نصايح لرفع وشد الصدر من غير عملية مكلفة
في كتير من الكريمات ومستحضرات التجميل اللي بتساعد على رفع وشد الصدر ، ولكن مع ذلك ، لو انتي بتفضلي الطرق الطبيعية ، في حاجات كتير ممكن تعمليها تساعدك على ده ، من غير عملية تجميل, وكريمات مكلفة ، تقدري تأثري على شكل الثديين من غير ما تصرفي فلوس كتير ، والنهادرة من خلال موضوعنا هنقولك مجموعة نصايح لرفع وشد الصدر.
نصايح لرفع وشد الصدر:
الصدر بيتكون معظمه من الدهون ، ولكن لوعايزة صدر مشدود واكبر ، يبقى ضروري تقوية العضلات اللي موجودة تحت الصدر ، لان الصدر نفسه مش عضلات ، ولكن بيتكون من الانسجة الضامة الدهنية والغدد الثديية اللي بتحتاج عناية عشان تفضل في صحة كويسة.
وعلى الرغم من ترهل الثدي بيبدأ عادة بعد سن الاربعين ، الا انه ممكن يبدأ بدري عن كده ، وبغض النظر عن السن في عوامل تانية ممكن تأثر على ترهل الصدر ، بما فيهم الرضاعة الطبيعية, الحمل, انقطاع الدورة الشهرية, فقدان الوزن او زيادته بشكل مفاجيء, التمارين الرياضية الشاقة, سوء التغذية, ولبس حمالة صدر مش مريحة.
بعض الامراض زي سرطان الثدي او امراض الجهاز التنفسي ممكن انها تسبب كمان ترهل الثدي, التدخين المفرط, شرب المشروبات الغازية ممكن انه يزود من المشكلة.
وممكن تأثر على صحة الثدي وشكلة العادات اليومية البسيطة ، عشان كده لازم تختاري حمالة الصدر المناسبة ، والتمارين الرياضية اللي ممكن تساعدك في حل لمشكلة.
1- المية الباردة مع المساج:
الشاور بمية باردة بيعمل معجزات للبشرة ، وعشان تحصلي على صدر مشدود ، اعملي تدليك خفيف للثديين تحت المية الباردة ، بالطريقة دي هتحسني الدورة الدموية اللي هتساعد على تحفيز الايلاستين والكولاجين في الجلد.
2- فرد الضهر:
معظمنا تقريبا ممكن نقعد او نمشي واحنا مش فاردين ضهرنا ، وبالتالي ده ممكن يسبب تقليل حجم الصدر وزيادة محيط الوسط ، ، لان الضهر والكتف المنحني مش هيدعم الصدر بشكل كافي ، وده هيضعف العضلات بالتدريج ، وهيسبب ترهل في منطقة الصدر وانخفاضه.
3- اختيار حمالة الصدر:
لما تيجي تختاري حمالة الصدر ، اتجنبي اي ضغط على الصدر ، واختاري برا تدعم الصدر ، ومتضغطيش عليه واختاري المقاس الصح والمناسب لحجم الصدر ، وانتبهي لحزام الكتف يكون مرونتة كويسة وعريض كفاية ، عشان ميسببش ضرر للجلد في المنطقة دي ، والكب بتاع حمالة الصدر يكون مناسب لحجم الصدر وميبقاش في اجزاء منه بره الكب.
4- اليوجا وتمارين الضغط:
اليوجا بتساعد على زيادة مرونة وقوة الجسم ، بما فيها الثدي ، كل وضعية من وضعيات اليوجا بتركز على جزء معين من الجسم ، ومن افضل تمارين اليوجا اللي ليها تأثير على الثديين هما Triangle, Cobra.
تمارين الضغط من التمارين اللي مش سهلة ، ولكن ليها تأثير فعال جدا على عضلات الصدر ، تمارين الضغط بتساعد على تقوية العضلات اللي تحت الصدر والانسجة الدهنية وعضلات الكتف, وعضلات البايسبس والترايسبس (الباي والتراي).
5- الزيوت الاساسية:
الزيوت الاساسية من الحاجات اللي بتساعد على شد الصدر ، ومن الزيوت اللي بننصح بيها للتدليك زيت عشبة الليمون, زيت الشمر, زيت النعناع, زيت السرو, وكمان زيت الزيتون ، وخليكي حذرة مع الكمية اللي هتستخدميها متاخديش اكتر من 2 – 3 نقط من الزيت هتكون كافية جدا لان اكتر من كده ممكن تسبب حرقان واحمرار للجلد ، ودلكي بيها الصدر في حركات دائرية.