الفرق بين العلاقة الحقيقية والعلاقة المزيفة!

ريهام محمود
ريهام محمود
2705

لو لسه داخلة في علاقة جديدة ، او حاسه انك بدأتي تحبي شخص ، بيكون من الصعب جدا انك تعرفي هل العلاقة دي هتستمر على المدى الطويل ولا لا ، في اول العلاقة بتبقي شايفة الحياة كلها وردي وتفكري انك خلاص لقيتي الشخص المناسب The one وشريك روحك وحب حياتك اللي عايزة تستمري معاه للابد ، ولكن بعد مرور وقت من 6 شهور لسنة تقريبا بتبدأي تشوفي الصورة بشكل مختلف عن البداية ، وتحسي ان علاقتك مش كويسة زي ما كنتي بتفكري ، وتبدأي تسألي نفسك هل انتي فعلا في علاقة حقيقية ، الحقيقة ان في طريقة تقدري تعرفي بيها ده ، حتي في المراحل الاولى من العلاقة ، هيبقى في علامات معينة هتساعدك تعرفي اذا كانت علاقتك حقيقية ولا مزيفة ، والنهاردة من خلال السطور الجاية هنقولك 6 علامات للعلاقة المزيفة او الوهمية ، اللي هتقولك بشكل واضح الفرق بين العلاقة الحقيقية والمزيفة.

الفرق بين العلاقة الحقيقية والمزيفة:

1- مش بتتكلموا عن التخطيط للمستقبل:

اول العلامات اللي تقولك انك في علاقة مزيفة او مش حقيقية هو انك انتي وشريكك مش بتتكلموا مع بعض عن خططكم المستقبلية سوا ، وبتبقي مترددة انك تفتحي الموضوع ده معاه وتتكلمي على مستقبلكم مع بعض.

على الجانب التاني لو العلاقة حقيقية مش هتحسي بخجل ابدا انك تتكلمي معاه عن المستقبل ، وده شامل الجواز, الاطفال, احلامك وتطلعاتك الخاصة بيكي ، وفي الحقيقة ان انتوا الاتنين هتبقوا متحمسين للمستقبل وهتبقوا عايزين تحققوه مع بعض.

الفرق بين العلاقة الحقيقية والمزيفة 1
الفرق بين العلاقة الحقيقية والمزيفة 1

2- بتتقابلوا لما بيكون ده مناسب بس:

اكيد مافيش مشكلة من اعادة جدولة ميعاد المقابلة لو في حد منكم مريض او مشغول او عنده اي حاجة مهمة خارجة عن ارادته ، ولكن مقابلة شريكك لما بس يجي مزاجك او على حسب جدولك الزمني والعكس ، دي علامة اكيدة ان علاقتك مزيفة.

في العلاقة الحقيقية هتدوا الاولوية لبعض دايما ، وهتحطوا خطط لمواعيدكم وانشغالاتكم اللي توفرلكم اكبر وقت تقضوه مع بعض ، كل طرف هيغير مواعيده عشان تقدروا تقضوا اكبر وقت مع بعض.

الفرق بين العلاقة الحقيقية والمزيفة 2
الفرق بين العلاقة الحقيقية والمزيفة 2

3- مافيش احساس بالامان:

هل بتحسي انك علاقتك النهاردة موجودة وممكن بكره تبقى لا؟ هل بتحسي بعدم الامان اتجاه شريكك والحب اللي بتشاركيه معاه طول الوقت؟ وان هناك فرصة كبيرة ان علاقتك ممكن متستمرش.

الاحساس الكامل بالامان واحد من العوامل الاساسية لعلاقة طويلة وتستمر للابد ، لما يكون عندك ثقة في شريكك وفي نفسك ، بتتحول العلاقة بالفعل لشراكة مدى الحياة.

الفرق بين العلاقة الحقيقية والمزيفة 3
الفرق بين العلاقة الحقيقية والمزيفة 3

4- مش بتشاركي اللي بتحسي بيه:

لما يكون عامل الامان مش موجود ، فاكيد هتبقي مترددة انك تشاركي مشاعرك الحقيقية مع شريكك ، ودي تعتبر علامة رئيسية تانية على انك في علاقة مزيفة ، عدم الراحة في انك تعملي اللي عايزة تعمليه او تقوليه ده ابعد ما يكون عن العلاقة الصحية ، وهيخلي العلاقة متستمرش ، لان كبت المشاعر ده هيخليكي تحسي بالمرارة على المدى الطويل ، وده هيأدي لسلوك عدواني سلبي في علاقتك.

والعكس صحيح في العلاقة الحقيقية ، مش هتحسي ابدا انك محتاجة تكبتي مشاعرك او تخبيها ، مش هتحسي بالضعف في كل مرة تعبري فيها عن نفسك ومشاعرك ، وهيكون شريكك هو اول شخص تشاركي معاه كل حاجة ، سواء كانت حاجة سيئة او كويسة ، في العلاقة الحقيقية مش هتخافي ابدا انك تبيني اسوأ ما عندك.

الفرق بين العلاقة الحقيقية والمزيفة 4
الفرق بين العلاقة الحقيقية والمزيفة 4

5- بتحسي بالارهاق طول الوقت:

العلاقة المزيفة او اللي مش حقيقية بتبقى مرهقة جدا طول الوقت ، لانك هتلاقي نفسك طول الوقت عمالة تصلحي وتحاولي تنجحي العلاقة بكل الطرق ، وبترهقي تفكيرك في محاولة انك تعرفي هل شريكك بيحس ناحيتك بنفس الطريقة ولا لا.

في العلاقة الحقيقية الوضع مش هيكون كده ابدا ، لان مش هيبقى في حاجة مستخبية ، وهتبقي واثقة جدا من شريكك طول الوقت ، ومش هتحسي ابدا انك محتاجة تحللي ديناميكيات العلاقة او مسارها ، وده معناه انها مش هتكون مرهقة بالنسبة لك اطلاقا.

الفرق بين العلاقة الحقيقية والمزيفة 5
الفرق بين العلاقة الحقيقية والمزيفة 5

6- مش هتحسي باهميتك:

المفروض ان الحب يخليكي تحسي انك مميزة ، ولكن لو بتحسي بالاهمال طول الوقت من شريكك ، ده دليل على ان علاقتك مش حقيقية ، وغالبا مش هتعرفي ابدا اذا كنتي مهمة عند شريكك ولا لا.

على الناحية التانية في العلاقة الحقيقية ، شريكك هيخليكي تحسي دايما انك مميزة ، وده هيساعدك انك تحبي نفسك اكتر واظهار افضل ما عندك ، وشريكك هيفتخر بيكي في كل مكان تروحوه سوا.

الفرق بين العلاقة الحقيقية والمزيفة 6
الفرق بين العلاقة الحقيقية والمزيفة 6

العلاقات في بعض الاحيان ممكن تكون صعبة ، ولكن لو بتحسي انك مش متقدرة من شريكك, بتاخدي اقل من اللي تستحقيه, مكتئبة طول الوقت ، هيكون من الافضل انك تنهي العلاقة دي وتدي حياتك العاطفية فرصة تانية مع شخص تاني.

مقالات متعلقه

7 قواعد هتخليكي تعيشي حياة زوجية سعيدة

7 قواعد هتخليكي تعيشي حياة زوجية سعيدة

متتجوزيش شخص عنده ال 13 عادة دول!

متتجوزيش شخص عنده ال 13 عادة دول!

7 حاجات المرأة القوية مش بتتسامح فيها في العلاقة

7 حاجات المرأة القوية مش بتتسامح فيها في العلاقة