حاجات لازم تحطيها في اعتبارك قبل ما تشتري المكياج

ريهام محمود
ريهام محمود
في
مكياج
1941

اي مستحضرات مكياج قبل ما تمر على بشرتك لازم تفحصيها كويس جدا عشان الموضوع مينتهيش بمشاكل في البشرة ، والسوق مليان بمنتجات وماركات كتير جدا ، وكل شركة بتبذل اقصى جهدها عشان تجذب انتباهك لمنتجها ، عشان كده قبل ما تشتري المكياج لازم تاخدي بالك من شوية حاجات ، ودي اللي هنعرفها النهاردة مع بعض من خلال السطور الجاية من خلال مجموعة نصايح لشراء المكياج حطيها في اعتبارك قبل ما تروحي تشتري اي منتج.

نصايح لشراء المكياج:

1- اقري الملصق والتعليمات:

انتبهي كويس لتاريخ انتهاء الصلاحية والمكونات المستخدمة ، لان المكونات المكتوبة بتوضح هل هو مناسب لبشرتك ولا لا ، كمان خلي بالك من علامات التزييف ، لان عدم وجود اختام الشركة على المنتج دي تعتبر علامة على التزييف وان المنتج مش اصلي ، ولو حسيتي باي شك من اي معلومة على الملصق ، ممكن تسألي وتستوضحي عنه اكتر.

نصايح لشراء المكياج 1
نصايح لشراء المكياج 1

2- اتأكدي من المكياج اللي عندك الاول:

قبل ما تخرجي تشتري اي مستحضر مكياج ، اتأكدي من المكياج اللي عندك في البيت الاول ولو قرب يخلص ولا لا ، عشان تجيبي اللي انتي محتاجاه بس ، لان المكياج صالحيته بتكون طويلة يعني في منتجات ممكن تقعد معاكي لحد سنة واكتر يعني اللي اشترتيه من سنة هيكون لسه قابل للاستخدام.

نصايح لشراء المكياج 2
نصايح لشراء المكياج 2

3- ميزانيتك:

كلنا عارفين ان العلامات التجارية الكبيرة اسعار منتجاتها بتكون عالية جدا ، يعني على سبيل المثال روج ماك، فلازم تحطي ده في اعتبارك قبل ما تنزلي تشتري اي منتج وتشوفي المناسب لميزانيتك ، وممكن قبل ما تنزلي تعملي شوية بحث على الانترنت لان مواقع البيع اون لاين ممكن توفرلك شوية ، لان بيكون في فرق سعر للمكياج على الانترنت عن محلات المكياج لنفس المنتج ، عشان كده اعملي شوية بحث واختاري اقل سعر ممكن يوفرلك ومناسب لميزانيتك.

نصايح لشراء المكياج 3
نصايح لشراء المكياج 3

4- تقيمات المستخدمين:

عادة اي ماركة دلوقتي بيكون ليها صفحة على الانترنت ، وبيكون فيها جزء عن اراء المستخدمين حوالين المنتج ، ولكن في بعض الاحيان بيتم اخفاء الحقيقة ، ساعات تعليقات المستخدمين تفتح عينيكي على حاجات او تنبهك لعيوب في المنتج ، ولكن مع ذلك ، متصدقيش كل اللي بتشوفيه ، لان احيانا بيكون في بعض التعليقات مش بتعكس الحقيقة ابدا.

نصايح لشراء المكياج 4
نصايح لشراء المكياج 4

5- لون بشرتك:

مينفعش تدخل محل المكياج وتاخدي اللي يجي قدامك وخلاص ، لازم تنتبهي للون بشرتك ، وعادة ماركات المكياج كلها بتعمل درجات مختلفة لكل الوان البشرة ، وسهل انك تعرفي المناسب لبشرتك من خلال تجربته في المحل قبل ما تشتريه او تسألي اللي بتشتري منه بيكون عندهم خبرة وممكن يساعدوكي.

