ازاي تمنعي الفقاعات في المانيكير
مشكلة بتحصل كتير معانا كلنا وهي ظهور الفقاعات على الضوافر بعد وضع المانيكير واللي بتحصل عادة اثناء مرحلة جفاف المانيكير ، وبتبوظ شكل المانيكير كله ، ولسوء الحظ ان الحل الوحيد للمشكلة دي هو انك تشيليه وتحطيه تاني من اول جديد ، احنا النهاردة من خلال المقال بتاعنا هنقولك ازاي تمنعي فقاعات المانيكير انها تحصل اصلا من الاول.
ليه بتحصل فقاعات المانيكير؟
المشكلة دي مهما حاولتي تجنبها للاسف بتحصل برضه في اوقات كتير ، وبتظهر عادة اثناء مرحلة تجفيف المانيكير لما الهوا بيتحبس بين طبقات المانيكير ، وفي اسباب كتير للمشكلة دي هو ان المانيكير سميك اوي ، انك مستنتيش وقت كفاية قبل ما تحطي الطبقة التانية ، او محطتيش طبقة اساس قبل المانيكير ، او انك استخدمتي مانيكير منتهي الصلاحية ، وبغض النظر عن الاسباب هنقولك ازاي تمنعي مشكلة تكون الفقاعات دي.
ازاي تمنعي فقاعات المانيكير:
1- نضفي ضوافرك:
خطوة التحضير مهمة جدا قبل ما تبدأي في وضع المانيكير ، الضوافر لما بتبقى دهنية او مش نضيفة ، بتمنع المانيكير من الالتصاق كويس ، اول حاجة اغسلي ايدك بالمية والصابون ، واستني لحد ما تنشف تماما ، وبعدين امسحيها بقطنة فيها اسيتون لازالة اي زيوت او اوساخ موجودة على الضوافر.
2- حطي دايما طبقة اساسية Base coat:
الطبقة الاساسية قبل المانيكير مهمة جدا عشان تديكي لمسة نهائية ناعمة ومتساوية ، زي بالظبط وضع البرايمر قبل كريم الاساس ، الطبقة الاساسية مش بس بتمنع تغير لون المانيكير ، ولكن كمان بيطول من عمر المانيكير على الضوافر ، بما ان الضوافر بتفرز زيوت طبيعية ممكن تمنع التصاق المانيكير بالضوافر ، فالطبقة الاساسية هي افضل طريقة لتجنب الزيوت دي.
3- اتأكدي من المانيكير:
اكيد لو المانيكير قديم متتوقعيش انه في النهاية هيطلع ناعم وشكله حلو ، عشان كده قبل ما تحطي المانيكير اختبريه الاول على جزء من الضافر عشان تتأكدي ان قوامه متغيرش وزي ما هو ، لو لقيتي المانيكير سميك ولزج ، في الحالة دي ممكن تستخدمي منتج تخفيف المانيكير Lacquer thinner لو متوفر عندك او اتخلصي منه خالص.
4- لفى ازازة المانيكير:
رج ازازة المانيكير يمكن اول غلطة كلنا وقعنا فيها تقريبا ، وكمان تحريك الفرشة جوه الازازة وندخلها ونطلعها كذا مرة دي غلطة تانية ، لان ده بيأدي لحبس الهوا جوه الازازة ، وبيكون فقاعات صغيرة في المانيكير.
ولما فقاعات الهوا دي بتتنقل لضوافرك ، بتسيب احيانا ثقوب ملحوظة على المانيكير بتاعك ، عشان كده افضل طريقة للتعامل مع المانيكير هو انك ببساطة تلفي الازازة بين ايديكي يمين وشمال.
5- حطي طبقة رقيقة:
الطبقة الرقيقة هي المفتاح لمانيكير مثالي ، لو اخدتي مانيكير كتير على الفرشة هتلاقي نفسك بتتعاملي مع فوضى وتلطيخ كتير وفقاعات على الضوافر ، وكمان طبقات المانيكير السميكة بتاخد فترة طويلة على ما تنشف.
عشان كده افضل طريقة لتطبيق المانيكير هي وضعه في 3 مرات على الضوفر، ابدأي مشي الفرشة على نص الضوفر الاول وبعدين واحدة على كل جنب من الضوفر ، وبعدين استني لما الطبقة الاولانية تنشف تماما قبل ما تحطي طبقة تانية.
6- حطي دايما طبقة اخيرة Top coat:
بمجرد ما تخلصي من وضع المانيكير على كل ضوافرك ، حطي طبقة Top coat واتأكدي انك تمرري الفرشة على حواف الضوافر ، لان ده هيقلل من فرصة تشقق المانيكير.
7- حطي صوابعك في مية باردة:
عشان تخلي المانيكير ينشف بشكل اسرع ومنع اي فقاعات او تجعد ، حطي صوابعك في طبق فيه مية باردة متلجة لمدة دقيقة تقريبا ، واتجنبي استخدام المية السخنة بعد وضع المانيكير لمدة ساعتين على الاقل.
8- خزني المانيكير بشكل صحيح:
تخزين المانيكير بشكل صح في مكان بارد وضلمة مع درجة حرارة ثابتة مهم جدا للحفاظ على قوامه واطالة عمره ، ودايما بعد ما تستخدميه امسحيه من فوق بقطعة قطن فيها اسيتون قبل ما تقفليه وتشيليه.
القواعد البسيطة دي هتمنع فقاعات المانيكير ، ولكن مع ذلك لو بعد ما عملتي الحاجات دي كلها لسه بيظهر معاكي فقاعات ، يبقى في الحالة دي اتخلصي من المانيكير خالص.
7 طرق سهلة وفعالة تخلي المانيكير بتاعك ينشف اسرع
