لو في 5 علامات من ال 8 دول في علاقتك يبقى زوجك سعيد في الحياة الزوجية
اكيد اي واحدة بتتمنى زواج ناجح ، وبيتم تحديد نجاح العلاقة من خلال سعادة الشريك ، لما تشوفي شريكك بيضحك ومبسوط بسببك ده اكبر دليل على ان علاقتك ناجحة ، ومع ذلك ، في علامات معينة واضحة ممكن تبين لك ان زوجك سعيد في العلاقة ، ومش دايما لازم تعتمدي على الكلام ، لانك تقدري تقري اللي جواه من نفسك ، ولو زوجك بين العلامات دي ، فانبسطي انتي زوجة محظوظة ، تعالوا نشوف مع بعض من خلال السطور الجاية 8 علامات لحياة زوجية سعيدة.
علامات لحياة زوجية سعيدة:
1- القبلات الروتينية:
كل مرة يرجع فيها البيت من الشغل, لازم تكون في قبلة منه ليكي اول ما يدخل البيت – ومش على خدك ، دايما بيبقى في قبلات منه ليكي على قدر ما يقدر وبيظهر حبه ليكي ، وفي بعض الاحيان بيكون التقبيل افضل من الحضن ، ده اول دليل ان الجزء الرومانسي في علاقتكم لسه موجود ، ودي اسهل طريقة عشان يحسسك بيها انك مميزة وانه بيحس بسعادة معاكي.
2- بيفضل على اتصال دايم معاكي:
في نوعين من الرجالة – الرجالة اللي دايما بيقولوا انهم “مشغولين جدا” او “تعبانين جدا” ومافيش طاقة انهم يتكلموا معاكي ، والنوع التاني اللي بيبذل اقصى جهد عشان يفضل على اتصال معاكي خلال وقت انشغاله وفي وسط زحمة يومه عشان متحسيش بالاهمال ، هتلاقيه بيتصل بيكي وهو في الشغل, او مسافر رحلة عمل, ويقولك قد ايه انتي وحشاه ومفتقدك ، بيشاركك تفاصيل دقيقة في شغله, مخاوفه, ويومه كان ازاي, وحتى ممكن يطلب نصيحتك في حاجات معينة ، وهو نفسه الراجل اللي مش بيعتبر رحلات الشغل او السفر هروب من عبودية الجواز.
3- بيقولك دايما “بحبك”:
مش بيمل ابدا من انه يقولك كلمة “بحبك” ويدلعك بنفس الطريقة زي ما اول ما عرفك ، بعد سنين من الجواز العلاقة ممكن يدخل فيها شوية ملل وتقدم ، وفي بعض الازواج بيشوفوا انهم كبروا على الدلع ده بعد سنين جواز كتير وان ده مبقاش مناسب لسنهم ، ولكن الراجل اللي بيحبك بجد وسعيد معاكي مش هيسيب فرصة يدلعك فيها ويقولك كلام حلو ويعبر عن مشاعره اكتر من مره ، وعارف قيمتك ومش بيتردد ابدا انه يظهر ده ليكي ، وكمان مش بيبقى مستني اي حاجة في مقابل كل ده ، او انك تظهري حبك وتمدحيه ، لان الحب الحقيقي هو حب مش اناني ومش بيقدم ابدا ولا بينتهي.
4- بيشارك معاكي في شغل البيت:
العلاقة المثالية هي العلاقة اللي فيها الزوجين شريكين متساويين في ادارة البيت وتربية الاطفال ، ولو زوجك بيحبك وبيعتني بيكي ، هيبذل مجهود عشان يقضي وقت معاكي ومع الاولاد ، حتى بعد ساعات الشغل المتعبة ، هيساعدك في شغل البيت ، في النهاية لو المشاعر متبادلة ، الجهد كمان هيكون متساوي.
5- هيقولك كلام حلو على طول:
دايما هيقولك كلام حلو على شكلك ، ومش هتبقي محتاجة تطارديه ولا تطلبي منه عشان تسمع منه مدح او كلام حلو ، هو هتلاقيه دايما بيلاحقك بنظراته وبيبصلك زي اول مره شافك فيها وهيقولك كلام حلو ويمدحك من نفسه ، وهتفضلي فتاته المفضلة للابد.
6- هيدعمك في كل الاوقات:
هيكون هو الكتف اللي تبكي عليه لما تحسي انك محبطة او متضايقة ، مش بيسيبك لوحدك في وقت الشدة ، هيحسسك بالراحة لما تشتكي او تحسي بخيبة امل من اي حاجة ، الشريك هو الشخص اللي ميسمحش انك تواجهي الاوقات الصعبة لوحدك ويمسك ايدك ويدعمك ويأكدلك ان الجاي هيبقى احلى ويهون عليكي ، نجاح العلاقة مش بيتم تحديدها ابدا في الايام الحلوة ولكن بتتعرف من خلال دعم بعض والخروج من اشد المواقف الصعبة سوا ، فلو انتي زوجك كده فانتوا اكيد زوجين سعدا في حياتكم الزوجية.
7- الخلاف مش بيدوم فترة طويلة:
لو زوجك بيحبك بجد ، مش هيخلي الخلاف بينكم يدوم لايام ، مش هيكون قادر انه يقعد من غير ما يكلمك او يظهر حبه ليكي فترة طويلة ، مش هيكبر الخلاف وهيحاول يحله من خلال النقاش ، مش هيأذيكي ابدا باي حاجة ولا يقولك كلمة تجرحك وانتوا بتتخانقوا ، ولو هو غلطان هيعتذرلك وهيدلعك ويعوضك.
8- هيشارك احلامه معاكي:
لو انتوا الاتنين متفاهمين وبيثق فيكي ، مش هيتردد انه يشارك طموحاته واحلامه ومشاكله معاكي ، وهتفضلي انتي دايما الدافع والداعم ليه ودايما هياخد رايك في كل حاجة ، وهياخد كلامك على محمل الجد مش مجرد تحصيل حاصل وبعدين يعمل اللي في دماغه ، وانتي لازم تهتمي وتسمعي احلامه بصبر ، وتشجعيه على تحقيقها.
العلاقات هي طريق باتجاهين ، عشان كل طرف ياخد الحب والاهتمام ، لازم الشخص يكون مخلص ومقدر وبيحب بنفس المقدار اللي بياخده من الطرف التاني ، لو انتي في حياتك الراجل اللي متوفرة فيه كل الصفات اللي احنا قولناها في المقال بتاعنا ، فانتي محظوظة.