نصايح لشراء المكياج 5
نصايح لشراء المكياج 5

6- نوع بشرتك:

في انواع مختلفة من البشرة ، بشرتك ممكن تبقى عادية, جافة, دهنية, او مختلطة مزيج من التلات انواع ، وكل نوع بشرة بيكون في المنتج اللي يناسبه اكتر ، لان استخدام حاجة مش مناسبة لبشرتك ممكن يضرها ويدمرها تماما ، ومطابقة بشرتك مع المنتج ده بيقلل من فرص تهيج البشرة واي ضرر ممكن يحصل للجلد ، عشان كده قبل ما تروحي تشتري لازم تكوني عارفة نوع بشرتك كويس.

نصايح لشراء المكياج 6

7- متقوليش مشاكل بشرتك للي بيبيع:

ممكن تكون بشرتك بتعاني من مشاكل معينة ، سيبي المشاكل دي في البيت قبل ما تروحي تشتري ، لان اللي بيبعوا في المحلات بيكون ليهم تارجت معين وكل هدفهم البيع ، ومجرد ما تقولي اللي انتي بتعاني منه هينتهزوها فرصة وممكن يرشحولك حاجات مش كويسة ويقنعوكي انها هتبقى مفيدة ليكي عشان يبيعوا وخلاص ، عشان كده مافيش داعي انك تقولي ده.

نصايح لشراء المكياج 7

8- اختبري المكياج:

كتير من محلات المكياج بيكون فيها جزء Tester لاختبار المكياج ، ومهم جدا انك تختبري المكياج على بشرتك قبل ما تشتريه ، ومش محتاجة انك تجربيها على بشرتك كلها ، ممكن تجربي بس على جزء صغير من الايد او الوش ، لان كل الهدف من الاختبار انك تتأكدي انه مناسب للون ونوع بشرتك.

نصايح لشراء المكياج 8

9- متحطيش مكياج وانتي رايحة تشتري:

متحطيش مكياج في البيت وانتي رايحة تشتري مكياج ، او بس حطي الحد الادنى من المكياج لو انتي مش عايزة تنزلي من غير مكياج ، عشان تقدري تعرفي اللي انتي محتاجاه بالظبط واللي بيبع يقدر يساعدك في اختيار المناسب ليكي ، لان من مجرد نظرة واحدة لبشرتك الطبيعية من غير مكياج ممكن يعرفوا انتي محتاجة ايه ، ويرشحولك الحاجات المناسبة.

نصايح لشراء المكياج 9

10- الجودة:

الوقت اللي بيدوم فيه المكياج على بشرتك مهم ، اكيد انتي مش محتاجة مكياج تفضلي تظبطي فيه كل شوية ، وعادة المنتجات المزيفة هي اللي ممكن متدومش على البشرة ، وعشان تحصلي على افضل مكياج يدوم معاكي اليوم كله ـ لازم تكوني مستعدة تدفعي اكتر عشان تجيبي مكياج جودته عالية ، واكيد الجودة تستحق تدفعي قصادها.

نصايح لشراء المكياج 10

11- خدي صاحبتك معاكي:

هيكون مفيد لو معاكي حد بتاخدي رايه وانتي بتشتري ، اول حاجة مش هتحسي بملل وانتي بتلفي وتتفرجي ، تاني حاجة والاهم ، انه يكون معاكي راي تاني وتسمعي وجهات نظر وتجارب مختلفة ، ممكن يساعدوكي على الاختيار بشكل افضل ، ده غير ان اللي بيبيع مش هيركز معاكي اوي او هيبقى صعب انه يحاول يبيع لك بالعافية وبالحاح لو معاكي حد.

نصايح لشراء المكياج 11

مقالات متعلقه

10 حيل تجميلية بسيطة ممكن تعمليها عشان تطلعي بلوك احلى في وقت سريع

10 حيل تجميلية بسيطة ممكن تعمليها عشان تطلعي بلوك احلى في وقت سريع

10 نصايح مكياج من خبراء مكياج المشاهير هتفرق معاكي

10 نصايح مكياج من خبراء مكياج المشاهير هتفرق معاكي

ازاي تنظمي المكياج بتاعك بسرعة وبطريقة سهلة

ازاي تنظمي المكياج بتاعك بسرعة وبطريقة سهلة