجهة نظره ، ولكن لو الموضوع اتطور لمشاعر واهتمام زيادة اتجاه اي واحدة ، هنا في الحالة دي هيكون الموضوع غلط ولازم توقفيه.

توقعات متدخليهاش في الجواز 3
توقعات متدخليهاش في الجواز 3

4- تتوقعي ان الزوج يتخلى عن شغفه:

نعمة كبيرة ان الانسان يحس بشغف اتجاه حاجة معينة ، لان عمل الحاجة اللي بتحبيها هيخليكي تحسي بسلام نفسي وسعادة ، ولو زوجك عنده شغف اتجاه اي حاجة وبيحب يعملها ، هنا انتي بصفتك زوجتة ، واجبك انك تساعديه وتشجعيه اكتر انه يعمله ، مش المفروض انك تطلبي منه يبطل يعمله ، لان ده ممكن يخليه يفضل الحاجة دي عليكي وتحصل مشاكل اكبر بينكم.

توقعات متدخليهاش في الجواز 4

5- تتوقعي ان زوجك يكون شخص تاني:

انتي حبتيه واتجوزتيه على شخصيته زي ما هو ، يبقى ازاي تيجي فجأة تطلبي منه انه يتغير او ميبقاش نفسه؟ واكيد فاهمين ان انتي ليكي توقعات معينة منه كزوج ، ولكن ده مش معناه انه المفروض يتخلى عن هويته او شخصيته ، فلو انتي بتتوقعي ده يبقى اعرفي ان ده غلط ومش واقعي.

توقعات متدخليهاش في الجواز 5

6- تتوقعي ان زوجك يتخلى عن اصحابه:

بعد الجواز مش مطلوب ان كل طرف يتخلى عن اصحابه ، زي ما انتي ليكي اصحاب علاقتك هتفضل مستمرة معاهم بعد الجواز ، الموضوع ينطبق على الزوج كمان ، موضوع انه يبقى معاكي طول الوقت ده صعب ، في الواقع ، انتي المفروض تسيبي له مساحة انه يخرج وينبسط مع اصحابه ، وطبيعي انك ممكن متكونيش بترتاحي لكل اصحابه ، ومش المفروض انك تحبي كل اصحابه ، لكن في نفس الوقت متمنعيهوش من مقابلتهم ، سيبيه يقابل اصحابه وانتي كمان تقابلي اصحابك ، وكل واحد يبقى ليه مساحة حرية خاصة بيه يعمل فيها الحاجة اللي بيحبها بعيد عن الطرف التاني ، ده صحي جدا للحياة الزوجية.

توقعات متدخليهاش في الجواز 6

7- تتوقعي ان زوجك يهتم بكل حاجة بتعمليها:

انتوا الاتنين اشخاص مختلفين ، في حين ان القدرة على تطوير الحاجات المشتركة بينكم اكيد نعمة ، ولكن لو الموضوع مش كده وفي بينكم اختلافات ، متجبريش شريكك انه يتابع اهتماماتك بنفس الشغف اللي عندك ، سيبيه يعمل اللي هو بيحبه وانتي اعملي اللي بتحبيه ، هو ممكن بس يشجعك ويزود ثقتك في نفسك في اي حاجة تتعلق باهتماماتك دوره مش هيزيد عن كده.

توقعات متدخليهاش في الجواز 7

التوقعات المعقولة والواقعية هتخلي العلاقة صحية ، لان غير كده هتتحول لعلاقة سامة وغير صحية.

مقالات متعلقه

صفات المرأة المثالية اللي دايما بيقدرها الرجل ويحب وجودها في شريكة حياته

صفات المرأة المثالية اللي دايما بيقدرها الرجل ويحب وجودها في شريكة حياته

حركات وتصرفات هتخلي شريكك يحبك بشكل جنوني

حركات وتصرفات هتخلي شريكك يحبك بشكل جنوني

6 تصرفات انثوية شريكك بيحبها اكتر من اي حاجة تانية

6 تصرفات انثوية شريكك بيحبها اكتر من اي حاجة تانية