طريقة عمل المكرونة بالشوربة والحمص الايطالية بالخطوات والفيديو

لو انتي من عشاق الباستا او المكرونة ، النهاردة هنقولك طريقة سهلة وجديدة للمكرونة ، وهي المكرونة بالشوربة والحمص ، والطبق يعتبر من اشهر الاطباق الايطالية ، هنشوف مع بعض الطريقة بالخطوات والفيديو.

طريقة عمل المكرونة بالشوربة والحمص:

الكمية تكفي 4 افراد

طريقة التحضير 30 دقيقة.

المكونات:

– 3 معالق كبيرة زيت زيتون.

– 1 بصلة متوسطة مفرومة ناعم.

– 3 فصوص ثوم مفرومة ناعم.

– 2 معلقة صغيرة من اكليل الجبل مفروم.

– ½ معلقة صغيرة شطة.

– ملح.

– فلفل اسود.

– 1 كوباية كبيرة عصير طماطم او طماطم متقطعة مكعبات صغيرة.

– 425 جرام حمص مسلوق.

– 1 كوباية مكرونة حجم صغير.

– 3 كوبايات شوربة (فراخ او لحمة), او مية.

– 4 كوبايات كرنب مفروم او سبانخ “اختياري”.

– جبنة مبشورة.

المكرونة بالشوربة والحمص
المكرونة بالشوربة والحمص

طريقة التحضير:

1- في طاسة او حلة كبيرة سخني الزيت على نار متوسطة ، ضيفي البصل وقلبيه كويس مع الزيت لحد ما يدبل ويبقى لونه شفاف ، حوالي من 3 – 4 دقايق ، ضيفي الثوم, اكليل الجبل, الشطة, وقلبيهم مع بعض وسيبيهم لمدة دقيقة واحدة ، وتبلي الخليط بالملح والفلفل.

2- ضيفي عصير الطماطم والحمص ، ولو هتستخدمي طماطم متقطعة حاولي تهرسيها بضهر المعلقة اثناء التقليب.

المكرونة بالشوربة والحمص

3- ضيفي الشوربة وسيبيها لحد ما تغلي ، وبعدين ضيفي المكرونة وسيبيها على نار هادية ، مع التقليب من وقت للتاني عشان تتأكدي ان المكرونة متلزقش في الحلة ، سيبي المكرونة لمدة 10 دقايق ، لو المكرونة استوت ولقتيها شربت كمية كبيرة من الشوربة ممكن تزودي من ½ – 1 كوباية شوربة كمان لان المفروض ان المكرونة يكون فيها شوربة متكونش ناشفة ، وسيبيها على نار هادية لمدة دقيقة كمان ، وضيفي ملح وفلفل حسب ذوقك.

4- ضيفي الكرنب وقلبيه وسيبيه لحد ما يدبل ، ارفعيها من على النار واغرفي المكرونة في الطبق ورشي عليها من فوق الجبنة المبشورة.

الطريقة بالفيديو:

طريقة عمل باستا فاهيتا الفراخ بالخطوات والفيديو