ازاي تقصي شعرك بنفسك في البيت زي المحترفين..اعرفي معانا 7 نصايح هتساعدك

بقلمريهام محمود فيشعر visibility350

احنا اتكلمنا قبل كده في موضوع سابق عن قصات مختلفة للشعر وازاي تعمليهم بنفسك في البيت ، النهاردة هنشوف مع بعض الاساسيات اللي تعمليها قبل قص الشعر ، ازاي ممكن تعملي تحسينات او تغييرات بسيطة في شعرك في البيت ، ونصايح ازاي تقصي شعرك بنفسك.

ازاي تقصي شعرك بنفسك:

1- حضري الادوات والمستلزمات اللي محتاجاها:

متتخطيش الاساسيات والحاجات البسيطة ، يعني على سبيل المثال لو المقص بارد ممكن انه يبوظلك شعرك ، عشان كده الافضل يكون المقص حاد بغض النظر عن نوع شعرك ، ولو مش متوفر عندك مقص كويس اشتري مقص مخصوص لقص الشعر.

كمان على حسب نوع شعرك هتختلف الاداة اللي هتستخدميها ، يعني لو شعرك مجعد هيناسبه المشط اللي اسنانه عريضة ، اما الشعر المفرود هيكون مناسب ليه المشط الناعم اللي اسنانه ضيقة ، كمان متنسيش المشابك او الكلبسات اللي هتستخدميها لتقسيم الشعر عشان تسهل عليكي عملية القص.

الحاجات اللي هتحتاجيها:

– مقص حاد.

– امشاط.

– كلبسات.

– ازازة سبراي.

– فوطة.

لو شعرك مجعد ، الافضل انك تنشفيه شوية قبل قصه عشان تتأكدي انك متقصيش منه كتير ، لان الشعر المجعد بيبان اطول واقل كثافة لما بيكون مبلول ، وممكن تجربي ان ترشيه بالمية بس.

ازاي تقصي شعرك بنفسك
ازاي تقصي شعرك بنفسك

2- فكري انتي عايزة تعملي ايه وايه اللي ممكن تعمليه:

– لو عايزة تقصري الشعر شوية او تقصي الاطراف بس ، حددي انتي عايزة تقصي قد ايه ، وحطي في اعتبارك انك تقصي نص سنتيمتر اقل من اللي انتي عايزاه ، عشان يبقى في طول كفاية تظبطي الشعر لو حصل اي غلط وانتي بتقصي من غير ما يقصر منك اوي.

– لو شعرك مدرج او مقصوص طبقات ،  او شعرك مموج او مجعد وعايزة تظهري القصه بتاعته اكتر ، ابدأي حللي قصة شعرك الحالية وشوفي عايزة تعملي ايه بالظبط الطول اللي انتي عايزاه وايه بالظبط اللي عايزة تعمليه في القصة.

– لو بتفكري تعملي تغيير جذري وتغيري قصة شعرك خالص ، هنا لازم تفكري مرتين قبل ما تعملي الخطوة دي ، لانه لازم يكون عندك مهارة عالية وجراءة عشان تعملي ده بنفسك ، ولو قررتي تعملي ده ، فكري في قصة الشعر اللي هتناسبك ، اكتر من ان القصة دي حلوة على حد شوفتيه المهم هنا انها تليق عليكي انتي ، حطي في اعتبارك كمان ان في بعض القصات ممكن تبقى اسهل مع نوع شعرك, او شكل وشك, او حتى شكل جسمك كله.

ازاي تقصي شعرك بنفسك

3- لو شعرك مش مدرج وعايزة تعمليه مدرج او طبقات:

سرحي شعرك كويس بالمشط عشان تتأكدي ان مافيش فيه اي عقد في النص تبوظلك القصه ، سرحي الشعر كله على قدام واربطيه باستك على شكل ديل حصان.

ازاي تقصي شعرك بنفسك

استخدمي مسطرة تقيسي بيها الطول اللي عايزة تقصيه ، واستخدمي كلبس او استك تاني عند الجزء اللي عايزة تقصي من عنده.

الخطوة الاخيرة ابدأي قص الشعر.

4- لو شعرك مدرج, استخدمي الجزء اللي قدام كدليل:

لو انتي اصلا شعرك مدرج ، وعايزة تظبطي القصة ، ابدأي درجي الجزء الامامي من الشعر او منطقة القوصة كدليل تمشي عليه لقص باقي الشعر ، طلعي الجزء بتاع القوصة ولفي الشعر او ابرميه واستخدمي صوباعك كدليل لتحديد الطول عند الجزء اللي عايزة تقصي من عنده.

ازاي تقصي شعرك بنفسك

5- قصي بشكل عمودي لنهايات ناعمة وافقية لاطراف حادة:

استخدام المقص بزاوية زي ما هو باين في الصورة قدامنا هيديكي تأثير طبيعي اكتر ، ولو قصيتي بشكل افقي اطراف الشعر هتطلع حادة معاكي ، كده القوصة هتبقى دليل هيساعدك على تحديد طول باقي الشعر.

6- خدي اجزاء من الشعر وقصيها:

لو مش هتعرفي او هتخافي تقصي الشعر كله مرة واحدة ، قسميه 3 اقسام باستخدام الكلبسات وقصي جزء جزء ، وافتكري انك تقصي بزاوية زي النقطة اللي فاتت.

7- قصي اطراف الشعر المنقسمة لفوق:

بمجرد ما تخلصي الجزء اللي قدام من الشعر ، تقدري دلوقتي تقصي الاطراف المنقسمة والجافة ، واعملي نفسك طريقة مصفف الشعر المحترف وهي بالقص لفوق ، يعني خلي اتجاه المقص لتحت ، زي ما هو واضح في الصورة اللي قدامنا.

ازاي تقصي القوصة بنجاح:

القوصة ممكن تغير اللوك بتاعك تماما ، عشان تقصي القوصة بنجاح وتطلع مظبوطة وشكلها حلو ، قسميها ل 3 اجزاء ، جزء في النص وجزئين على الجناب ، لمي الجناب لورا بكلبس ، والجزء اللي في النص ابرميه وقصيه ، وبعدين فكي الجناب وساويها بالطريقة اللي تحبيها ، القوصة هتطلع معاكي زي ما هو باين قدامنا في الصورة قصيرة من النص وطويلة من الجناب.

ازاي تقصي شعرك بنفسك في البيت ؟

ازاي تقصي شعرك بنفسك
ازاي تقصي شعرك بنفسك