طريقة عمل كوكيز السكر بالشوكولاتة الفارمسيل الملونة

بقلمريهام محمود فيحلويات visibility144

لكل عشاق الكوكيز النهاردة جايبنلكم طريقة عمل كوكيز السكر بالشوكولاتة الفارمسيل الملونة ، الوصفة فيها اضافات واختلافات بسيطة عن الكوكيز العادي ، وهنقولكم كمان الحيل والاسرار اللي تطلع الكوكيز مظبوط معاكي.

نصايح وحيل لعمل الكوكيز:

– ابدأي بزبدة تكون بدرجة حرارة الغرفة ، بحيث انك لو حطيتي صوباعك عليها تلاقيها طريه ، وفي نفس الوقت تبقى لسه باردة.

– اغرفي الدقيق بمعلقة كبيرة في كوباية القياس ، عشان تضمني انك متاخديش كمية دقيق زيادة في الوصفة.

– اتأكدي ان البكينج بودر اللي هتستخدميه مش قديم اوي عندك ، ممكن تجربيه قبل الاستخدام رشي منه شوية صغيرين في كوباية مية لو كويس هيفور على طول ، والبيكنج بودر المفروض تستبدليه كل 6 شهور.

– سخني الفرن قبل ما تدخلي الكوكيز ، مهم جدا ان العجينة تدخل على فرن سخنة.

– استخدمي مغرفة الكوكيز عشان يطلعوا كلهم بنفس الحجم ، ولو مش متوفرة عندك هي بتبقى بمقدار 1 ½ معلقة كبيرة عادية.

– بصي على الكوكيز من غير ما تفتحي الفرن عليها كتير كل شوية ، اتأكدي انك تطلعي الكوكيز من الفرن قبل ما الحروف بتاعتها تبدأ تاخد لون بني ، ولان كل فرن درجة حرارتها بتختلف عن التانية ، عينيكي هي اللي هتقدر هو استوى ولا لا الشكل هو المهم اكتر من المدة اللي قعدها في الفرن.

– اضربي الزبدة مع السكر كويس وهشه لان ده اللي بيخلي الكوكيز تطلع خفيفة بعد الخبز ، وكل ما كان خليط السكر والزبدة هش الكوكيز هتطلع معاكي اخف واحلى.

– مفتاح تاني لنجاح الكوكيز هو طريقة اضافة المكونات الجافة للرطبة ، وافضل طريقة لاضافة الدقيق هي اضافتة مرة واحدة مش بالتدريج ، ضيفي كل الدقيق مع الملح والبيكنج بودر للمكونات الرطبة مرة واحدة واعجنيهم بالعجان على درجة منخفضة لحد ما يندمجوا كويس.

– عشان تحافظي على الكوكيز بعد الخبز ، احفظيه في علبة محكمة الغلق ، ممكن يقعد معاكي لحد اسبوع تقريبا ، ولو عايزة تخزنيه مدة طويلة حطيه في علبة محكمة الغلق في الفريزر ، ممكن يقعد معاكي لمدة توصل ل 3 شهور.

– ممكن تخزني عجينة الكوكيز نفسها لخبزها اي وقت تاني ، اعملي كرات الكوكيز ورصيهم على صينيه واتأكدي انهم مش لامسين بعض ، وحطيهم في الفريزر لمدة ساعة على الاقل ، ولما يتجمدوا انقليهم في علبة محكمة الغلق واحفظيهم في الفريزر ، ممكن تقعد معاكي لمدة 3 شهور ، ولما تيجي تخبزيها طلعيها من الفريزر ودخليها في الفرن لمدة من 11 – 12 دقيقة ، او لحد ما الكوكيز يبقى يادوب لونها دهبي فاتح.

كوكيز السكر بالشوكولاتة الفارمسيل
كوكيز السكر بالشوكولاتة الفارمسيل

طريقة عمل كوكيز السكر بالشوكولاتة الفارمسيل:

المكونات:

– 2 ½ كوباية دقيق لجميع الاغراض.

– ½ معلقة صغيرة بيكنج بودر.

– ½ معلقة صغيرة ملح.

– 1 ½ كوباية سكر.

– 14 معلقة كبيرة زبدة بدرجة حرارة الغرفة.

– 1 معلقة صغيرة خلاصة الفانيليا.

– 1 معلقة صغيرة خلاصة اللوز او خلاصة الزبدة.

– 2 بيضة كبيرة بدرجة حرارة الغرفة.

– ½ كوباية شوكولاتة فارمسيل ملونة.

كوكيز السكر بالشوكولاتة الفارمسيل

طريقة التحضير:

1- سخني الفرن على درجة حرارة 177 درجة مئوية ، وحضري ورق الزبدة او ورق الخبز على الصينية.

2- في طبق كبير ، اخلطي الدقيق, البيكنج بودر, الملح ، وخليهم على جنب.

3- باستخدام المضرب ، اخفقي الزبدة مع السكر لمدة من 3 – 6 دقايق لحد ما يبقى الخليط هش وخفيف ، عشان تضمني ان دخل فيها هوا كتير.

4- ضيفي البيض للسكر والزبدة ، وبعدين ضيفي خلاصة الفانيليا واللوز.

5- ضيفي خليط الدقيق مع المكونات الرطبة ، شغلي العجان على درجة منخفضة واضربيه لمدة 10 ثواني تقريبا ، وبعدين زودي درجة العجان لمدة 2 – 3 ثواني كمان او لحد ما الدقيق يندمج كويس مع باقي المكونات ، ممكن تحتاجي مرة انك تلمي العجينة بالمعلقة وتضربيها لمدة 2 – 3 ثواني كمان.

6- ضيفي الشوكولاتة الفارمسيل وقلبي العجينة بخفة جدا.

7- باستخدام المعلقة خدي من العجينة ورصيها جنب بعض على الصينية وسيبي مسافة بين كل واحدة والتانية حوالي بوصتين عشان متلزقش في بعض لان حجمها هيكبر وهتفرد.

8- دخليها الفرن واخبزيها لمدة 10 دقايق تقريبا او لحد ما لونها يبقى دهبي فاتح، وفي نص الوقت لفي الصينية مرة واحدة ، طلعيها من الفرن وانقليها على رف سلك وسيبيها لحد ما تبرد تماما ، احفظيها في علبة مغلقة زهتقعد معاكي لمدة توصل لاسبوع.

طريقة عمل بسكويت العشر دقايق بالخطوات والفيديو

طريقة عمل بسكويت العشر دقايق