ايه اللي هيحصل لجسمك لو بدأتي تاكلي عودين قرنفل كل يوم
القرنفل من انواع البهارات اللي ريحتها حلوة جدا ، واللي ممكن يتضاف لاطباق كتير عشان يديها نكهة مختلفة ومميزة ، ولكن القرنفل كمان ليه فوايد صحية كتير اللي هتخليكي تضيفيه لاكلاتك واطباقك بانتظام ، ومش بس مفيد صحيا ولكن كمان ليه فوايد كتير للبشرة ، والنهاردة من خلال موضوعنا هنتعرف مع بعض على فوايد القرنفل الصحية والجمالية.
فوايد القرنفل الصحية والجمالية:
1- بيساعد على تحسين الهضم:
حسب بعض الدراسات ان زيت القرنفل بيحسن من انتاج مخاط المعدة ، والمخاط ده بيساعد على حماية البطانة الداخلية للجهاز الهضمي من التلف اللي ممكن تسببه احماض المعدة ، لو بعاني من مشاكل مرتبطة بالحموضة والهضم ، فزيت القرنفل من الحاجات اللي ممكن تساعدك في التخلص من التهاب المعدة ، والقرنفل كمان ممكن يساعد على علاج قرحة المعدة بسبب خصائصة العلاجية ، وهيساعد على حل كتير من مشاكل الجهاز الهضمي زي الامساك, الاسهال, القيء, وتعزيز التمثيل الغذائي بشكل افضل.
2- بيعالج المشاكل الصحية للفم:
القرنفل بيحتوي على مركب الاوجينول اللي بيشكل حوالي 89% من تركيبته ، والاوجينول مفيد جدا وليه خصائص مطهرة, ومضادة للاكسدة, ومضادة للالتهابات ، وده السبب ان القرنفل فعال جدا في علام آلام الاسنان, تقرحات الفم, التهاب اللثة, ريحة الفم الكريهة, وتسوس الاسنان ، وزيت القرنفل كمان بيستخدم لعلاج آلام الاسنان, آلام اللثة بسبب خصائصة المهدئة ، وكل التوابل التانية اللي بتحتوي على الاوجينول زي القرفة, الريحان, وزيوت جوزة الطيب ممكن تستخدم لمشاكل الفم.
3- بيعالج البرد:
القرنفل ممكن يستخدم كعلاج طبيعي لعلاج البرد ، جربي اعملي شاي القرنفل مع الحبهان والقرفة واشربيه مرتين في اليوم لو بتعاني من البرد والاحتقان ، وممكن كمان تستخدمي بعض اعواد القرنفل او زيت القرنفل في مية سخنة واستنشقي البخار بتاعه ، هيساعدك على علاج البرد بشكل سريع.
4- بيساعد على تخسيس الوزن:
القرنفل بيساعد على تحفيز عملية التمثيل الغذائي اللي بيأدي لفقدان الوزن ، وبيحتوي كمان على خصائص مضادة للكوليسترول, ومضادة للدهون ، ولما تجمعي بين القرنفل مع توابل قوية زي الفلفل, القرفة, بذور الكمون ، هيساعد على زيادة نسبة الحرق ، اللي هيأدي في النهاية لانقاص الوزن ، القرنفل كمان بيحتوي على مضادات الاكسدة اللي بتقلل من الاجهاد التأكسدي ، وده بيساعد على تقليل خطر الاصابة بالامراض المزمنة ، ومعروف ان القرنفل بيحافظ على نسبة السكر في الدم.
تقدري تستخدمي القرنفل في تخسيس الوزن بطريقة بسيطة ، هاتي 50 جرام اعواد قرنفل, 50 جرام قرفة, 50 جرام من بذور الكمون, حمصي كل التوابل مع بعض في طاسة ، وبعدين اطحنيهم كلهم مع بعض وخزنيهم في برطمان للاستخدام ، خدي معلقة كبيرة من خليط التوابل ده واغليه في كوباية مية ، سيبيه يبرد ، وبعدين ضيفي له معلقة صغيرة عسل نحل ، واشربي المشروب ده كل يوم الصبح على معدة فاضية.
5- بيعالج حب الشباب:
حب الشباب من المشاكل اللي بيعاني منها كتير من البنات ، لو بتعاني من حب الشباب باستمرار ، ممكن القرنفل يكون هو المنقذ لبشرتك ، وتاني مركب الاوجينول هو المركب الفعال لعلاج حب الشباب لانه بيحتوي على خصائص مضادة للبكتيريا بتساعد على علاج حب الشباب, وخصائص مضادة للاتهابات بتساعد على علاج التهابات حب الشباب ، وافضل طريقة لاستخدام القرنفل لحب الشباب انك تستخدميه كماسك ، اخلطي معلقة كبيرة من القرنفل المطحون مع شوية عسل نحل وعصير ليمون ، حطي الخليط على البشرة وسيبيه لمدة 20 دقيقة وبعدين اغسليه بالمية ، كرري الماسك مرة كل يوم وهتلاحظي ان حب الشباب بدأ يختفي في وقت قصير جدا.
6- مفيد للبشرة:
زيت القرنفل مفيد جدا للبشرة عشان كده هنلاقيه داخل في كتير من انواع الصابون ومستحضرات العناية بالبشرة ، مركب الاوجينول الموجود في القرنفل بيحمي البشرة من البكتيريا وحب الشباب ، بيساعد كمان على تهدئة البشرة ، ولو معندكيش اي منتج في البيت بيحتوي على زيت القرنفل تقدري تعمليه بنفسك بكل بساطة ، كل اللي هتعمليه ضيفي كام نقطة من زيت القرنفل للكريم المرطب بتاعك ، زيت القرنفل معروف كمان انه بيحارب علامات الشيخوخة زي التجاعيد والبقع الغامقة ، ممكن تحطي كام نقطة من زيت القرنفل على قطنة وتمسحي بيها بشرتك مرتين في اليوم وتسيبيه شوية على البشرة وبعدين اغسليه ، هتلاحظي الفرق في شباب ونضارة بشرتك خلال ايام ، زيت القرنفل كمان بيساعد على تقشير البشرة وبيخلصها من خلايا الجلد الميت وبيخلي بشرتك صحية ونضرة.
