ازاي تتفادي انك تتجوزي الشخص الغلط

بقلمريهام محمود فيعلاقات visibility1504

لو وصلتي لمرحلة من الحياة ان اهلك واصحابك شايفين ان جيه الوقت انك تاخدي خطوة الجواز ، ويبدأوا قرايبك يجيبولك عرسان ويرتبولك مقابلات ، وبتلاقي نفسك تحت ضغط نفسي ، والضغط ده ممكن يخليكي تتسرعي في الاختيار وهينتهي بيكي الامر انك تتجوزي الشخص الغلط ، في النهاية وبعد كل شيء انتي اللي هتعاني من العواقب لوحدك ، ومش الاشخاص اللي كانوا بيضغطوا عليكي او هيحضروا فرحك ، والنهاردة من خلال السطور الجايه هنقولك شوية نصايح ازاي تتفادي الجواز من الشخص الغلط وانك تدخلي في علاقة زوجية غير ناجحة.

ازاي تتفادي الجواز من الشخص الغلط:

1- ماضيه هو المفتاح, اعرفيه كويس:

الشخص اللي قررتي تتعرفي عليه اكتر ، متتجاهليش ماضيه ، لو في اي حاجة في ماضيه انتي مش مرتاحة لها ، فانتي محتاجة انك تتأكدي منها ، ممكن تسأليه بكل صراحة عنها ، ولو قالك ان الظروف في الوقت ده هي اللي اجبرته يعمل حاجة معينة ، فده وارد ممكن يحصل ، مع تغير الظروف الشخص كمان ممكن يتغير ، ولكن لو الموضوع بيتعلق بمشاكل كبيرة ، فده هيكون صعب ، وزي ما كلنا عارفين ان العادات القديمة مش بتموت او بتتغير.

ازاي تتفادي الجواز من الشخص الغلط
ازاي تتفادي الجواز من الشخص الغلط

2- خليكي واضحة مع نفسك بخصوص احتياجاتك:

العلاقات مبنية على اساس الاحتياجات والحاجات اللي انتي عايزاها ، عشان كده خليكي واضحة مع نفسك بخصوص اللي انتي عايزاه من العلاقة ، اعرفي ايه الحاجات اللي عايزة تتعايشي معاها ، وخليكي واضحة جدا بخصوص الصفات اللي انتي شايفاها ضرورية بالنسبة لك في شريكك ، عشان ميجيش عليكي وقت في المستقبل تحسي بعدم الرضا او الندم في علاقتك.

ازاي تتفادي الجواز من الشخص الغلط

3- ركزي على اللي موجود دلوقتي, مش اللي لسه هيحصل:

معظم الامهات او القرايب لما بيرشحوا عريس بيبدأوا يعرضوا مميزاته وشكل مستقبلك هيبقى ازاي معاه زي مثلا ده معاه ماجسيتر, ده دكتور او مهندس, ده عايز يسافر ويستقر في امريكا ، تخيلي هتبقي سعيدة معاه قد ايه ، وغيرها من عرض المميزات اللي بيحاولوا يغروكي بيها عشان توافقي ، ولكن اتجاهلي كل الكلام ده ، وركزي على الحاضر بتاعه زي مثلا هل هو كويس في دراسته؟ هو ليه بيدرس لحد دلوقتي؟ يه هي طموحاته بعد ما يخلص دراسته؟ هي دي الاسئلة اللي المفروض تتسأل لما تقابلي الشخص ده ، لازم يكون الكلام عن اللي موجود بالفعل دلوقتي.

ازاي تتفادي الجواز من الشخص الغلط

4- متتجاهليش عادات عيلته:

اكيد كل عيلة بيكون ليها عادات مختلفة ، وكلنا بنبقى مرتبطين بعائلاتنا وتفاعلنا معاهم هو اللي بيشكل محور عالمنا الاجتماعي ، فلو انتي وهو مختلفين بخصوص مشاركة الاسرة في حياتكم ، ده ممكن يسبب مشكلة في المستقبل ، واكيد مش بنقولك ترفضيه بسبب ده ، ولكن اتكلمي معاه واوصلوا لحد وسط يرضي الطرفين لو قدرتي ، ولكن لو في اختلاف جذري ما بين العيلتين في الحالة دي بيكون شبه مستحيل للتوافق.

5- لازم يكون في شرارة او اتصال:

حتى لو كان الشخص ده هو المناسب ليكي او فيه مميزات انتي عايزاها ولكن مش حاسه باي شرارة من ناحيته ، فالافضل انك تقفلي على الموضوع ومتتمسكيش بيه ، لازم تفتكري كويس انك هتقضي حياتك كلها مع الشخص ده ، لان حتى في العلاقات اللي كان فيها شغف كتير في البداية ، مع مرور الوقت ، ده بيتم استبداله بالمودة الحقيقية ونوع من الصداقة ، فلو انتي مش حاسه بالشرارة او الشغف ده من البداية اصلا ، يبقى هتعملي لما السنين تمر بينكم؟ عشان كده متتجاهليش عدم وجود الشرارة ادي ابدا.

6- متخليش ساعتك البيولوجية تتحكم فيكي:

ده لازم يتقال بصوت عالي ، متاخديش اي قرارات زي الجواز تحت ضغط الساعة البيولوجية ، اكيد كلنا عارفين ان الساعة الداخلية ليها ميعاد للجواز والانجاب ، ولكن متخليش ده يسيطر عليكي ويخليكي تختاري اختيار غلط ، وفي النهاية مهما انتي خططتي ، فالحياة بتمشي وكل حاجة بتحصل في وقتها المكتوبة فيه ، عشان كده متخليش ده يضغط عليكي للزواج من الشخص الغلط.

في النهاية هي حياتك انتي ، وانتي اللي هتعيشي مع عواقب قرارك واختيارك ، عشان كده متتسرعيش في الاختيار ، خدي وقتك وفكري كويس جدا ، والشخص اللي انتي ممكن تكوني شايفاه فرصة وخايفة تروح منك يقدر يستنى ، ولو  مستناش لحد ما انتي تاخدي قرارك وانتي مرتاحة ومقتنعة مليون في المية ، فانتي مش محتاجة الشخص ده اصلا في حياتك من الاول.

هل شايفة ان النصايح دي ساعدتك باي شكل او غيرت من وجهة نظرك في الموضوع؟ شاركينا برأيك وافكارك.

الفرق بين العلاقة الحقيقية والعلاقة المزيفة!

الفرق بين العلاقة الحقيقية والمزيفة